ਸ: ਸਰਵਜੀਤ ਸਿੰਘ ਜੀਓ,

ਵਾਹਿਗੁਰੂ ਜੀ ਕਾ ਖਾਲਸਾ ਵਾਹਿਗੁਰੂ ਜੀ ਕੀ ਫਤਿਹ॥

ਪਿਛਲੇ ਇੱਕ ਪੱਤਰ ਵਿਚ ਕਿਰਪਾਲ ਸਿੰਘ ਨੇ ਇੱਕ ਟਾਈਪ ਦੀ ਗਲਤੀ (ਗੁਰਪੁਰਬ ਦਰਪਣ ਪੰਨਾ 84 ਤੇ 10-4-2017 ਨੂੰ ਸੋਮਵਾਰ ਦੀ ਥਾਂ ਐਤਵਾਰ ਛਪਿਆ) ਨੂੰ ਜਿਸ ਤਰ੍ਹਾਂ ਰਾਈ ਦਾ ਪਹਾੜ ਬਣਾਇਆ ਉਸ ਦੇ ਜੁਆਬ ਵਿਚ ਹੀ ਮੈਂ ਲਿਖਿਆ ਸੀ ਕਿ ਸ੍ਰੀ ਗੁਰੂ ਹਰਿ ਕ੍ਰਿਸ਼ਨ ਜੀ ਮਹਾਰਾਜ ਦੇ ਜੋਤੀ ਜੋਤਿ ਸਮਾਉਣ ਅਤੇ ਗੁਰੂ ਤੇਗ ਬਹਾਦਰ ਜੀ ਦੇ ਗੁਰ ਗੱਦੀ ਦਿਵਸ 10-4-2017 ਦਿਨ ਸੋਮਵਾਰ ਹੀ ਲਿਖੇ ਹੋਏ ਹਨ (ਦੇਖੋ ਪੰਨਾ 66 ਅਤੇ 69 ਗੁਰਪੁਰਬ ਦਰਪਣ)। ਕੋਈ ਵੀ ਈਮਾਨਦਾਰ ਸੱਜਣ ਇਹ ਸਹਿਜੇ ਹੀ ਸਮਝ ਸਕਦਾ ਹੈ ਕਿ ਇਹ ਇਕ ਜਗ੍ਹਾਂ ਤੋਂ ਦੂਸਰੀ ਜਗ੍ਹਾ ਟਾਈਪ ਕਰਨ ਦੀ ਗਲਤੀ ਹੈ।

ਵਿਚਾਰਾਂ ਦਾ ਮਤਭੇਦ ਹੋਣਾ ਕੋਈ ਮਾੜੀ ਗਲ ਨਹੀਂ ਪਰ ਤੁਹਾਡੇ ਹੀ ਮੰਚ ਤੋਂ ਤੁਹਾਡੇ ਸਾਥੀ ਗਾਲੀਆਂ ਦਈ ਜਾਣ ਅਤੇ ਤੁਸੀਂ ਚੁੱਪ ਕਰ ਕੇ ਅਣਸੁਣੀਆਂ ਕਰ ਸਕੋ ਇਹ ਕਿੱਥੋਂ ਦੀ ਇਨਸਾਨੀਅਤ ਹੈ। ਕੀ ਐਸੇ ਵਾਤਾਵਰਣ ਵਿਚ ਕੋਈ ਵਿਚਾਰ ਵਟਾਂਦਰਾ ਹੋ ਸਕਦਾ ਹੈ ? ਇਸ ਲਈ ਮੈਂ ਆਪਣੇ ਆਪ ਨੂੰ ਇਸ ਵਿਚਾਰ ਵਟਾਂਦਰੇ ਤੋਂ ਅਲੱਗ ਕਰ ਲਿਆ ਹੈ।

ਬਾਕੀ ਰਹੀ ਗਲ 1 ਲੱਖ ਦੇ ਇਨਾਮ ਦੀ ਮੈਂ ਅੱਗੇ ਵੀ ਕਈ ਵਾਰ ਲਿਖ ਚੁਕਾ ਹਾਂ ਕਿ ਤੁਹਾਡਾ ਜਦੋਂ ਜੀਅ ਕਰੇ ਰੇਡੀਓ ਸ਼ੇਰੇ ਪੰਜਾਬ ਵਾਲੇ ਸ: ਕੁਲਦੀਪ ਸਿੰਘ ਨਾਲ ਆ ਕੇ ਇਹ ਸਿੱਧ ਕਰ ਦਿਓ ਕਿ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਦਾ ਪ੍ਰਕਾਸ਼ ਜੋ ਪੋਹ ਸੁਦੀ 7, 23 ਪੋਹ ਬਿਕ੍ਰਮੀ/198 ਨਾਨਕਸ਼ਾਹੀ, 22-12-1666 ਨੂੰ ਹੈ ਉਸ ਦਿਨ ਨਾਨਕਸ਼ਾਹੀ (ਸੂਰਜੀ ਪੁਰੇਵਾਲ) ਮੁਤਾਬਿਕ 23 ਪੋਹ ਸੰਮਤ 198 ਮੁਤਾਬਿਕ 5 ਜਨਵਰੀ ਸੀ ਅਤੇ 1 ਲੱਖ ਦਾ ਇਨਾਮ ਹਾਸਲ ਕਰੋ। ਪਰ ਤੁਸੀਂ ਹੀ ਹਾਲੀ ਤੱਕ ਇਹ ਹੌਸਲਾ ਨਹੀਂ ਕੀਤਾ। ਬਾਕੀ ਇਹ ਲਿਖੀ ਜਾਣਾ ਕਿ ਮੈਂ ਮੁਕਰ ਗਿਆ ਹਾਂ, ਇਹ ਸੱਚ ਨਹੀਂ।

ਆਖਰੀ ਫਤਿਹ ਬੁਲਾਉਂਦਾ ਹਾਂ ਅਤੇ ਇਸ ਸਾਰੇ ਪਤਰ ਵਿਹਾਰ ਵਿਚ ਮੇਰੇ ਵਲੋਂ ਕੋਈ ਅਪਸ਼ਬਦ ਲਿਖਿਆ ਗਿਆ ਹੋਵੇ ਤਾਂ ਉਸ ਦੀ ਮੈਂ ਖਿਮਾ ਮੰਗਦਾ ਹਾਂ।

SURJIT SINGH NISHAN M.sc., MIS, MCA.

ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਜੀ !

ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਿਹ।

ਸ ਕਿਰਪਾਲ ਸਿੰਘ ਜੀ ਦਾ ਪੱਤਰ (26 ਅਪ੍ਰੈਲ) ਪੜ੍ਹ ਕੇ, ਤੁਹਾਡੇ ਪੱਤਰ ਬਾਰੇ ਜਾਣਕਾਰੀ ਮਿਲੀ, ਜੋ ਮੈਂ ਕਿਸੇ ਕਾਰਨ ਪਹਿਲਾ ਨਹੀਂ ਸੀ ਪੜ੍ਹ ਸਕਿਆ। ਤੁਹਾਡਾ ਪੱਤਰ ਪੜ੍ਹ ਕੇ ਬਹੁਤ ਹੀ ਹੈਰਾਨੀ ਹੋਈ ਹੈ ਕਿ ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਵੀ, ਅਨੁਰਾਗ ਸਿੰਘ ਵਾਂਗੂੰ 100% ਸ਼ੁੱਧ ਝੂਠ ਲਿਖ ਰਿਹਾ ਹੈ।

ਨਿਸ਼ਾਨ ਜੀ !  ਤੁਸੀਂ ਝੂਠ ਲਿਖ ਕੇ ਕੀ ਸਾਬਤ ਕਰਨਾ ਚਾਹੁੰਦੇ ਹੋ ?

ਹੁਣ ਜਦੋਂ ਤੁਹਾਡਾ ਝੂਠ ਫੜਿਆ ਗਿਆ ਹੈ ਤਾਂ ਇਸ ਗਰੁਪ ਵਿੱਚ ਸ਼ਾਮਲ ਸੱਜਣ (ਲਗਭਗ 70 ਸੱਜਣ) ਤੁਹਾਡੇ ਬਾਰੇ ਕੀ ਸੋਚਦੇ ਹੋਣਗੇ ?

ਵਿਚਾਰਾਂ ਵਿੱਚ ਮੱਤ ਭੇਦ ਹੋਣ ਦੇ ਬਾਵਜੂਦ ਵੀ ਮੈਂ ਅੱਜ ਤੱਕ ਤੁਹਾਡਾ ਸਤਿਕਾਰ ਕਰਦਾ ਆ ਰਿਹਾ ਹਾਂ ਕਿਉਂਕਿ ਮੈਨੂੰ ਇਸ ਵਿਸ਼ੇ ਵਿੱਚ ਦਿਲਚਸਪੀ ਤੁਹਾਡੀਆਂ ਵੀ ਡੀ ਓ ਵੇਖ ਕੇ ਵਧੇਰੇ ਹੋਈ ਸੀ, ਪਰ ਜੇ ਆਪ ਜੀ ਇਸੇ ਤਰ੍ਹਾਂ ਚਿੱਟਾ ਝੂਠ ਹੀ ਲਿਖਣਾ ਹੈ ਤਾਂ…।

ਕਰਨਲ ਨਿਸ਼ਾਨ ਜੀ !

1. ਕੀ ਇਹ ਸੱਚ ਨਹੀਂ ਕਿ ਮੈਂ ਪਿਛਲੇ ਸਾਲ (2 ਦਸੰਬਰ) ਤੁਹਾਡੇ ਨਾਲ ਵਿਚਾਰ ਕਰਨ ਲਈ ਤੁਹਾਨੂੰ ਬੇਨਤੀ ਕੀਤੀ ਸੀ ?
2. ਕੀ ਇਹ ਸੱਚ ਨਹੀਂ ਕਿ ਤੁਸੀਂ ਕੋਈ ਹੁੰਗਾਰਾ ਨਹੀਂ ਸੀ ਭਰਿਆ ?
3. ਕੀ ਇਹ ਸੱਚ ਨਹੀਂ ਹੈ ਕਿ ਮੇਰੇ ਪੱਤਰ ਸਿੱਖ ਮਾਰਗ ਉੱਤੇ ਅੱਜ ਵੀ ਉਪਲਬਧ ਹਨ ?
4. ਕੀ ਇਹ ਸੱਚ ਨਹੀਂ ਹੈ ਕਿ ਅਜੇ ਪਿਛਲੇ ਹਫ਼ਤੇ ਹੀ ਤੁਹਾਡੇ ਵੱਲੋਂ ਲਿਖੇ ਗਏ ਝੂਠ ਨੂੰ ਨੰਗਾ ਕੀਤਾ ਸੀ।
5. ਕੀ ਇਹ ਸੱਚ ਨਹੀਂ ਕਿ 17 ਅਪ੍ਰੈਲ ਨੂੰ ਮੈਂ ਇਸੇ ਸਬੰਧ ਵਿੱਚ ਇਕ ਪੱਤਰ ਲਿਖਿਆ ਸੀ ?

(ਉਹ ਪੱਤਰ http://gurparsad.com/nanakshahi-calendar-debate-18 ਪੜ੍ਹ ਸਕਦੇ ਹੋ)

6. ਕੀ ਇਹ ਸੱਚ ਨਹੀਂ ਹੈ ਕਿ 25 ਅਪ੍ਰੈਲ ਨੂੰ ਮੈਂ ਆਪਣੇ ਪੱਤਰ ਵਿੱਚ ਤੁਹਾਡੀ ਚੁਣੌਤੀ ਪ੍ਰਵਾਨ ਕਰਦੇ ਹੋਏ ਵਿਚਾਰ ਲਈ ਸੱਦਾ ਦਿੱਤਾ ਸੀ ?

ਤੁਸੀਂ ਕਿਸ ਅਧਾਰ ’ਤੇ ਲਿਖਿਆ ਹੈ ਕਿ “ਮੈਂ ਕਾਫ਼ੀ ਸਾਲਾਂ ਤੋਂ 1 ਲੱਖ ਰੁਪਇਆ ਲਈ ਫਿਰਦਾ ਹਾਂ ਅਤੇ ਕਿਸੇ ਮਰਦ ਨੇ ਹਿੰਮਤ ਨਹੀਂ ਕੀਤੀ ਤੁਸੀਂ ਕਰ ਕੇ ਵੇਖ ਲਵੋ”।

ਕਰਨਲ ਨਿਸ਼ਾਨ ਜੀ !  ਖ਼ੁਦ ਮਰਦ ਬਣੋ ਅਤੇ ਕਰੋ ਮੇਰਾ ਸੱਦਾ (ਤੀਜਾ ਸੱਦਾ) ਪ੍ਰਵਾਨ । ਦੱਸੋ ਕਿਸ ਮੰਚ ’ਤੇ ਵਿਚਾਰ ਕਰਨੀ ਹੈ ?

ਕਰਨਲ ਨਿਸ਼ਾਨ ਜੀ !  ਸਿਆਣਿਆਂ ਦਾ ਕਥਨ ਹੈ ਕਿ “ਗਲਤੀ ਉਹ ਨਹੀਂ ਹੁੰਦੀ ਜੋ ਹੋ ਜਾਵੇ, ਗਲਤੀ ਉਹ ਹੁੰਦੀ ਹੈ ਜੋ ਧਿਆਨ ਵਿੱਚ ਲਿਆਉਣ ਤੋਂ ਪਿਛੋਂ ਵੀ ਮੰਨੀ ਨਾ ਜਾਵੇ”।

ਤੁਸੀਂ ਵਾਰ-ਵਾਰ ਬੇਨਤੀਆਂ ਕਰਨ ’ਤੇ ਵੀ, ਤਾਰੀਖ਼ਾਂ ਦੀ ਪੜਤਾਲ ਕਰਨ ਦੀ ਬਜਾਏ ਆਪਣੇ ਆਪ ਨੂੰ ਸਹੀ ਸਾਬਤ ਕਰਨ ਦੀ ਜਿੱਦ ਕਰ ਰਹੇ ਹੋ। ਹੁਣ ਤਾਂ ਤੁਸੀਂ ਝੂਠ ਲਿਖਣਾ ਵੀ ਆਰੰਭ ਕਰ ਦਿੱਤਾ ਹੈ।

ਇਕ ਮਹੀਨੇ ਤੋਂ ਵੱਧ ਸਮਾਂ ਹੋ ਗਿਆ, ਪਾਣੀ ਰਿੜਕ ਹੋ ਰਿਹਾ ਹੈ। ਇਕ ਸਵਾਲ (27) ਦਾ ਫੈਸਲਾ ਨਹੀਂ ਹੋਇਆ। ਕਈ ਹੋਰ ਸਵਾਲ ਵੀ ਹਨ, ਜਿਨ੍ਹਾਂ ਦੀ ਪੜਤਾਲ ਕਰਨ ਦੀ ਜ਼ਰੂਰਤ ਹੈ।

ਕਰਨਲ ਨਿਸ਼ਾਨ ਜੀ !  ਆਓ, ਇਮਾਨਦਾਰੀ ਨਾਲ ਵਿਚਾਰ ਕਰੀਏ ਤਾਂ ਜੋ ਕਿਸੇ ਨਤੀਜੇ ’ਤੇ ਪੁੱਜਿਆ ਜਾ ਸਕੇ ।

ਧੰਨਵਾਦ

ਸਰਵਜੀਤ ਸਿੰਘ ਸੈਕਰਾਮੈਂਟੋ 4/27/2017

ਗੁਰਮੁਖ ਪਿਆਰੇ ਲੈਫ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਸਾਹਿਬ ਜੀ!

ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਿਹ॥

ਵਿਸ਼ਾ: ਕੈਲੰਡਰ ਦੀਆਂ ਤਾਰੀਖ਼ਾਂ ਬਾਰੇ ਅਸਹਿਮਤੀ ।

1.  ਆਪ ਜੀ ਦੀ ਇੱਕ ਚਿੱਠੀ 25 ਤਰੀਖ ਦੇ ਈ-ਮੇਲ ਇਨਬੌਕਸ ਵਿੱਚ ਮਿਲੀ ਅਤੇ ਦੂਸਰੀ 26 ਤਰੀਖ ਨੂੰ। ਚੰਗਾ ਹੋਇਆ 26 ਅਪ੍ਰੈਲ ਵਾਲੀ ਚਿੱਠੀ ਵਿੱਚ ਤੁਸੀਂ ਆਪਣੀ ਪੁਸਤਕ ਵਿੱਚ ਦਰਜ ਤਰੀਖਾਂ ਗਲਤ ਸਾਬਤ ਕਰਨ ਵਾਲੇ ਨੂੰ ਇੱਕ ਲੱਖ ਰੁਪਏ ਦੇਣ ਦੇ ਵਾਅਦੇ ’ਤੇ ਕਾਇਮ ਰਹਿੰਦੇ ਹੋਏ ਲਿਖਿਆ ਹੈ : “ਮੈਂ ਕਾਫ਼ੀ ਸਾਲਾਂ ਤੋਂ 1 ਲੱਖ ਰੁਪਇਆ ਲਈ ਫਿਰਦਾ ਹਾਂ ਅਤੇ ਕਿਸੇ ਮਰਦ ਨੇ ਹਿੰਮਤ ਨਹੀਂ ਕੀਤੀ, ਤੁਸੀਂ ਕਰ ਕੇ ਵੇਖ ਲਵੋ।”

ਕਰਨਲ ਸਾਹਿਬ ਜੀ ! ਇਹ ਇੱਕ ਲੱਖ ਦਾ ਇਨਾਮ ਕਿਸੇ ਮਰਦ ਨੂੰ; ਤਾਂ ਦਿਓਗੇ ਜੇ ਤੁਸੀਂ ਆਪਣੀ ਤਰੀਖ ਨੂੰ ਗਲਤ ਹੁੰਦਿਆਂ ਹੋਇਆ ਵੀ ਗਲਤ ਮੰਨੋਗੇ !  ਜਿਸ ਨੇ ਆਪਣੀ ਗਲਤੀ ਮੰਨਣੀ ਹੀ ਨਹੀਂ ਉਹ ਭਾਵੇਂ ਇੱਕ ਦੀ ਥਾਂ ਦਸ ਲੱਖ ਚੁੱਕੀ ਫਿਰੇ ਇਸ ਨਾਲ ਕੀ ਫਰਕ ਪਵੇਗਾ। ‘ਤੁਸੀਂ ਆਪਣੀ ਗਲਤੀ ਨਹੀਂ ਮੰਨੋਗੇ’ ; ਇਹ, ਤੁਹਾਡੀ ਇਸੇ ਚਿੱਠੀ ਵਿੱਚ, ਤੁਹਾਡੀ ਆਪਣੀ ਲਿਖਤ ਹੀ ਸਿੱਧ ਕਰ ਰਹੀ ਹੈ; ਜਿਸ ਵਿੱਚ ਤੁਸੀਂ ਲਿਖਿਆ ਹੈ: “ਤੁਹਾਡਾ ਇਹ ਲਿਖਣਾ ਕਿ ਮੇਰੀਆਂ ਤਾਰੀਖ਼ਾਂ ਗਲਤ ਹਨ; ਇਹ ਤੁਹਾਡੇ ਲਫ਼ਜ਼ਾਂ ਦੀ ਹੇਰਾ ਫੇਰੀ ਤੋਂ ਵੱਧ ਕੁੱਝ ਨਹੀਂ। ਜੇ ਮੇਰੀ ਇੱਕ ਤਾਰੀਖ਼ ਸ਼੍ਰੋਮਣੀ ਕਮੇਟੀ ਨਾਲ ਨਹੀਂ ਮਿਲਦੀ ਤਾਂ ਉਸ ਦੇ ਕਈ ਕਾਰਨ ਹੋ ਸਕਦੇ ਹਨ (ਪਰ ਵਾਰ ਵਾਰ ਪੁੱਛੇ ਜਾਣ ਦੇ ਬਾਵਜੂਦ ਕਾਰਨ ਦੱਸ ਨਹੀਂ ਰਹੇ) ਪਰ ਇਸ ਦਾ ਇਹ ਮਤਲਬ ਨਹੀਂ ਮੇਰੀ ਤਾਰੀਖ਼ ਗਲਤ ਹੈ।” ਜੇ ਤੁਸੀਂ ਆਪਣੀ ਤਰੀਖਾਂ ਵਿੱਚ ਫਰਕ ਹੋਣਾ ਮੰਨ ਕੇ ਵੀ ਉਸ ਨੂੰ ਗਲਤ ਮੰਨਣ ਲਈ ਤਿਆਰ ਨਹੀਂ ਤਾਂ ਕਿਹੜਾ ਮਾਈ ਦਾ ਲਾਲ ਹੈ ਜੋ ਤੁਹਾਥੋਂ ਗਲਤੀ ਮੰਨਵਾ ਸਕੇ।

ਕਰਨਲ ਸਾਹਿਬ ਜੀ ! ਇੱਕ ਲੱਖ ਰੁਪਈਏ ਨੂੰ ਹੋ ਸਕਦਾ ਹੈ ਤੁਸੀਂ ਬਹੁਤ ਵੱਡੀ ਰਕਮ ਸਮਝਦੇ ਹੋਵੋਗੇ ਜਿਸ ਕਾਰਨ ਤੁਸੀਂ ਇੱਕ ਲੱਖ ਰੁਪਈਆ ਦੇਣ ਦੇ ਮਾਰੇ ਆਪਣੀ ਗਲਤੀ ’ਤੇ ਵੀ ਅੜੇ ਹੋਏ ਹੋ, ਪਰ ਮੈਂ ਤੁਹਾਥੋਂ ਇੱਕ ਲੱਖ ਰੁਪਈਏ ਦਾ ਇਨਾਮ ਜਿਤਣ ਲਈ ਤੁਹਾਡੇ ਨਾਲ ਮਗਜ਼ ਖਪਾਈ ਨਹੀਂ ਕਰ ਰਿਹਾ ਬਲਕਿ ਮੇਰਾ ਮਨੋਰਥ ਸਿਰਫ ਇਹੋ ਹੈ ਕਿ ਡਾ: ਅਨੁਰਾਗ ਸਿੰਘ ਸਮੇਤ ਤੁਹਾਡੇ ਵਰਗੇ ਵਿਦਵਾਨ ਆਪਣੀਆਂ ਕੈਲਕੂਲੇਸ਼ਨਾਂ ਦੇ ਅਧਾਰ ’ਤੇ ਆਪਣੀਆਂ ਹੀ ਤਰੀਖਾਂ ਨੂੰ ਸਹੀ ਸਿੱਧ ਕਰ ਦੇਣ ਜਾਂ ਆਪਣੀ ਗਲਤੀ ਨੂੰ ਸਵੀਕਾਰ ਕਰ ਲੈਣ ਤਾਂ ਤੁਹਾਡੀ ਵਜ੍ਹਾ ਕਰ ਕੇ ਕੌਮ ਦੇ ਗਲ਼ ਪਿਆ ਅਣਲੋੜੀਂਦਾ ਵਿਵਾਦ ਖਤਮ ਹੋ ਸਕਦਾ ਹੈ। ਮੈਨੂੰ ਪੂਰਾ ਯਕੀਨ ਹੈ ਕਿ ਤੁਸੀਂ ਆਪਣੀਆਂ 100% ਤਰੀਖਾਂ ਨੂੰ ਸਹੀ ਸਿੱਧ ਨਹੀਂ ਕਰ ਸਕਦੇ। ਸੋ ਮਸਲੇ ਦੇ ਹੱਲ ਲਈ ਮੈਂ ਆਪ ਜੀ ਨਾਲ ਇਹ ਵਾਅਦਾ ਕਰਦਾ ਹਾਂ ਕਿ ਜੇ ਤੁਸੀਂ ਆਪਣੀ ਗਲਤੀ ਸਵੀਕਾਰ ਕਰ ਲਵੋ ਤਾਂ ਇਨਾਮ ਵਿੱਚ ਤੁਹਾਥੋਂ ਜਿੱਤੇ ਇੱਕ ਲੱਖ ਰੁਪਏ ਤੁਹਾਨੂੰ ਮੁਆਫ਼ ਕਰ ਦੇਵਾਂਗਾ। ਤੁਸੀਂ ਆਪਣੀ ਇੱਕ ਤਰੀਖ ਵਿੱਚ ਫਰਕ ਤਾਂ ਮੰਨ ਹੀ ਚੁੱਕੇ ਹੋ ਪਰ ਕਿਹੜੀ ਤਰੀਖ ਹੈ ਜਿਸ ਵਿੱਚ ਤੁਸੀਂ ਫਰਕ ਮੰਨ ਲਿਆ ਹੈ ਅਤੇ ਉਸ ਗਲਤੀ ਦਾ ਕੀ ਕਾਰਨ ਹੈ ਇਹ ਦੱਸਣ ਲਈ ਤੁਸੀਂ ਹਾਲੀ ਵੀ ਤਿਆਰ ਨਹੀਂ। ਤੁਹਾਡੀ ਪੁਸਤਕ ਛਪਣ ਪਿੱਛੋਂ ਪਹਿਲੇ ਹੀ ਸਾਲ ਸ਼੍ਰੋਮਣੀ ਕਮੇਟੀ ਦਾ ਸੰਮਤ 549 ਦਾ ਕੈਲੰਡਰ ਛਪਿਆ ਤਾਂ ਉਸ ਵਿੱਚ 4 ਤਰੀਖਾਂ ਦਾ ਫਰਕ ਤੁਹਾਨੂੰ ਦੱਸ ਦਿੱਤਾ ਬਾਕੀ ਦੇ 86 ਸਾਲਾਂ ਦਾ ਵੀ ਤਾਂ ਇਹੋ ਹਾਲ ਹੋਵੇਗਾ। ਕ੍ਰਿਪਾ ਕਰ ਕੇ ਜੇ ਤੁਸੀਂ ਸ਼੍ਰੋਮਣੀ ਕਮੇਟੀ ਦੇ ਕੈਲੰਡਰ ਨਾਲੋਂ ਤਰੀਖਾਂ ਦੇ ਫਰਕ ਦਾ ਕਾਰਨ ਅਤੇ ਆਪਣੀ ਪੁਸਤਕ ਵਿੱਚ 86 ਸਾਲਾਂ ਦੇ ਸਾਰੇ ਗੁਰਪੁਰਬਾਂ ਦੀਆਂ ਬਾਕੀ ਦੀਆਂ ਸਾਰੀਆਂ ਤਰੀਖਾਂ ਦੀ ਖ਼ੁਦ ਹੀ ਪੜਚੋਲ ਕਰ ਕੇ ਉਨ੍ਹਾਂ ਵਿੱਚੋਂ ਜਿੰਨੀਆਂ ਤੁਸੀਂ ਖ਼ੁਦ ਗਲਤ ਮੰਨ ਗਏ ਉਹ ਸਾਰੀਆਂ ਗਲਤੀਆਂ ਵੀ ਤੁਹਾਨੂੰ ਮੁਆਫ਼। ਅੱਗੇ ਤੋਂ ਪੜਚੋਲ ਤੇ ਵੀਚਾਰ ਸਿਰਫ ਉਨ੍ਹਾਂ ਤਰੀਖਾਂ ਸਬੰਧੀ ਹੀ ਕਰਾਂਗੇ ਜਿਨ੍ਹਾਂ ਨੂੰ ਤੁਸੀਂ ਇੱਟ ਵਰਗੀਆਂ ਪੱਕੀਆਂ ਹੋਣ ਦਾ ਦਾਅਵਾ ਕਰੋਗੇ। ਬਾਕੀ ਰਹੀ ਗੱਲ ਤੁਹਾਡੇ ਦਾਅਵੇ ਦੀ, ਕਿ ਤੁਹਾਡੇ ਵੱਲੋਂ ਰੱਖਿਆ ਇੱਕ ਲੱਖ ਰੁਪਏ ਦਾ ਇਨਾਮ ਜਿੱਤਣ ਦੀ ਕਿਸੇ ਮਰਦ ਨੇ ਹਿੰਮਤ ਨਹੀਂ ਕੀਤੀ। ਸ: ਸਰਬਜੀਤ ਸਿੰਘ ਸੈਕਰਾਮੈਂਟੋ ਨੇ 2/12/2017 ਨੂੰ ਤੁਹਾਨੂੰ ਇੱਕ ਚਿੱਠੀ ਇਸ ਤਰ੍ਹਾਂ ਲਿਖੀ ਸੀ :- “ਤੁਹਾਡੀ ਕਿਤਾਬ, ਗੁਰਪੁਰਬ ਦਰਪਣ” ਦੇ ਪੰਨਾ 95 ਉੱਪਰ ਇਹ ਚੁਣੌਤੀ ਦਰਜ ਹੈ:- “ਮੈਂ ਇਹ ਚੁਣੌਤੀ ਪ੍ਰਵਾਨ ਕਰਦਾ ਹਾਂ। ਆਪਣੀ ਸਾਰੀ ਗੱਲਬਾਤ ਲਿਖਤੀ ਰੂਪ ਵਿਚ ਹੋਵੇਗੀ ਤਾਂ ਜੋ ਦੁਨੀਆ ਦੇ ਕੋਨੇ-ਕੋਨੇ ਵਿੱਚ ਬੈਠੀਆਂ ਸਿੱਖ ਸੰਗਤਾਂ, ਇਸ ਨੂੰ ਨਾਲੋਂ ਨਾਲ ਹੀ ਪੜ੍ਹ ਸਕਣ। ਮੈਂ ਆਪਣੇ ਵੱਲੋਂ, www.Sikhmarg.com ਪੇਸ਼ ਕਰਦਾ ਹਾਂ ਜਿਸ ਦਾ ਈ-ਮੇਲ ਪਤਾ ਹੈ, info@sikhmarg.com. ਜਿਹੜਾ ਮੰਚ ਆਪ ਜੀ ਨੂੰ ਪਸੰਦ ਹੋਵੇ, ਉਸ ਦਾ ਪਤਾ ਤੁਸੀਂ ਦੱਸ ਦਿਓ ਮੈਨੂੰ ਪ੍ਰਵਾਨ ਹੋਵੇਗਾ।” ਉਨ੍ਹਾਂ ਨੇ ਅੱਗੇ ਇਹ ਵੀ ਲਿਖਿਆ ਸੀ : “ਨਿਸ਼ਾਨ ਜੀ ! ਜੇਕਰ ਆਪ ਜੀ ਇਸ ਚੁਣੌਤੀ ਨੂੰ ਵਾਪਸ ਲੈਣਾ ਚਾਹੋ ਤਾਂ 9 ਦਸੰਬਰ 2017 ਈ: ਦਿਨ ਸ਼ਨਿਚਰਵਾਰ ਤੋਂ ਪਹਿਲਾਂ-ਪਹਿਲਾਂ ਵਾਪਸ ਲੈਣ ਦਾ ਐਲਾਨ ਵੀ ਕਰ ਸਕਦੇ ਹੋ। ਨਹੀਂ ਤਾਂ 10 ਦਸੰਬਰ 2017 ਈ:, ਦਿਨ ਐਤਵਾਰ ਤੋਂ ਆਪਾਂ ਵਿਚਾਰ ਚਰਚਾ ਆਰੰਭ ਕਰਾਂਗੇ।”  ਇਸ ਉਪ੍ਰੰਤ 10 ਦਸੰਬਰ ਤੋਂ ਹੁਣ ਤੱਕ ਉਹ ਤੁਹਾਡੀ ਚੁਣੌਤੀ ਪ੍ਰਵਾਨ ਕਰਦੇ ਆ ਰਹੇ ਹਨ ਜਿਨ੍ਹਾਂ ਦਾ ਵੇਰਵਾ ਉਨ੍ਹਾਂ ਨੇ ਤੁਹਾਨੂੰ ਹੁਣੇ ਹੀ 17 ਅਪ੍ਰੈਲ 2018 ਵਾਲੀ ਚਿੱਠੀ ਰਾਹੀਂ ਮੁੜ ਚੇਤਾ ਵੀ ਕਰਵਾਇਆ ਸੀ ਜੋ “ਗੁਰਪ੍ਰਸਾਦ.ਕਾਮ http://gurparsad.com/ ”  ’ਤੇ ਚਿੱਠੀ ਨੰ: 18 ਦੇ ਸਿਰਲੇਖ ਹੇਠ ਪੜ੍ਹੀ ਜਾ ਸਕਦੀ ਹੈ। ਇਸ ਦੇ ਬਾਵਜੂਦ ਜੇ ਤੁਸੀਂ ਦਾਅਵਾ ਕਰਦੇ ਹੋ ਕਿ “ਕੋਈ ਮਰਦ ਅੱਗੇ ਨਹੀਂ ਆਇਆ” ਤਾਂ ਇੰਝ ਜਾਪਦਾ ਹੈ ਕਿ ਤੁਸੀਂ ਝੂਠ ਬੋਲਣ ’ਚ ਸਿਆਸੀ ਲੀਡਰਾਂ ਨੂੰ ਮਾਤ ਪਾਉਣ ਦੀ ਦੌੜ ਵਿੱਚ ਸ਼ਾਮਲ ਹੋਣਾ ਚਾਹ ਰਹੇ ਹੋ।

2.  ਕਰਨਲ ਨਿਸ਼ਾਨ ਸਾਹਿਬ ਜੀ ! ਆਪ ਜੀ ਤੋਂ ਪੁੱਛਿਆ ਇਹ ਗਿਆ ਸੀ ਕਿ ਜੇ ਤੁਸੀਂ ਮਲ ਮਾਸ ਨੂੰ ਨਹੀਂ, ਬਲਕਿ ਇਤਿਹਾਸ ਨੂੰ ਹੀ ਮੁੱਖ ਰੱਖਿਆ ਹੈ, ਤਾਂ ਕੀ ਕਾਰਨ ਹੈ ਕਿ ਤੁਸੀਂ ਆਪਣੀ ਪੁਸਤਕ ਵਿੱਚ ਬਹੁਤ ਸਾਰੀਆਂ ਤਰੀਖ਼ਾਂ ਮਲ ਮਾਸ ਵਿੱਚ ਨਿਰਧਾਰਿਤ ਕੀਤੀਆਂ ਹਨ ਅਤੇ ਬਹੁਤੇ ਕੇਸਾਂ ਵਿੱਚ ਮਲ ਮਾਸ ਦਾ ਖ਼ਿਆਲ ਰੱਖ ਕੇ ਇੱਕ ਮਹੀਨਾ ਲੇਟ ਨਿਰਧਾਰਿਤ ਕੀਤੀਆਂ ਹਨ ? ਕਿਉਂ ਨਹੀਂ ਇੱਕੋ ਨਿਯਮ ਅਪਣਾਇਆ ਕਿ ਜਾਂ ਤਾਂ ਸਾਰੀਆਂ ਹੀ ਤਰੀਖਾਂ ਪਹਿਲਾਂ ਆਉਣ ਵਾਲੇ ਮਹੀਨੇ ਵਿੱਚ ਨਿਰਧਾਰਤ ਕੀਤੀਆਂ ਜਾਣ ਜਾਂ ਦੂਸਰੇ ਮਹੀਨੇ ਵਿੱਚ। ਆਪਣੀ ਮਰਜੀ ਨਾਲ ਹੀ ਕਦੀ ਪਹਿਲੇ ਵਿੱਚ ਅਤੇ ਕਦੀ ਦੂਸਰੇ ਮਹੀਨੇ ਵਿੱਚ ਨਿਰਧਾਰਤ ਕਰਨ ਦਾ ਨਿਯਮ ਤੁਸੀਂ ਕਿਹੜੀ ਕਿਤਾਬ ਵਿੱਚੋਂ ਪੜ੍ਹਿਆ ਹੈ ? ਇਸ ਨਾਲ ਸਬੰਧਤ ਸਵਾਲ ਇਹ ਵੀ ਸੀ ਕਿ ਜਿਸ ਨੂੰ ਤੁਸੀਂ ਸਿੱਖ ਕੈਲੰਡਰ ਦੱਸ ਰਹੋ ਹੋ ਇਸ ਤਰ੍ਹਾਂ ਦਾ ਕੈਲੰਡਰ ਅੱਜ ਤੱਕ ਸ਼੍ਰੋਮਣੀ ਕਮੇਟੀ ਸਮੇਤ ਸਿੱਖਾਂ ਦੀ ਕਿਸੇ ਵੀ ਸੰਸਥਾ ਨੇ ਨਹੀਂ ਅਪਣਾਇਆ। ਇਹੋ ਕਾਰਨ ਹੈ ਕਿ ਤੁਹਾਡੇ ਵੱਲੋਂ ‘ਗੁਰਪੁਰਬ ਦਰਪਣ’ ਪੁਸਤਕ ਛਾਪਣ ਪਿੱਛੋਂ ਸ਼੍ਰੋਮਣੀ ਕਮੇਟੀ ਨੇ ਸੰਮਤ 549 ਅਤੇ 550 ਦੇ ਸਿਰਫ ਦੋ ਕੈਲੰਡਰ ਹੀ ਛਾਪੇ ਹਨ ਤੇ ਦੋਵਾਂ ’ਚ 8 ਤਰੀਖਾਂ ਫਰਕ ਨਾਲ ਹਨ। ਇਨ੍ਹਾਂ ਸਵਾਲਾਂ ਦਾ ਜਵਾਬ ਦੇਣ ਦੀ ਬਜਾਏ ਤੁਸੀਂ ਸਾਨੂੰ ਸਲਾਹ ਦੇ ਰਹੇ ਹੋ ਕਿ “ਸ਼੍ਰੋਮਣੀ ਕਮੇਟੀ ਸਿੱਖ ਪੰਥ ਦੀ ਸਿਰਮੌਰ ਸੰਸਥਾ ਹੈ ਇਸ ਲਈ ਉਸ ਵੱਲੋਂ ਉਲੀਕੇ ਪ੍ਰੋਗਰਾਮਾਂ ਅਨੁਸਾਰ ਇਸ ਸਾਲ ਲਈ ਜੋ ਕੈਲੰਡਰ ਸ਼੍ਰੋਮਣੀ ਕਮੇਟੀ ਨੇ ਛਾਪਿਆ ਹੈ ਪੰਥਕ ਏਕਤਾ ਲਈ ਇਹ ਜ਼ਰੂਰੀ ਹੈ ਕਿ ਉਸੇ ਕੈਲੰਡਰ ਮੁਤਾਬਿਕ ਹੀ ਸਾਰੇ ਗੁਰਪੁਰਬ ਮਨਾਏ ਜਾਣ। ਉਸ ਤੇ ਕਿੰਤੂ ਪਰੰਤੂ ਕਰਨ ਦਾ ਸੁਆਲ ਹੀ ਪੈਦਾ ਨਹੀਂ ਹੁੰਦਾ।”

ਇਸ ਲਈ ਤੁਹਾਡੇ ਲਈ ਨਵੇਂ ਸਵਾਲ ਇਹ ਹਨ

(ੳ) ਸ਼੍ਰੋਮਣੀ ਕਮੇਟੀ ਨਾਲੋਂ ਵੱਖਰਾ ਕੈਲੰਡਰ ਛਾਪ ਕੇ ਕੀ ਤੁਸੀਂ ਉਸ ’ਤੇ ਖ਼ੁਦ ਹੀ ਕਿੰਤੂ ਪ੍ਰੰਤੂ ਨਹੀਂ ਕਰ ਰਹੇ ਅਤੇ ਸਾਡੇ ਵਰਗਿਆਂ ਨੂੰ ਕਿੰਤੂ ਪ੍ਰੰਤੂ ਕਰਨ ਦਾ ਮੌਕਾ ਨਹੀਂ ਦੇ ਰਹੇ ?

(ਅ) ਸ਼੍ਰੋਮਣੀ ਕਮੇਟੀ ਦੇ ਜਨਰਲ ਹਾਊਸ ਵੱਲੋਂ ਹੀ ਸਰਬ ਸੰਮਤੀ ਨਾਲ ਮਤਾ ਪਾਸ ਕਰ ਕੇ 2003 ਵਿੱਚ ਨਾਨਕਸ਼ਾਹੀ ਕੈਲੰਡਰ ਲਾਗੂ ਕੀਤਾ ਸੀ। ਅੱਜ ਤੁਹਾਡੇ ਸਮੇਤ ਮੱਸਿਆ ਪੂਰਨਮਾਸ਼ੀਆਂ ਸੰਗ੍ਰਾਂਦਾਂ ਨੂੰ ਸ਼ੁਭ ਦਿਹਾੜੇ ਦੱਸ ਕੇ ਮਨਾਉਣ ਵਾਲੇ ਸੰਤ ਸਮਾਜ ਅਤੇ ਸਿਰੇ ਦੀਆਂ ਮਨਮੱਤਾਂ ਕਰਨ ਵਾਲੇ ਦੋ ਤਖ਼ਤਾਂ ਦੇ ਪ੍ਰਬੰਧਕ ਜਿਹੜੇ ਕਿ ਸ਼੍ਰੋਮਣੀ ਕਮੇਟੀ ਅਤੇ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਨਾਮ ਦੀ ਦੁਰਵਰਤੋਂ ਕਰਦੇ ਹੋਏ ਸਾਨੂੰ ਉਨ੍ਹਾਂ ਦੇ ਗਲਤ ਫੈਸਲਿਆਂ ’ਤੇ ਵੀ ਕਿੰਤੂ ਪ੍ਰੰਤੂ ਨਾ ਕਰਨ ਦੀਆਂ ਸਲਾਹਾਂ ਦੇ ਰਹੇ ਹਨ; ਉਹ ਦੱਸਣ, ਕਿ ਉਨ੍ਹਾਂ ਨੇ ਉਸ ਨਾਨਕਸ਼ਾਹੀ ਕੈਲੰਡਰ ਨੂੰ ਮੰਨਿਆ ਕਿਉਂ ਨਹੀਂ ? ਕੀ ਤੁਸੀਂ ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੈਲੰਡਰ ’ਤੇ ਲਗਾਤਾਰ 7 ਸਾਲ ਕਿੰਤੂ ਪ੍ਰੰਤੂ ਨਹੀਂ ਕਰਦੇ ਰਹੇ ?

(ੲ) ਸਿੱਖ ਰਹਿਤ ਮਰਿਆਦਾ ਵੀ 1945 ਤੋਂ ਸ਼੍ਰੋਮਣੀ ਕਮੇਟੀ ਹੀ ਵੱਡੀ ਗਿਣਤੀ ਵਿੱਚ ਛਾਪ ਕੇ ਵੰਡ ਰਹੀ ਹੈ ਪਰ ਬਿਕ੍ਰਮੀ ਕੈਲੰਡਰ ਨੂੰ ਮਾਨਤਾ ਦੇਣ ਵਾਲੇ ਸੰਤ ਸਮਾਜ ਅਤੇ ਦੋਵੇਂ ਤਖ਼ਤਾਂ ਵਿੱਚੋਂ ਕੋਈ ਵੀ ਸਿੱਖ ਰਹਿਤ ਮਰਿਆਦਾ ਨੂੰ ਨਹੀਂ ਮੰਨ ਰਿਹਾ। ਹਾਂ ਜਿਸ ਦਿਨ ਸਿੱਖ ਰਹਿਤ ਮਰਿਆਦਾ ਦਾ ਵੀ ਨਾਨਕਸ਼ਾਹੀ ਕੈਲੰਡਰ ਵਾਙ ਭੋਗ ਪਾ ਦਿੱਤਾ ਉਸ ਦਿਨ ਜਰੂਰ ਗੁਰਮਤਿ ’ਤੇ ਪਹਿਰਾ ਦੇਣ ਵਾਲਿਆਂ ਦਾ ਮੂੰਹ ਬੰਦ ਕਰਵਾਉਣ ਲਈ ਸਾਰੇ ਹੀ ਸ਼੍ਰੋਮਣੀ ਕਮੇਟੀ ਅਤੇ ਅਕਾਲ ਤਖ਼ਤ ਸਾਹਿਬ ਦੇ ਨਾਮ ਦੀ ਦੁਰਵਰਤੋਂ ਕਰਨਗੇ; ਜਿਵੇਂ ਹੁਣ ਕੈਲੰਡਰ ਦੇ ਸਬੰਧ ਵਿੱਚ ਕੀਤੀ ਜਾ ਰਹੀ ਹੈ।

(ਸ) ਹੁਣ ਤਹਾਡੇ ਲਈ ਨਵਾਂ ਸਵਾਲ ਇਹ ਹੈ ਕਿ ਕੀ ਪੰਥਕ ਏਕਤਾ ਦਾ ਵਿਧਾਨ ਕੇਵਲ ਗੁਰਮਤਿ ਨੂੰ ਮੰਨਣ ਵਾਲਿਆਂ ’ਤੇ ਹੀ ਲਾਗੂ ਹੁੰਦਾ ਹੈ ? ਮਨਮਤਿ ਕਰਨ ਵਾਲਿਆਂ ਲਈ ਪੰਥਕ ਏਕਤਾ ਦਾ ਕੋਈ ਮਾਅਨਾ ਹੀ ਨਹੀਂ ਹੈ ?

3. ਤੁਸੀਂ ਲਿਖਿਆ ਹੈ“ਗੁਰਮਤ ਕਿਸੇ ਖ਼ਾਸ ਮਹੀਨੇ/ਦਿਨ/ਵਾਰ/ਥਿੱਤ ਨੂੰ ਬੁਰਾ ਨਹੀਂ ਮੰਨਦੀ। ਸਾਡੇ ਲਈ ਸਾਰੇ ਮਹੀਨੇ/ਦਿਨ/ਵਾਰ ਥਿੱਤਾਂ ਭਲੀਆਂ ਹਨ। ਗੁਰ ਸਿੱਖ ਲਈ ”ਮਾਹ ਦਿਵਸ ਮੂਰਤ ਭਲੇ….” ਹਨ ਕੋਈ ਮਾੜਾ ਨਹੀਂ।”

ਨਿਸ਼ਾਨ ਸਾਹਿਬ ਜੀ ! ਤੁਸੀਂ ਆਪਣੇ ਸੁਆਲ ਨੰਬਰ 27 ਦੇ ਘੇਰੇ ਵਿਚੋਂ ਜਰਾ ਬਾਹਰ ਨਿਕਲ ਕੇ; ਪੁੱਛੇ ਗਏ ਸਵਾਲਾਂ ਦਾ ਜਵਾਬ ਦੇਣ ਦਾ ਆਪਣਾ ਫਰਜ ਪੂਰਾ ਕਰਨ ਦੀ ਆਦਤ ਬਣਾ ਲਵੋ ਤਾਂ ਹੋ ਸਕਦਾ ਹੈ ਪਾਣੀ ਰਿੜਕਣ ਤੋਂ ਛੁਟਕਾਰਾ ਮਿਲ ਸਕੇ। ਸਵਾਲ ਤੁਹਾਥੋਂ ਇਹ ਪੁੱਛਿਆ ਗਿਆ ਸੀ ਕਿ ਜੇ ਸਾਡੇ ਲਈ ਸਾਰੇ ਮਹੀਨੇ/ਦਿਨ/ਵਾਰ/ ਥਿੱਤਾਂ/ਤਰੀਖਾਂ ਭਲੀਆਂ ਹਨ ਤਾਂ ਤੁਸੀਂ ਕੇਵਲ ਜੇਠ ਸੁਦੀ 4 ਅਤੇ ਕਤਕ ਸੁਦੀ 7 ਆਦਿਕ ਤਿਥਾਂ ਦਾ ਖਹਿੜਾ ਛੱਡ ਕੇ ਕਰਮਵਾਰ 2 ਹਾੜ ਅਤੇ 23 ਪੋਹ ਨੂੰ ਕਿਉਂ ਨਹੀਂ ਅਪਣਾਅ ਲੈਂਦੇ। ਜਰਾ ਦੱਸੋ ਤਾਂ ਸਹੀ ਕਿ ਗੁਰਪੁਰਬਾਂ ਦੀਆਂ ਸੂਰਜੀ ਤਰੀਖਾਂ ਨਿਰਧਾਰਤ ਕਰਨ ਨਾਲ ਗੁਰਮਤਿ ਅਤੇ ਸਿੱਖ ਇਤਿਹਾਸ ਨੂੰ ਕਿਹੜਾ ਨੁਕਸਾਨ ਪਹੁੰਚ ਜਾਵੇਗਾ ? ਤੁਸੀਂ ਇਨ੍ਹਾਂ ਸਾਧਾਰਨ ਸਵਾਲਾਂ ਦੇ ਸਪਸ਼ਟ ਰੂਪ ਵਿੱਚ ਜਵਾਬ ਦੇਣ ਦੀ ਥਾਂ ਪਿਛਲੇ 20 ਸਾਲਾਂ ਤੋਂ ਪਾਣੀ ਵਿੱਚ ਮਧਾਣੀ ਪਾ ਕੇ ਕੌਮ ਦੀ ਕਿਹੜੀ ਸੇਵਾ ਕਰ ਰਹੇ ਹੋ ?

4. ਤੁਸੀਂ ਲਿਖਿਆ ਹੈ ਕਿ “ਮੈਂ ਮਲ ਮਾਸ ਦੀ ਹੋਂਦ ਨੂੰ ਨਹੀਂ ਨਕਾਰਿਆ ਬਲਕਿ ਇਸ ਦਾ ਗੰਦੇ ਹੋਣ ਦੇ ਪੱਖ ਨੂੰ ਸਵੀਕਾਰ ਨਹੀਂ ਕੀਤਾ।” ਭਾਵ ਦੋਗਲੀ ਨੀਤੀ ਅਪਣਾਈ ਹੈ। ਤੁਸੀਂ ਇਸ ਦੇ ਇੱਕ ਪੱਖ ਨੂੰ ਤਾਂ ਨਕਾਰ ਰਹੋ ਹੋ ਪਰ ਫਿਰ ਵੀ ਇਸ ਨੂੰ ਛੱਡਣਾਂ ਨਹੀਂ ਚਾਹੁੰਦੇ। ਇਨ੍ਹਾਂ ਹਾਲਾਤਾਂ ਵਿੱਚ ਜੇ ਅਸੀਂ ਮਲ ਮਾਸ ਵਾਲੇ ਸਿਸਟਮ ਨੂੰ ਹੀ ਨਕਾਰਨ ਦੀ ਮੰਗ ਕਰਦੇ ਹਾਂ ਤਾਂ ਇਸ ਵਿੱਚ ਗਲਤ ਕੀ ਹੈ ? ਜੇ ਸੂਰਜੀ ਸਿਸਟਮ ਨੂੰ ਅਪਣਾਅ ਲਿਆ ਜਾਵੇ ਤਾਂ ਚੰਗੇ ਮੰਦੇ ਤਿੱਥ ਵਾਰਾਂ ਦੀ ਵੀਚਾਰ ਦਾ ਝਗੜਾ ਵੀ ਖਤਮ, ਗੁਰਪੁਰਬਾਂ ਦੀਆਂ ਤਰੀਖਾਂ ਅੱਗੇ ਪਿੱਛੇ ਆਉਣ ਦਾ ਝੰਜਟ ਵੀ ਖਤਮ ਅਤੇ ਕਦੀ 354/55 ਦਿਨ ਅਤੇ ਕਦੀ 383/84 ਦਿਨਾਂ ਪਿੱਛੋਂ ਆਉਣ ਦਾ ਝੰਜਟ ਵੀ ਖਤਮ ਹੋ ਕੇ ਹਰ ਦਿਹਾੜਾ 365/66 ਦਿਨਾਂ ਪਿਛੋਂ ਹੀ ਆਵੇਗਾ ਤਾਂ ਇਸ ਨਾਲ ਗੁਰਮਤਿ ਅਤੇ ਇਤਿਹਾਸ ਵਿੱਚ ਕਿਹੜਾ ਖ਼ਰਾਬਾ ਆ ਜਾਵੇਗਾ ਜਰਾ ਸੋਚ ਕੇ ਦੱਸਣ ਦੀ ਕ੍ਰਿਪਾਲਤਾ ਕਰਨੀ ਜੀ।

5. ਕਰਨਲ ਸਾਹਿਬ ਜੀ ! ਤੁਸੀਂ ਲਿਖਿਆ ਹੈ:“ਥਿੱਤਾਂ ਨੂੰ ਦਿਨਾਂ ਦੀ ਗਿਣਤੀ ਨਾਲ ਜੋੜ ਕੇ ਵੇਖਣਾ ਤੁਹਾਡੀ ਥਿੱਤਾਂ ਬਾਰੇ ਅਧੂਰੀ ਜਾਣਕਾਰੀ ਦਾ ਹੀ ਸਬੂਤ ਹੈ। ਕਿਰਪਾ ਕਰ ਕੇ ਜਿਸ ਸੀਡੀ ਬਾਰੇ ਤੁਸੀਂ ਜਾਣਕਾਰੀ ਮੰਗੀ ਹੈ ਉਸ ਦੇ ਕਰਤਾ ਦੀ ਕਿਤਾਬ ‘ਕੈਲੰਡ੍ਰੀਕਲ ਕੈਲਕੂਲੇਸ਼ਨਜ਼’ ਖਰੀਦ ਕੇ ਪੜ੍ਹੋ ਉਸ ਵਿਚ ਤੁਹਾਨੂੰ ਸੀਡੀ ਦਾ ਸਾਫਟਵੇਅਰ ਵੀ ਮਿਲ ਜਾਏਗਾ ਖੋਜ ਕਰ ਲੈਣੀ।”  

ਕਰਨਲ ਸਾਹਿਬ ਜੀ ! ਆਹ ਤਾਂ ਮੱਕੜੀ ਵਾਙ ਆਪਣੇ ਜਾਲ ਵਿੱਚ ਤੁਸੀਂ ਆਪ ਹੀ ਫਸਦੇ ਜਾ ਰਹੇ ਹੋ ! ਜੇ ਤੁਹਾਡੇ ਕਥਨ ਨੂੰ ਸੱਚ ਮੰਨ ਲਈਏ ਤਾਂ ਤੁਹਾਡੇ ਸੁਆਲ ਨੰ: 13 ਦਾ ਕੀ ਬਣੇਗਾ ਜਿਸ ਦੇ ਜਵਾਬ ਵਿੱਚ ਤੁਸੀਂ ਲਿਖ ਰਹੇ ਹੋ : “ਪੋਹ ਸੁਦੀ 7 ਦਾ ਮਤਲਬ ਹੈ ਕਿ ਇਹ ਚੰਦ੍ਰਮੀ ਪੋਹ ਮਹੀਨੇ ਦੀ ਮੱਸਿਆ ਤੋਂ ਬਾਅਦ 7ਵੀਂ ਤਿਥ ਹੈ।” ਹੁਣ ਦੱਸੋ, ਤੁਸੀਂ ਮੇਰੀ ਜਾਣਕਾਰੀ ਨੂੰ; ਅਧੂਰੀ ਦੱਸਣ ਨੂੰ ਤਰਜੀਹ ਦੇਵੋਗੇ ਜਾਂ ਤੁਸੀਂ ਆਪਣੇ ਸਵਾਲ ਨੰ: 13 ਦੇ ਜਵਾਬ ਨੂੰ ਗਲਤ ਮੰਨਣ ਦਾ ਹੌਸਲਾ ਵਿਖਾਉਂਦੇ ਹੋ ?

ਦੂਸਰੇ ਨੁਕਤੇ ਬਾਰੇ ਗੱਲ ਕਰੀਏ ਤਾਂ ਤੁਸੀਂ ਮੇਰੀ ਇਸ ਗੱਲ ਨਾਲ ਤਾਂ ਸਹਿਮਤ ਹੀ ਹੋਵੋਗੇ ਕਿ ਭਾਰਤੀ ਖਿੱਤੇ ਵਿੱਚ ਸੂਰਯ ਸਿਧਾਂਤ ਅਤੇ ਬਾਅਦ ਵਿੱਚ ਇਸ ਨੂੰ ਸੋਧ ਕੇ ਪ੍ਰਵਾਨ ਕੀਤੇ ਦ੍ਰਿਕ ਗਣਿਤ ਸਿਧਾਂਤ ’ਤੇ ਅਧਾਰਤ ਵੱਖ ਵੱਖ ਪ੍ਰਾਂਤਾਂ ਵਿੱਚ ਲਗਭਗ 30 ਕਿਸਮ ਦੇ ਬਿਕ੍ਰਮੀ ਕੈਲੰਡਰ ਹਨ। ਤੁਹਾਡੀ ਪੁਸਤਕ ਵਿੱਚ ਦਰਜ ਤਰੀਖਾਂ ਅਤੇ  ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੀਤੇ ਜਾ ਰਹੇ ਕੈਲੰਡਰਾਂ ਵਿੱਚ ਦਰਜ ਤਰੀਖਾਂ ਵਿੱਚ ਅੰਤਰ ਹੋਣ ਦਾ ਭਾਵ ਹੈ ਕਿ ਤੁਸੀਂ ਦੋਵੇਂ ਇੱਕ ਦੂਸਰੇ ਤੋਂ ਵੱਖਰੇ ਨਿਯਮਾਂ ਵਾਲੇ ਕੈਲੰਡਰਾਂ ਦੇ ਧਾਰਨੀ ਹੋ। ਇਸੇ ਕਾਰਨ ਤੁਹਾਡੇ ਦੁਆਰਾ ਅਪਣਾਏ ਜਾ ਰਹੇ ਕੈਲੰਡਰ ਦੇ ਨਿਯਮਾਂ ਤੇ ਸੀਡੀ ਬਾਰੇ ਜਾਣਕਾਰੀ ਮੰਗੀ ਸੀ ਪਰ ਤੁਸੀਂ ਆਪਣੇ ਵੱਲੋਂ ਜਵਾਬ ਦੇਣ ਦੀ ਥਾਂ ਉਸ ਦੇ ਕਰਤਾ ਦੀ ਕਿਤਾਬ ਖਰੀਦ ਕੇ ਪੜ੍ਹਨ ਦੀ ਹਿਦਾਇਤ ਕਰ ਦਿੱਤੀ ! ਤੁਸੀਂ ਲਿਖਿਆ ਹੈ : “ਮੈਨੂੰ ਆਪਣੀਆਂ ਕੈਲਕੂਲੇਸ਼ਨਜ਼ ਤੇ ਭਰੋਸਾ ਹੈ।”  ਨਿਸ਼ਾਨ ਸਾਹਿਬ ਜੀ ! ਅਸੀਂ ਤੁਹਾਡੇ ਭਰੋਸੇ ’ਤੇ ਸ਼ੱਕ ਕੀਤਾ ਹੀ ਨਹੀਂ। ਬੇਨਤੀ ਇਹੋ ਕੀਤੀ ਗਈ ਸੀ ਕਿ ਤੁਸੀਂ ਆਪਣੇ ਭਰੋਸੇ ’ਤੇ ਕਾਇਮ ਰਹਿੰਦੇ ਹੋਏ ਦੱਸੋ ਕਿ ਤੁਸੀਂ ਕੈਲਕੂਲੇਸ਼ਨਾਂ ਸੂਰਯ ਸਿਧਾਂਤ ਅਨੁਸਾਰ ਕਰਦੇ ਹੋ ਜਾਂ ਦ੍ਰਿਕ ਗਣਿਤ ਸਿਧਾਂਤ ਮੁਤਾਬਿਕ। ਕੈਲਕੂਲੇਸ਼ਨਾਂ ਕਰ ਕੇ ਇਹ ਵੀ ਦੱਸੋ ਕਿ ਆਉਣ ਵਾਲੇ ਕਿਹੜੇ ਕਿਹੜੇ ਸਾਲਾਂ ਵਿੱਚ ਪੋਹ ਦਾ ਮਹੀਨਾ ਨਹੀਂ ਹੋਵੇਗਾ ? ਕੀ ਤੁਸੀਂ ਪੁੱਛੇ ਗਏ ਸਵਾਲਾਂ ਦੇ ਜਵਾਬ ਦੇਣ ਤੋਂ ਟਾਲ਼ਾ ਵੱਟ ਕੇ ਆਪਣੇ ਭਰੋਸੇ ਨੂੰ ਕਮਜੋਰ ਨਹੀਂ ਕਰ ਰਹੇ ?

6. ਮੇਰੇ ਇਸ ਸਵਾਲ : “ਪਿਛਲੇ ਸਾਲ ਗੁਰੂ ਹਰਿ ਕ੍ਰਿਸ਼ਨ ਜੀ ਮਹਾਰਾਜ ਦੇ ਜੋਤੀ ਜੋਤਿ ਸਮਾਉਣ ਅਤੇ ਗੁਰੂ ਤੇਗ ਬਹਾਦਰ ਜੀ ਦੇ ਗੁਰਗੱਦੀ ਦਿਵਸ ਨੂੰ ਸ਼੍ਰੋਮਣੀ ਕਮੇਟੀ ਨੇ 10 ਅਪ੍ਰੈਲ ਨੂੰ ਸੋਮਵਾਰ ਦਿਖਾਇਆ ਹੈ ਅਤੇ ਤੁਹਾਡੇ ”ਗੁਰਪੁਰਬ ਦਰਪਣ” ਦਾ ਪੰਨਾ ਨੰਬਰ 84 ਪੜ੍ਹ ਕੇ ਵੇਖਿਆ ਤਾ ਉਸ ਵਿੱਚ ਐਤਵਾਰ ਲਿਖਿਆ ਹੈ ਇਹ ਇੱਕ ਦਿਨ ਦਾ ਫਰਕ ਕਿਉਂ ?” ਦੇ ਜਵਾਬ ਵਿੱਚ ਤੁਸੀਂ ਲਿਖਿਆ ਹੈ: “ਇਹ ਤੁਸੀਂ ਜਾਣ ਬੁੱਝ ਕੇ ਭੰਬਲਭੂਸਾ ਪੈਦਾ ਨਹੀਂ ਕਰ ਰਹੇ। ਗੁਰਪੁਰਬ ਦਰਪਣ ਵਿਚ ਤਾਂ ਸੋਮਵਾਰ ਹੀ ਲਿਖਿਆ ਹੈ ਤੁਸੀਂ ਐਤਵਾਰ ਕਿੱਥੋਂ ਪੜ੍ਹ ਲਿਆ ?”

ਤੁਹਾਡਾ ਇਹ ਜਵਾਬ ਪੜ੍ਹ ਕੇ ਮੈਨੂੰ ਜਾਪਿਆ ਕਿ ਸਾਡੇ ਦੋਵਾਂ ਵਿੱਚੋਂ ਕਿਸੇ ਇੱਕ ਦੀ ਐਨਕ ਦੇ ਸੀਸ਼ੇ ਬਹੁਤ ਧੁੰਦਲੇ ਹੋ ਚੁੱਕੇ ਹਨ। ਇਸ ਦਾ ਸਹੀ ਜਵਾਬ ਆਪਣੇ ਦੋਵਾਂ ਦੀ ਬਜਾਏ ਜੇ ਸੰਗਤ ’ਤੇ ਛੱਡ ਦਿੱਤਾ ਜਾਵੇ ਤਾਂ ਜਿਆਦਾ ਚੰਗਾ ਰਹੇਗਾ ਇਸ ਲਈ ਮੈਂ ਤੁਹਾਡੀ ਪੁਸਤਕ ਦੇ ਪੰਨਾਂ ਨੰ: 84 ਅਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਸੰਮਤ 549 ਦੇ ਚੇਤ ਅਤੇ ਹਾੜ ਮਹੀਨੇ ਦੀ ਫੋਟੋ ਕਾਪੀ ਸੰਗਤ ਦੀ ਕਚਹਿਰੀ ਵਿੱਚ ਪੇਸ਼ ਕਰ ਰਿਹਾ ਹਾਂ।

ਜਿਸ ਬਾਰੇ ਸੰਗਤ ਫੈਸਲਾ ਕਰੇਗੀ ਮੈਨੂੰ ਤਾਂ ਉਹ ਮਨਜੂਰ ਹੋਵੇਗਾ ਪਰ ਆਪ ਜੀ ਨੂੰ ਬੇਨਤੀ ਹੈ ਕਿ ਆਪਣੀਆਂ ਐਨਕਾਂ ਦੇ ਸੀਸ਼ੇ ਜਰਾ ਸਾਫ ਕਰ ਕੇ ਵੇਖ ਲੈਣਾ ਕਿ ਤੁਸੀਂ ਸੋਮਵਾਰ ਕਿੱਥੋਂ ਪੜ੍ਹ ਲਿਆ ? ਅਤੇ ਫਜੂਲ ਦੀਆਂ ਤੂਹਮਤਾਂ ਲਾ ਕੇ ਸੰਗਤਾਂ ਵਿੱਚ ਦੁਬਿਧਾ ਕੌਣ ਪੈਦਾ ਕਰ ਰਿਹਾ ਹੈ ? ਇਹ ਵੀ ਦੱਸਣ ਦੀ ਕ੍ਰਿਪਾਲਤਾ ਕਰਨੀ ਕਿ ਇਸ ਦੇ ਨਾਲ ਹੀ ਮੈ ਗੁਰੂ ਅਮਰਦਾਸ ਜੀ ਦੇ ਗੁਰਗੱਦੀ ਦਿਵਸ ਅਤੇ ਹਾੜ ਮਹੀਨੇ ਦੀ ਸੰਗਰਾਂਦ ਵਿੱਚ ਇੱਕ ਇੱਕ ਦਿਨ ਦੇ ਫਰਕ ਬਾਰੇ ਵੀ ਸਵਾਲ ਪੁੱਛਿਆ ਸੀ। ਇਸ ਲਈ ਬੇਨਤੀ ਹੈ ਕਿ ਜਰੂਰ ਦੱਸਿਆ ਜਾਵੇ ਕਿ ਇਨ੍ਹਾਂ ਸਵਾਲਾਂ ਨੂੰ ਨਜਰਅੰਦਾਜ ਕਰਨ ਦਾ ਕਾਰਨ ਤੁਹਾਡੀ ਐਨਕ ਵਿੱਚ ਵੱਧ ਧੁੰਦਲਾਪਣ ਆਉਣ ਕਰ ਕੇ ਤੁਹਾਨੂੰ ਇਹ ਦਿੱਸੇ ਨਹੀਂ ਜਾਂ ਤੁਹਾਡੀ ਆਦਤ ਹੀ ਪੁੱਛੇ ਗਏ ਸਵਾਲਾਂ ਦੇ ਸਹੀ ਜਵਾਬ ਦੇਣ ਤੋਂ ਜਾਣ ਬੁੱਝ ਕੇ ਟਾਲ਼ਾ ਵੱਟ ਕੇ ਇਨ੍ਹਾਂ ਨੂੰ ਮਿੱਟੀ ਘੱਟੇ ਰੋਲ ਦੇਣ ਦੀ ਹੈ।

7. ਤੁਸੀਂ ਲਿਖਿਆ ਹੈ:- “ਤੁਸੀਂ ਪੁਰੇਵਾਲ ਵੱਲੋਂ ਬਣਾਏ ਜਿਹੜੇ ਸੂਰਜੀ ਕੈਲੰਡਰ ਦੀ ਹਮਾਇਤ ਕਰ ਰਹੇ ਹੋ ਅਤੇ ਜਿਸ ਨੂੰ ਪੰਥ ਉੱਤੇ ਥੋਪਣ ਦਾ ਪ੍ਰਚਾਰ ਹੋ ਰਿਹਾ ਹੈ ਉਸ ਦੀਆਂ ਸਾਰੀਆਂ ਹੀ ਸੂਰਜੀ ਤਾਰੀਖ਼ਾਂ ਗਲਤ ਹਨ; ਕਦੀ ਉਨ੍ਹਾਂ ਤਾਰੀਖ਼ਾਂ ਵਲ ਝਾਤੀ ਮਾਰੀ ਹੈ। ਮਿਸਾਲ ਦੇ ਤੌਰ ਤੇ ਗੁਰੂ ਅਰਜਨ ਦੇਵ ਜੀ ਮਹਾਰਾਜ ਦਾ ਸ਼ਹੀਦੀ ਦਿਹਾੜਾ ਹੀ ਲੈ ਲਵੋ। ਸ਼ਹੀਦੀ ਵਾਲੇ ਦਿਨ ਜੇਠ ਸੁਦੀ 4, 2 ਹਾੜ ਬਿਕਰਮੀ ਸੰਮਤ 1663 ਮੁਤਾਬਿਕ 30-5-1606 (ਜੂਲੀਅਨ) ਅਤੇ 9-6-1606 (ਗਰੀਗੋਰੀਅਨ) ਸੀ। ਜਿਸ ਨੂੰ ਪੁਰੇਵਾਲ ਵਾਲੇ ਕੈਲੰਡਰ ਨੇ 2 ਹਾੜ ਮੁਤਾਬਿਕ 16 ਜੂਨ ਬਣਾ ਦਿੱਤਾ ਹੈ। ਸਿੱਧਾ ਹੀ ਇਤਿਹਾਸ ਨਾਲੋਂ 7 ਦਿਨਾਂ ਦਾ ਫ਼ਰਕ ਹੈ। ਕੀ ਸ਼ਹੀਦੀ ਵਾਲੇ ਦਿਨ ਤੁਹਾਡੇ ਸੂਰਜੀ ਕੈਲੰਡਰ ਦੀ 2 ਹਾੜ ਬਣਦੀ ਹੈ ? ਅਸਲ ਵਿਚ ਉਸ ਨੇ ਸ਼ਹੀਦੀ ਦਿਨ ਵਾਲੀ ਤਾਰੀਖ਼ ਕੱਢੀ ਹੀ ਨਹੀਂ ਅਤੇ ਮਨ ਮਰਜ਼ੀ ਦੀ 2 ਹਾੜ ਮੁਤਾਬਿਕ 16 ਜੂਨ ਨੂੰ ਸ਼ਹੀਦੀ ਦਿਨ ਮਿੱਥ ਲਿਆ। ਇਸੇ ਤਰ੍ਹਾਂ ਬਾਕੀ ਸਾਰੇ ਗੁਰਪੁਰਬਾਂ ਦੀਆਂ ਤਾਰੀਖ਼ਾਂ ਮਿੱਥ ਕੇ ਇਤਿਹਾਸ ਨਾਲ ਖਿਲਵਾੜ ਕੀਤਾ ਹੈ।”

ਵਾਹ ਜੀ ! ਵਾਹ ! ਨਿਸ਼ਾਨ ਸਾਹਿਬ! ਤੁਸੀਂ ਤਾਂ ਕੈਲੰਡਰ ਵਿਗਿਆਨ ਦੇ ਮਾਹਰ ਹੋਣ ਦਾ ਸਬੂਤ ਦੇਣ ਦੀ ਥਾਂ ਅੰਗਰੇਜਾਂ ਤੇ ਬਿਪਰਵਾਦ ਦੀ ਗੁਲਾਮੀ ਦਾ ਸਬੂਤ ਦੇ ਰਹੇ ਹੋ ? ਅੰਗਰੇਜਾਂ ਦੀ ਮਾਨਸਿਕ ਤੌਰ ’ਤੇ ਗੁਲਾਮੀ ਕਬੂਲਨ ਸਦਕਾ ਤੁਸੀਂ 2 ਹਾੜ  ਵਾਲੇ ਦਿਨ 30 ਮਈ 1606 ਨੂੰ 9 ਜੂਨ 1606 ਹੋਣਾ ਤਾਂ ਮੰਨ ਲਿਆ ਪਰ ਬਿਪਰਵਾਦ ਦੀ ਗੁਲਾਮੀ ਸਦਕਾ 2 ਹਾੜ ਨੂੰ 16 ਜੂਨ 1999 ਮੰਨਣ ਤੋਂ ਇਨਕਾਰੀ ਹੋ ਕੇ ਆਪਣੇ ਆਪ ਨੂੰ ਕੈਲੰਡਰ ਸੋਧ ਦੇ ਨਿਯਮਾਂ ਤੋਂ ਬਿਲਕੁਲ ਕੋਰੇ ਹੋਣ ਦਾ ਮੁਜ਼ਾਹਰਾ ਕਰ ਰਹੇ ਹੋ ? ਮੇਰੇ ਸਮੇਤ ਬਹੁਤ ਸਾਰਿਆਂ ਦਾ ਇਹ ਯਕੀਨ ਪੱਕਾ ਹੋ ਗਿਆ ਕਿ ਤੁਹਾਨੂੰ ਤਾਂ ਇਤਨਾ ਵੀ ਨਹੀਂ ਪਤਾ ਕਿ ਇੰਗਲੈਂਡ ਸਰਕਾਰ ਨੇ ਗ੍ਰੈਗੋਰੀਅਨ ਕੈਲੰਡਰ 2 ਸਤੰਬਰ 1752 ਨੂੰ ਲਾਗੂ ਕੀਤਾ ਸੀ ਜਿਸ ਕਾਰਨ 3 ਸਤੰਬਰ ਨੂੰ ਸਿੱਧਾ ਹੀ 14 ਸਤੰਬਰ ਐਲਾਨ ਦਿੱਤਾ ਸੀ। ਇਸੇ ਕਾਰਨ 2 ਸਤੰਬਰ 1752 ਤੋਂ ਬਾਅਦ ਦੀਆਂ ਤਰੀਖਾਂ ਗ੍ਰੈਗੋਰੀਅਨ ਕੈਲੰਡਰ ਦੇ ਨਿਯਮਾਂ ਅਨੁਸਾਰ ਕੈਲਕੂਲੇਟ ਕੀਤੀਆਂ ਜਾਂਦੀਆਂ ਹਨ ਅਤੇ ਇਸ ਤਰੀਖ ਤੋਂ ਪਹਿਲਾਂ ਦੀਆਂ ਤਰੀਖਾਂ ਜੂਲੀਅਨ ਕੈਲੰਡਰ ਦੇ ਨਿਯਮਾਂ ਮੁਤਾਬਿਕ। ਇਹੋ ਕਾਰਨ ਹੈ ਕਿ ਹੁਣ ਤੱਕ ਕਿਸੇ ਵੀ ਇਤਿਹਾਸਕਾਰ ਨੇ ਕਦੀ ਵੀ ਗੁਰੂ ਅਰਜਨ ਸਾਹਿਬ ਜੀ ਦੀ ਸ਼ਹੀਦੀ 9 ਜੂਨ ਅਤੇ ਗੁਰੂ ਗੋਬਿੰਦ ਸਿੰਘ ਜੀ ਦਾ ਪ੍ਰਕਾਸ਼ ਦਿਹਾੜਾ 1 ਜਨਵਰੀ ਨਹੀਂ ਲਿਖਿਆ। ਜੇ ਤੁਸੀਂ ਕੈਲੰਡਰ ਸੋਧ ਦੇ ਨਿਯਮਾਂ ਤੋਂ ਜਾਣੂ ਹੁੰਦੇ ਤਾਂ ਅਜਿਹੇ ਹਾਸੋਹੀਣੇ ਸਵਾਲ ਕਦੀ ਨਾ ਕਰਦੇ!

ਨਿਸ਼ਾਨ ਸਾਹਿਬ ਜੀ ਨਾਨਕਸ਼ਾਹੀ ਕੈਲੰਡਰ 1 ਵੈਸਾਖ 1999 ਨੂੰ ਲਾਗੂ ਹੋਣ ਕਾਰਨ ਉਸ ਸਾਲ 1 ਵੈਸਾਖ 14 ਅਪ੍ਰੈਲ ਨਿਸਚਿਤ ਕਰ ਦਿੱਤਾ। ਬਿਕ੍ਰਮੀ ਕੈਲੰਡਰ ਦੇ ਮਹੀਨਿਆਂ ਦੇ ਦਿਨਾਂ ਦੀ ਗਿਣਤੀ ਤਾਂ ਹਰ ਸਾਲ ਹੀ ਬਦਲਦੀ ਰਹਿੰਦੀ ਹੈ ਇਹੋ ਕਾਰਨ ਹੈ ਕਿ ਕਦੀ ਤਾਂ ਵੈਸਾਖੀ 13 ਅਪ੍ਰੈਲ ਨੂੰ ਆ ਜਾਂਦੀ ਹੈ ਅਤੇ ਕਦੀ 14 ਅਪ੍ਰੈਲ ਨੂੰ। 23 ਪੋਹ ਕਦੀ 6 ਜਨਵਰੀ ਨੂੰ ਆਉਂਦਾ ਹੈ ਅਤੇ ਕਦੀ 7 ਜਨਵਰੀ ਨੂੰ। ਇਸ  ਤਰ੍ਹਾਂ ਬਾਕੀ ਦੇ ਸਾਰੇ ਦਿਹਾੜੇ ਅੱਗੇ ਪਿੱਛੇ ਆਉਂਦੇ ਰਹਿੰਦੇ ਹਨ। ਇਸੇ ਅੱਗੇ ਪਿੱਛੜ ਤੋਂ ਛੁਟਕਾਰਾ ਪਾਉਣ ਲਈ ਬਿਪਰਵਾਦ ਦੀਆਂ ਰਾਸ਼ੀਆਂ ਤੋਂ ਛੁਟਕਾਰਾ ਪਾ ਕੇ ਸਾਲ ਦੇ ਪਹਿਲੇ ਪੰਜ ਮਹੀਨੇ ਚੇਤ, ਵੈਸਾਖ, ਜੇਠ ਹਾੜ, ਸਾਵਣ 31-31 ਦਿਨਾਂ ਦੇ ਅਤੇ ਅਖਰੀਲੇ 7 ਮਹੀਨੇ 30-30 ਦਿਨਾਂ ਦੇ ਨਿਸਚਿਤ ਕਰ ਦਿੱਤੇ ਤੇ ਲੀਪ ਵਾਲੇ ਸਾਲ ਵਿੱਚ ਅਖੀਰਲਾ ਮਹੀਨਾ ਫੱਗਣ 31 ਦਿਨ ਦਾ ਹੋ ਜਾਂਦਾ ਹੈ। ਇਹ ਫਾਰਮੂਲਾ ਤੈਅ ਕਰਨ ਉਪ੍ਰੰਤ ਵੈਸਾਖ ਤੋਂ ਬਾਅਦ ਆਉਣ ਵਾਲੇ ਹਰ ਇਕ ਮਹੀਨੇ ਦੇ ਦਿਨ ਗਿਣਨ ਪਿੱਛੋਂ ਅਗਲੇ ਹਰ ਮਹੀਨੇ ਦਾ ਅਰੰਭ ਹੋਣ ਦੀ ਤਰੀਖ ਨਿਸਚਿਤ ਹੋ ਗਈ ਜਿਸ ਮੁਤਾਬਿਕ ਨਵਾਂ ਸਾਲ 1 ਚੇਤ- 14 ਮਾਰਚ,  ਵੈਸਾਖੀ (1 ਵੈਸਾਖ)- 14 ਅਪ੍ਰੈਲ, ਗੁਰੂ ਅਰਜਨ ਸਾਹਿਬ ਜੀ ਦਾ ਸ਼ਹੀਦੀ ਦਿਹਾੜਾ 2 ਹਾੜ- 16 ਜੂਨ, ਗੁਰੂ ਗੋਬਿੰਦ ਸਿੰਘ ਜੀ ਦਾ ਪ੍ਰਕਾਸ਼ ਦਿਹਾੜਾ 23 ਪੋਹ- 5 ਜਨਵਰੀ ਨੂੰ ਆਏ ਤੇ ਸਾਲ ਦੀ ਲੰਬਾਈ ਬਿਲਕੁਲ ਸਾਂਝੇ ਸਾਲ ਦੇ ਬਰਾਬਰ ਰੱਖਣ ਕਾਰਨ ਅੱਗੇ ਤੋਂ ਸਾਰੇ ਦਿਹਾੜੇ ਬਿਲਕੁਲ ਉਨ੍ਹਾਂ ਤਰੀਖਾਂ ਨੂੰ ਹੀ ਆਉਣ ਲੱਗ ਪਏ ਜਿਨ੍ਹਾਂ ਤਰੀਖਾਂ ਨੂੰ 1999 ਵਿੱਚ ਆਏ ਸਨ। ਬਿਕ੍ਰਮੀ ਕੈਲੰਡਰ ਵਾਲਾ ਜਿਹੜਾ 2 ਹਾੜ  1606 ਵਿੱਚ 30 ਮਈ ਨੂੰ ਆਇਆ ਸੀ ਉਹ ਤੁਹਾਨੂੰ 1999 ਵਿੱਚ 16 ਜੂਨ ਆਇਆ ਪ੍ਰਵਾਨ ਹੈ ਪਰ ਜੇ 1999 ਵਿੱਚ ਸ: ਪਾਲ ਸਿੰਘ ਪੁਰੇਵਾਲ ਨੇ ਇਸ 2 ਹਾੜ ਨੂੰ ਐਸਾ ਸਿੰਕਰੋਨਾਈਜ਼ ਕੀਤਾ ਕਿ ਅੱਗੇ ਤੋਂ ਹਮੇਸ਼ਾਂ ਹਮੇਸ਼ਾਂ ਲਈ ਇਹ 16 ਜੂਨ ਨੂੰ ਹੀ ਆਉਂਦਾ ਰਹੇਗਾ ਉਸ ਦੇ ਪ੍ਰਵਾਨ ਕਰਨ ਵਿੱਚ ਤੁਹਾਨੂੰ ਕੀ ਤਕਲੀਫ ਹੈ ? ਇਹ ਸਮਝ ਤੋਂ ਬਾਹਰ ਹੈ। ਇਸ ਤਰ੍ਹਾਂ ਦੀ ਬਣਤਰ ਵਾਲਾ ਨਾਨਕਸ਼ਾਹੀ ਕੈਲੰਡਰ ਆਮ ਮਨੁੱਖ ਦੇ ਆਸਾਨੀ ਨਾਲ ਸਮਝ ਵਿੱਚ ਆ ਜਾਂਦਾ ਹੈ ਜਦੋਂ ਕਿ ਬਿਕ੍ਰਮੀ ਕੈਲੰਡਰ ਦਾ ਗੋਰਖ ਧੰਦਾ ਇਸ ਤਰ੍ਹਾਂ ਦਾ ਹੈ ਜਿਸ ਵਿੱਚ ਫਸੇ ਤੁਹਾਡੇ ਵਰਗੇ ਵਿਦਵਾਨ ਨੂੰ ਵੀ ਨਹੀਂ ਪਤਾ ਲਗਦਾ ਕਿ ਤੁਸੀਂ ਆਪਣੀ ਹੀ ਪੁਸਤਕ ਵਿੱਚ 10 ਅਪ੍ਰੈਲ 2017 ਨੂੰ ਦਿਨ ਐਤਵਾਰ ਲਿਖਿਆ ਹੈ ਜਾਂ ਸੋਮਵਾਰ। ਸੱਚ-ਮੁੱਚ ਤੁਹਾਡੀ ਹਾਲਤ ਇੱਦਾਂ ਜਾਪਦੀ ਹੈ ਜਿਸ ਦਾ ਬਿਆਨ ਕਬੀਰ ਸਾਹਿਬ ਜੀ ਨੇ ਆਪਣੇ ਇਨ੍ਹਾਂ ਪਾਵਨ ਬਚਨਾਂ ਰਾਹੀਂ ਕੀਤਾ ਹੈ: (ਜਨੇਊ ਆਦਿਕ ਦੇ ਕੇ ਤੇ ਚੰਗੇ ਮੰਦੇ ਤਿੱਥ ਵਾਰਾਂ ਵਾਲੇ ਕਰਮ-ਕਾਂਡ ਦਾ ਰਾਹ ਦੱਸ ਕੇ) ਬ੍ਰਾਹਮਣ ਸਿਰਫ਼ ਦੁਨੀਆਦਾਰਾਂ ਦਾ ਹੀ ਗੁਰੂ ਅਖਵਾ ਸਕਦਾ ਹੈ, ਭਗਤੀ ਕਰਨ ਵਾਲਿਆਂ ਦਾ ਉਪਦੇਸ਼-ਦਾਤਾ ਬ੍ਰਾਹਮਣ ਗੁਰੂ ਨਹੀਂ ਬਣ ਸਕਦਾ, ਕਿਉਂਕਿ ਇਹ ਤਾਂ ਆਪ ਹੀ ਚਹੁੰਆਂ ਵੇਦਾਂ ਦੀ ਵੀਚਾਰ ਵਾਲੀਆਂ ਕਰਮ-ਕਾਂਡ ਦੀਆਂ ਉਲਝਣਾਂ ਨੂੰ ਸੋਚ ਸੋਚ ਕੇ ਇਹਨਾਂ ਵਿਚ ਹੀ ਖਪ ਖਪ ਕੇ ਆਤਮਕ ਮੌਤ ਮਰ ਚੁੱਕਾ ਹੈ । ਜਥਾ : “ਕਬੀਰ ! ਬਾਮਨੁ, ਗੁਰੂ ਹੈ ਜਗਤ ਕਾ ; ਭਗਤਨ ਕਾ ਗੁਰੁ ਨਾਹਿ ॥ ਅਰਝਿ ਉਰਝਿ ਕੈ ਪਚਿ ਮੂਆ ; ਚਾਰਉ ਬੇਦਹੁ ਮਾਹਿ ॥” (੧੩੭੭) ਜਿਸ ਤਰ੍ਹਾਂ ਬ੍ਰਾਹਮਣ ਵੇਦਾਂ ਦੇ ਗਿਆਨ ਦੇ ਭਾਰ ਹੇਠ ਹੀ ਦਬਿਆ ਰਿਹਾ ਬਿਲਕੁਲ ਉਸੇ ਤਰ੍ਹਾਂ ਤੁਸੀਂ ਕੈਲੰਡਰ ਦੇ ਆਪਣੇ ਘੜੇ ਗਿਆਨ ਦੇ ਭਾਰ ਥੱਲੇ ਹੀ ਦੱਬੇ ਪਏ ਹੋ; ਸੋ ਪ੍ਰਭੂ ਅੱਗੇ ਅਰਦਾਸ ਕਰੋ ਕਿ ਤੁਹਾਡਾ ਇਸ ਗਿਆਨ ਰੂਪੀ ਭਾਰ ਤੋਂ ਛੁਟਕਾਰਾ ਹੋ ਜਾਵੇ।

8. ਤੁਸੀਂ ਲਿਖਿਆ ਹੈ: “ਕਿਰਪਾ ਕਰ ਕੇ ਕੈਲੰਡਰ ਸਬੰਧੀ ਅਧੂਰੀ ਜਾਣਕਾਰੀ ਨਾਲ ਸੰਗਤਾਂ ਵਿਚ ਭੰਬਲਭੂਸਾ ਪੈਦਾ ਨਾ ਕਰੋ।” ਨਿਸ਼ਾਨ ਸਾਹਿਬ ਜੀ ! ਮੈਂ ਤਾਂ ਕਦੀ ਕੈਲੰਡਰ ਦਾ ਮਾਹਰ ਹੋਣ ਦਾ ਦਾਅਵਾ ਹੀ ਨਹੀਂ ਕੀਤਾ। ਮੈਂ ਤਾਂ ਇਹੋ ਬੇਨਤੀ ਕੀਤੀ ਸੀ ਕਿ ਮੈਂ ਸਿਰਫ ਤੁਹਾਡੀ ਪੁਸਤਕ ਵਿੱਚ ਦਰਜ ਤਰੀਖਾਂ ਅਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੀਤੇ ਵੱਖ ਵੱਖ ਸਾਲਾਂ ਦੇ ਕੈਲੰਡਰਾਂ ਵਿੱਚ ਦਰਜ ਤਰੀਖਾਂ ਨੂੰ ਕੰਪੇਅਰ ਕਰਕੇ ਵੇਖਿਆ ਤਾਂ ਪਤਾ ਲੱਗਾ ਕਿ ਦੋਵਾਂ ਦੀਆਂ ਕੁਝ ਤਰੀਖਾਂ ਵਿੱਚ ਅੰਤਰ ਹੈ। ਦੋਵੇਂ ਤਾਂ ਠੀਕ ਹੋ ਨਹੀਂ ਸਕਦੀਆਂ ਇਸ ਲਈ ਦੋਵਾਂ ਵਿੱਚੋਂ ਇੱਕ ਦੀਆਂ ਤਰੀਖਾਂ ਤਾਂ ਗਲਤ ਹੋਣਗੀਆਂ ਹੀ। ਇਸ ਕਾਰਨ ਆਪਣੀਆਂ ਕੈਲੂਲੇਸ਼ਨਾਂ ’ਤੇ ਭਰੋਸਾ ਰੱਖ ਕੇ ਦੱਸਿਆ ਜਾਵੇ ਕਿ ਦੋਨਾਂ ਵਿੱਚੋਂ ਕਿਹੜੀਆਂ ਠੀਕ ਹਨ ਅਤੇ ਕਿਹੜੀਆਂ ਗਲਤ ? ਪਰ ਤੁਸੀਂ ਸਹੀ ਜਵਾਬ ਦੇਣ ਦੀ ਥਾਂ ਪਿਛਲੇ ਸਵਾ ਮਹੀਨੇ ਤੋਂ ਐਸੀ ਪਾਣੀ ਵਿੱਚ ਮਧਾਣੀ ਪਾਈ ਹੋਈ ਹੈ ਕਿ ਆਪਣਾ ਭਰੋਸਾ ਆਪ ਹੀ ਗਵਾਉਣ ਦੇ ਰਾਹ ਪਏ ਹੋਏ ਹੋ।

9. ਤੁਸੀਂ ਲਿਖਿਆ ਹੈ“ ਮੈਂ ਇਹ ਸਮਝਦਾ ਹਾਂ ਕਿ ਕੈਲੰਡਰ ਸਬੰਧੀ ਸੰਗਤਾਂ ਵਿਚ ਪਾਏ ਜਾ ਰਹੇ ਭਰਮ ਭੁਲੇਖਿਆਂ ਨੂੰ ਦੂਰ ਕਰਨ ਲਈ ਸ੍ਰੀ ਅਕਾਲ ਤਖ਼ਤ ਵੱਲੋਂ ਪਿਛਲੇ ਸਾਲ ਜੋ ਪਹਿਲ ਇੱਕ ਪੰਥਕ ਕਮੇਟੀ ਸਥਾਪਤ ਕਰਨ ਲਈ ਕੀਤੀ ਗਈ ਸੀ ਉਸ ਕਮੇਟੀ ਦੀ ਮੀਟਿੰਗ ਜਲਦੀ ਤੋਂ ਜਲਦੀ ਬੁਲਾਈ ਜਾਏ ਤਾਂ ਕਿ ਅਗਲੇ ਸਾਲ ਦਾ ਕੈਲੰਡਰ ਛਾਪਣ ਤੱਕ ਇੱਕ ਦੋ ਟੁੱਕ ਫ਼ੈਸਲਾ ਹੋ ਜਾਏ।” 

ਨਿਸ਼ਾਨ ਸਾਹਿਬ ਜੀ! ਪਹਿਲੇ ਨੰਬਰ ’ਤੇ ਅਸੀਂ ਤੁਹਾਨੂੰ ‘ਦੇਰ ਆਏ, ਦਰੁਸਸਤ ਆਏ’ ਦੀ ਮੁਬਾਰਕਵਾਦ ਦਿੰਦੇ ਹਾਂ ਕਿ ਅਗਲਾ ਕੈਲੰਡਰ ਛਾਪਣ ਤੋਂ ਪਹਿਲਾਂ ਤੁਸੀਂ ਅਕਾਲ ਤਖ਼ਤ ਵੱਲੋਂ ਪੰਥਕ ਕਮੇਟੀ ਦੀ ਮੀਟਿੰਗ ਸੱਦ ਕੇ ‘ਦੋ ਟੁੱਕ ਫ਼ੈਸਲਾ ਕਰਨ ਦੀ ਮੰਗ ਕਰ ਦਿੱਤੀ ਹੈ।

ਦੂਸਰੇ ਨੰਬਰ ’ਤੇ ਅਸੀਂ ਸਮਝਦੇ ਹਾਂ ਕਿ ਕਮੇਟੀ ਵਿੱਚ ਜੋ ਨਾਮ ਐਲਾਨੇ ਗਏ ਸਨ ਉਹ ਹੀ ਗਲਤ ਹਨ ਕਿਉਂਕਿ ਉਨ੍ਹਾਂ ਵਿੱਚ ਧੁੰਮਾ, ਟਕਸਾਲਾਂ, ਉਦਾਸੀ/ਨਿਰਮਲੇ ਡੇਰਿਆਂ, ਨਿਹੰਗ ਸਿੰਘ ਜਥੇਬੰਦੀਆਂ ਆਦਿਕ ਦੇ ਨੁੰਮਾਇੰਦਿਆਂ ਦੀ ਬਹੁਤਾਤ ਹੈ; ਜਿਨ੍ਹਾਂ ਨੂੰ ਕੈਲੰਡਰ ਵਿਗਿਆਨ ਸਬੰਧੀ ਇੱਲ ਤੋਂ ਕੁੱਕੜ ਨਹੀਂ ਆਉਂਦਾ ਪਰ ਉਹ ਸਾਰੇ ਦੇ ਸਾਰੇ ਬਿਕ੍ਰਮੀ ਕੈਲੰਡਰ ਦੇ ਕੱਟੜ ਹਿਮਾਇਤੀ ਹਨ। ਨਾਨਕਸ਼ਾਹੀ ਕੈਲੰਡਰ ਦੇ ਹਿਮਾਇਤੀਆਂ ਵਿੱਚੋਂ ਕੇਵਲ ਰਸਮੀ ਤੌਰ ’ਤੇ ਪਾਲ ਸਿੰਘ ਪੁਰੇਵਾਲ ਦਾ ਨਾਮ ਹੀ ਇਸ ਆਸ ਨਾਲ ਸ਼ਾਮਲ ਕੀਤਾ ਸੀ ਕਿ ਉਹ ਇਸ ਕਮੇਟੀ ਨੂੰ ਇੱਕ ਪਾਸੜ ਦੱਸ ਕੇ ਇਸ ਵਿੱਚ ਸ਼ਾਮਲ ਹੋਣ ਤੋਂ ਨਾਂਹ ਕਰ ਦੇਣਗੇ ਕਿਉਂਕਿ ਅਜੇਹੀ ਕਮੇਟੀ ਵਿੱਚ ਫੈਸਲਾ ਕੈਲੰਡਰ ਦੇ ਨਿਯਮਾਂ ਨੂੰ ਧਿਆਨ ਵਿੱਚ ਰੱਖ ਕੇ ਨਹੀਂ ਬਲਕਿ ਵੋਟਾਂ ਦੇ ਅਧਾਰ ’ਤੇ ਹੋਵੇਗਾ ਜੋ ਗਲਤ ਹੋਣਾਂ ਤੈਅ ਹੈ। ਇਸ ਦੇ ਬਾਵਜੂਦ ਜਥੇਦਾਰ ਨੂੰ ਐਨਾ ਭਰੋਸਾ ਨਹੀਂ ਸੀ ਜਿਨ੍ਹਾਂ ਭਰੋਸਾ ਤੁਸੀਂ ਆਪਣੀਆਂ ਕੈਲਕੂਲੇਸ਼ਨਾਂ ’ਤੇ ਕਰੀ ਬੈਠੋ ਹੋ (ਭਾਵੇਂ ਕਿ ਆਪਣੇ ਭਰੋਸੇ ਨੂੰ ਸਿੱਧ ਕਰਨ ਲਈ ਤੁਸੀਂ ਵੀ ਸਿੱਧੇ ਤੇ ਸਪਸ਼ਟ ਉੱਤਰ ਦੇਣ ਤੋਂ ਜਥੇਦਾਰ ਵਾਙ ਹੀ ਕੰਨੀ ਕਤਰਾ ਰਹੇ ਹੋ)। ਇਹ ਜਥੇਦਾਰ ਵਿੱਚ ਪੈਦਾ ਹੋਈ ਬੇਭਰੋਸਗੀ ਦਾ ਹੀ ਕਾਰਨ ਹੈ ਕਿ ਪਿੱਛਲੇ ਚਾਰ ਸਾਲਾਂ ਤੋਂ ਕਮੇਟੀ ਬਣਾਉਣ ਦਾ ਐਲਾਨ ਕਰਨ ਦੇ ਬਾਵਜੂਦ ਉਹ ਮੈਂਬਰਾਂ ਦੀ ਮੀਟਿੰਗ ਕਰਵਾਉਣ ਤੋਂ ਟਾਲ਼ਾ ਵੱਟ ਰਹੇ ਹਨ ਕਿਉਂਕਿ ਉਨ੍ਹਾਂ ਨੂੰ ਇਹ ਭਰੋਸਾ ਜਰੂਰ ਹੈ ਕਿ ਜੇ ਸ: ਪਾਲ ਸਿੰਘ ਪੁਰੇਵਾਲ, ਜਥੇਦਾਰ ਦੇ ਕਿਆਸ ਦੇ ਉਲਟ ਮੀਟਿੰਗ ਵਿੱਚ ਸ਼ਾਮਲ ਹੋ ਗਏ ਤਾਂ ਉਨ੍ਹਾਂ ਦੀਆਂ ਦਲੀਲਾਂ ਦਾ ਉਸ ਇਕੱਠੀ ਕੀਤੀ ਅਖੌਤੀ ਵਿਦਵਾਨਾਂ ਦੀ ਭੀੜ ਵਿੱਚੋਂ ਕਿਸੇ ਨੇ ਵੀ ਉੱਤਰ ਨਹੀਂ ਦੇ ਸਕਣਾ ਤਾਂ ਉਹ ਕਿਹੜੇ ਮੂੰਹ, ਵੋਟਾਂ ਦੇ ਅਧਾਰ ’ਤੇ ਬਿਕ੍ਰਮੀ ਕੈਲੰਡਰ ਦੇ ਹੱਕ ਵਿੱਚ ਫੈਸਲਾ ਦੇਣਗੇ ? ਇਹੋ ਕਾਰਨ ਹੈ ਕਿ ਇੱਕ ਵਾਰ ਆਪਣੇ ਮਾਲਕਾਂ ਦੇ ਇਸ਼ਾਰੇ ’ਤੇ ਬਿਕ੍ਰਮੀ ਕੈਲੰਡਰ ਪੰਥ ’ਤੇ ਮੁੜ ਥੋਪ ਕੇ ਅੱਗੋਂ ਤੋਂ ਸੋਧ ਲਈ ਕਮੇਟੀ ਦਾ ਐਲਾਨ ਤਾਂ ਕਰ ਬੈਠੇ ਪਰ ਮੀਟਿੰਗ ਕਰਵਾਉਣ ਤੋਂ ਉਸੇ ਤਰ੍ਹਾਂ ਟਾਲ਼ਾ ਵੱਟ ਰਹੇ ਹਨ ਜਿਸ ਤਰ੍ਹਾਂ ਸਵਾਲਾਂ ਦੇ ਜਵਾਬ ਦੇਣ ਤੋਂ ਤੁਸੀਂ ਟਾਲ਼ਾ ਵੱਟ ਰਹੇ ਹੋ !

ਨਿਸ਼ਾਨ ਸਾਹਿਬ ਜੀ ਸ਼੍ਰੋਮਣੀ ਕਮੇਟੀ ਪ੍ਰਧਾਨ ਗੋਬਿੰਦ ਸਿੰਘ ਲੌਂਗੋਵਾਲ ਨਾਲ ਹੋਈ ਗੱਲਬਾਤ ਦੀ ਰੀਕਾਰਡਿੰਗ ਤੁਸੀਂ ਸੁਣ ਹੀ ਚੁੱਕੇ ਹੋ। ਉਹ ਸਾਫ ਤੌਰ ’ਤੇ ਮੰਨ ਰਹੇ ਹਨ ਕਿ ਕੈਲੰਡਰ ਸਬੰਧੀ ਉਨ੍ਹਾਂ ਨੂੰ ਕੋਈ ਗਿਆਨ ਨਹੀਂ ਹੈ; ਇਸ ਸਬੰਧੀ ਫੈਸਲਾ ਕਰਨਾ ਵਿਦਵਾਨਾਂ ਦਾ ਕੰਮ ਹੈ। ਸੰਤ ਸਮਾਜ ਦੇ ਆਗੂ ਅਤੇ ਤੁਹਾਡੀ ਪੁਸਤਕ ਛਪਵਾ ਕੇ ਮੁਫਤ ਵੰਡਣ ਵਾਲੇ ਸੰਤ ਸੇਵਾ ਸਿੰਘ ਰਾਮਪੁਰ ਖੇੜੇ ਵਾਲੇ ਵੀ ਮੇਰੇ ਨਾਲ ਹੋਈ ਗੱਲਬਾਤ ਵਿੱਚ ਮੰਨ ਚੁੱਕੇ ਹਨ ਕਿ ਉਨ੍ਹਾਂ ਨੂੰ ਕੈਲੰਡਰ ਸਬੰਧੀ ਗਿਆਨ ਨਹੀਂ ਹੈ ਇਹ ਵਿਦਾਵਾਨਾਂ ਦਾ ਕੰਮ ਹੈ। ਫਿਰ ਤੁਸੀਂ ਹੀ ਦੱਸੋ ਕਿ ਸ਼੍ਰੋਮਣੀ ਕਮੇਟੀ, ਦਿੱਲੀ ਕਮੇਟੀ, ਸੰਤ ਸਮਾਜ, ਟਕਸਾਲਾਂ, ਡੇਰਿਆਂ ਅਤੇ ਨਿਹੰਗ ਸਿੰਘ ਜਥਿਆਂ ਦੇ ਗਿਆਨ ਵਿਹੂਨੇ ਪ੍ਰਤੀਨਿਧਾਂ ਨੂੰ ਕੈਲੰਡਰ ਸਬੰਧੀ ਫੈਸਲਾ ਕਰਨ ਵਾਲੀ ਪੰਥਕ ਕਮੇਟੀ ਵਿੱਚ ਸ਼ਾਮਲ ਕਰਨਾ ਕਿਵੇਂ ਜਾਇਜ ਮੰਨਿਆ ਜਾ ਸਕਦਾ ਹੈ ?

ਚਾਹੁੰਦਾ ਸਾਰਾ ਪੰਥ ਇਹੋ ਹੈ ਕਿ ਕੈਲੰਡਰ ਦਾ ਮਸਲਾ ਜਲਦੀ ਹੱਲ ਹੋਵੇ ਪਰ ਫੈਸਲਾ ਕਰਨ ਵਾਲੀ ਕਮੇਟੀ ਵਿੱਚ ਇੱਕ ਪਾਸੜ ਸੰਸਥਾਵਾਂ ਨੂੰ ਨੁਮਾਇੰਦਗੀ ਦੇਣ ਦੀ ਥਾਂ ਉਸ ਵਿੱਚ ਕੇਵਲ ਕੈਲੰਡਰ ਤੇ ਸਿੱਖ ਇਤਿਹਾਸ ਨਾਲ ਸਬੰਧਤ ਵਿਦਵਾਨ ਹੀ ਸ਼ਾਮਲ ਕੀਤੇ ਜਾਣ। ਕੀ ਤੁਸੀਂ ਇਸ ਨਾਲ ਸਹਿਮਤ ਹੋ ?

10. ਅਖੀਰ ’ਤੇ ਤੁਸੀਂ ਲਿਖਿਆ ਹੈ : “ਤੁਹਾਡੀ ਵੈੱਬਸਾਈਟ ’ਤੇ ਸ: ਅਜੀਤ ਸਿੰਘ ਜਿਹੇ ਗੁਰਮੁਖ ਵੀ ਹਨ ਜਿਨ੍ਹਾਂ ਵੱਲੋਂ ਵਰਤੇ ਸ਼ਬਦ ਪੜ੍ਹ ਕੇ ਗੁਰਬਾਣੀ ਦੀ ਪੰਗਤੀ ਯਾਦ ਆਈ ਕਿ ‘ਰੋਗੀ ਕੈ ਭਾਣੇ ਸਭ ਰੋਗੀ’ ਆਪ ਇਨਸਾਨ ਜਿਹੋ ਜਿਹਾ ਹੁੰਦਾ ਹੈ ਉਸ ਨੂੰ ਸਾਰੇ ਉਹੋ ਜਿਹੇ ਹੀ ਨਜ਼ਰ ਆਉਂਦੇ ਹਨ।”  ਪੰਥਕ ਮਸਲੇ ਦਾ ਹੱਲ ਵੈੱਬਸਾਈਟਾਂ ਨਹੀਂ ਕਰ ਸਕਦੀਆਂ ਇਸ ਦਾ ਫ਼ੈਸਲਾ ਤਾਂ ਪੰਥਕ ਜਥੇਬੰਦੀਆਂ ਹੀ ਕਰ ਸਕਦੀਆਂ ਹਨ।

ਨਿਸ਼ਾਨ ਸਾਹਿਬ ਜੀ ! ਪਹਿਲੀ ਗੱਲ ਤਾਂ ਇਹ ਹੈ ਕਿ ਮੇਰੀ ਕੋਈ ਆਪਣੀ ਵੈੱਬਸਾਈਟ ਨਹੀਂ ਹੈ। ਤੁਹਾਨੂੰ ਜਿਹੜੀ ਵੈੱਬਸਾਈਟ ਪਸੰਦ ਹੈ ਤੁਸੀਂ ਉਸ ਸਾਈਟ ’ਤੇ ਵੀਚਾਰ ਰੱਖਣ ਦੀ ਅਜਾਦੀ ਮਾਣ ਸਕਦੇ ਹੋ ਮੈਂ ਆਪਣੇ ਵੀਚਾਰ ਉਸੇ ਸਾਈਟ ਨੂੰ ਭੇਜ ਦਿਆ ਕਰਾਂਗਾ।

ਦੂਸਰੀ ਗੱਲ ਹੈ ਕਿ ਜਿਸ ਨੂੰ ਤੁਸੀਂ ਮੇਰੀ ਵੈੱਬਸਾਈਟ ਦੱਸ ਰਹੇ ਹੋ ਜੇ ਕਰ ਉਸ ਵਿੱਚ ਕਿਸੇ ਵੀਚਾਰ ਨੂੰ ਤੋੜ ਮ੍ਰੋੜ ਕੇ ਜਾਂ ਵਧਾ ਘਟਾ ਕੇ ਲਿਖਿਆ ਹੋਵੇ ਤਾਂ ਉਹ ਜਰੂਰ ਕਸੂਰਵਾਰ ਹੈ। ਪਰ ਜਦੋਂ ਉਹ ਤੁਹਾਡੇ ਵੀਚਾਰਾਂ ਨੂੰ ਹੂ-ਬਹੁ ਪੇਸ਼ ਕਰ ਰਹੀ ਹੈ ਤਾਂ ਦੱਸੋ ਉਸ ਵੈੱਬਸਾਈਟ ਵਿੱਚ ਤੁਸੀਂ ਕੀ ਕਸੂਰ ਕੱਢ ਸਕਦੇ ਹੋ ?

ਤੀਸਰੀ ਗੱਲ ਜੋ ਤੁਸੀਂ ਲਿਖੀ ਹੈ ਕਿ “ਪੰਥਕ ਮਸਲੇ ਦਾ ਹੱਲ ਵੈੱਬਸਾਈਟਾਂ ਨਹੀਂ ਕਰ ਸਕਦੀਆਂ”। ਇਸ ਸਬੰਧੀ ਮੇਰਾ ਕਹਿਣਾ ਹੈ ਕਿ ਜਿੰਨਾਂ ਪਾਰਦ੍ਰਸ਼ੀ ਢੰਗ ਨਾਲ ‘ਗੁਰਪ੍ਰਸਾਦਿ.ਕਾਮ’ ਉੱਪਰ ਦੋਵੇਂ ਧਿਰਾਂ ਦੇ ਵੀਚਾਰ ਨਾਲੋ ਨਾਲ ਪੇਸ਼ ਕੀਤੇ ਜਾ ਰਹੇ ਹਨ ਉਸ ਹਿਸਾਬ ਨਾਲ ਤਾਂ ਜਿੱਥੋਂ ਤੁਸੀਂ ਦੋ ਟੁਕ ਫੈਸਲਾ ਕਰਵਾਉਣਾ ਚਾਹੁੰਦੇ ਹੋ, ਉਸ ਉਪਰ ਇਸ ਸਮੇਂ ਬੈਠੇ ਵਿਅਕਤੀ ਤਾਂ ਇਸ ਵੈੱਬਸਾਈਟ ਦੇ ਪਾਸਕੂ ਵੀ ਨਹੀਂ ਹਨ। ਹੁਣ ਉੱਥੇ ਪਾਰਦ੍ਰਸ਼ਤਾ ਦਾ ਤਾਂ ਨਾਮੋ ਨਿਸ਼ਾਨ ਨਹੀਂ ਹੈ ਪਰ ਦੀਰਘ ਵੀਚਾਰਾਂ ਕਰ ਕੇ ਜਿੰਨੇ ਝੂਠ ਉਥੋਂ ਬੋਲੇ ਜਾ ਰਹੇ ਹਨ ਇੰਨੇ ਝੂਠ ਤਾਂ ਆਮ ਵਿਅਕਤੀ ਵੀ ਬੋਲਣ ਪਿੱਛੋਂ ਸ਼ਰਮਾ ਜਾਂਦਾ ਹੈ ਪਰ ਉਨ੍ਹਾਂ ਨੂੰ ਤਾਂ ਰੱਤੀ ਭਰ ਵੀ ਪ੍ਰਵਾਹ ਨਹੀਂ ਹੈ।

ਚੌਥੀ ਗੱਲ ਹੈ ਕਿ ਸ: ਅਜੀਤ ਸਿੰਘ ਨੇ ਤੁਹਾਡੇ ਲਈ ਕਿਹੜੇ ਸ਼ਬਦ ਵਰਤੇ ਹਨ ਮੈਂ ਤਾਂ ਕਦੀ ਉਹ ਪੜ੍ਹੇ ਵੀ ਨਹੀਂ ਹਨ ਅਤੇ ਨਾ ਹੀ ਤੁਹਾਡੇ ਵੱਲੋਂ ਦੱਸੀ ਜਾ ਰਹੀ ਮੇਰੀ ਵੈੱਬ ਸਾਈਟ ਨੇ ਉਨ੍ਹਾਂ ਸ਼ਬਦਾਂ ਵਾਲੀ ਚਿੱਠੀ ਨੂੰ ਅਪਡੇਟ ਕੀਤਾ ਹੈ। ਸ: ਅਜੀਤ ਸਿੰਘ ਨੇ ਵੀ ਤੁਹਾਡੇ ਵੱਲੋਂ ਇਤਰਾਜ਼ ਕੀਤੇ ਜਾਣ ਪਿੱਛੋਂ ਆਪਣੇ ਆਪ ਨੂੰ, ਆਪਣੇ ਵਿਚਕਾਰ ਚਿੱਠੀ ਪੱਤਰ ਰਾਹੀਂ ਚੱਲ ਰਹੀ ਵੀਚਾਰ ਵਾਲੇ ਈ-ਮੇਲ ਗਰੁੱਪ ’ਚੋਂ ਅਲਾਇਦਾ ਹੋਣ ਦਾ ਐਲਾਨ ਕਰ ਦਿੱਤਾ ਸੀ ਤੇ ਮੁੜ ਉਸ ਨੇ ਇਸ ਵੀਚਾਰ ਚਰਚਾ ਵਿੱਚ ਨਾ ਕੋਈ ਭਾਗ ਲਿਆ ਹੈ ਅਤੇ ਨਾ ਕਦੀ ਕੋਈ ਕੁਮੈਂਟ ਕੀਤਾ ਹੈ। ਪਰ ਇਸ ਦੇ ਬਾਵਜੂਦ ਤੁਸੀਂ ਵਾਰ ਵਾਰ ਸ: ਅਜੀਤ ਸਿੰਘ ਦਾ ਨਾਮ ਵਰਤ ਕੇ ਵੀਚਾਰ ਚਰਚਾ ’ਚੋਂ ਨੱਠ ਜਾਣ ਦਾ ਰਾਹ ਲੱਭ ਰਹੇ ਜਾਪਦੇ ਹੋ; ਜੋ ਕਦਾਚਿਤ ਵੀ ਠੀਕ ਨਹੀਂ ਹੋਵੇਗਾ। ਆਸ ਹੈ ਤੁਸੀਂ ਪੰਥਕ ਵਿਵਾਦ ਦੇ ਹੱਲ ਨੂੰ ਨਜਿੱਠਣ ਲਈ ਪੁੱਛੇ ਗਏ ਸਵਾਲਾਂ ਦਾ ਸਹੀ ਤੇ ਸਪਸ਼ਟ ਉੱਤਰ ਦੇਣ ਦਾ ਆਪਣਾ ਫਰਜ ਪੂਰਾ ਕਰਨ ਦੀ ਖੇਚਲ ਕਰਦੇ ਰਹੋਗੇ।     

ਕਿਰਪਾਲ ਸਿੰਘ ਬਠਿੰਡਾ  ਮਿਤੀ 26 ਅਪ੍ਰੈਲ 2018

ਸ: ਕਿਰਪਾਲ ਸਿੰਘ ਜੀਓ,

ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਿਹ।

ਤੁਹਾਡਾ ਇਹ ਲਿਖਣਾ ਕਿ ਮੇਰੀਆਂ ਤਾਰੀਖ਼ਾਂ ਗ਼ਲਤ ਹਨ ਇਹ ਤੁਹਾਡੇ ਲਫ਼ਜ਼ਾਂ ਦੀ ਹੇਰਾ ਫੇਰੀ ਤੋਂ ਵੱਧ ਕੁੱਝ ਨਹੀਂ। ਜੇ ਮੇਰੀ ਇੱਕ ਤਾਰੀਖ਼ ਸ਼੍ਰੋਮਣੀ ਕਮੇਟੀ ਨਾਲ ਨਹੀਂ ਮਿਲਦੀ ਤਾਂ ਉਸ ਦੇ ਕਈ ਕਾਰਨ ਹੋ ਸਕਦੇ ਹਨ ਪਰ ਇਸ ਦਾ ਇਹ ਮਤਲਬ ਨਹੀਂ ਮੇਰੀ ਤਾਰੀਖ਼ ਗ਼ਲਤ ਹੈ।

ਮੈਂ ਸੁਆਲ ਨੰਬਰ 27 ਸਮੇਤ ਸਾਰੇ ਸੁਆਲ ਆਮ ਸੰਗਤਾਂ ਵਿਚ ਪਏ ਭੰਬਲਭੂਸੇ ਨੂੰ ਦੂਰ ਕਰਨ ਲਈ ਹੀ ਲਿਖੇ ਹਨ ਮੈਂ ਤੁਹਾਨੂੰ ਫਿਰ ਬੇਨਤੀ ਕਰਦਾ ਹਾਂ ਕਿ ਠੰਢੇ ਦਿਮਾਗ਼ ਨਾਲ ਰੰਗੀਨ ਐਨਕਾਂ ਦੀ ਥਾਂ ਸਾਫ਼ ਐਨਕਾਂ ਨਾਲ ਸਾਰੇ ਸੁਆਲ ਪੜ੍ਹੋ ਅਤੇ ਸਮਝੋ।

ਮੈਂ ਕਾਫ਼ੀ ਸਾਲਾਂ ਤੋਂ 1 ਲੱਖ ਰੁਪਇਆ ਲਈ ਫਿਰਦਾ ਹਾਂ ਅਤੇ ਕਿਸੇ ਮਰਦ ਨੇ ਹਿੰਮਤ ਨਹੀਂ ਕੀਤੀ ਤੁਸੀਂ ਕਰ ਕੇ ਵੇਖ ਲਵੋ। 2003 ਵਾਲੇ ਕੈਲੰਡਰ ਦੀ ਕਿਸੇ ਇੱਕ ਸੂਰਜੀ ਤਾਰੀਖ਼ ਨੂੰ ਇਤਿਹਾਸ ਮੁਤਾਬਿਕ ਸਿੱਧ ਕਰੋ ਅਤੇ ਇਨਾਮ ਲਵੋ। ਮੈਂ ਪਿਛਲੇ ਪੱਤਰ ਵਿਚ ਵੀ ਲਿਖਿਆ ਸੀ ਕਿ 23 ਪੋਹ ਬਿਕਰਮੀ ਅਤੇ 23 ਪੋਹ ਸੂਰਜੀ (2003 ਵਾਲੇ ਕੈਲੰਡਰ) ਵਾਲੇ ਵਿਚ ਫ਼ਰਕ ਸਮਝਣ ਦੀ ਕੋਸ਼ਿਸ਼ ਕਰੋ। ਜੇ ਕਰ ਸਮਝ ਚੁੱਕੇ ਹੋ ਤਾਂ ਦੱਸੋ ਕਿ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਦਾ ਪ੍ਰਕਾਸ਼ ਪੋਹ ਸੁਦੀ 7, 23 ਪੋਹ ਨਾਨਕਸ਼ਾਹੀ/ਬਿਕਰਮੀ, ਮੁਤਾਬਿਕ 22 ਦਸੰਬਰ 1666 (ਜੁਲੀਅਨ)/1 ਜਨਵਰੀ 1667 (ਗਰੀਗੋਰੀਅਨ) ਨੂੰ ਹੋਇਆ ਇਹ ਇੱਕ ਇਤਿਹਾਸਕ ਘਟਣਾ ਹੈ। ਕੀ ਉਸ ਦਿਨ ਤੁਹਾਡੇ ਸੂਰਜੀ ਕੈਲੰਡਰ ਦੀ 23 ਪੋਹ ਸੀ ?

ਮੈਂ ਸਾਰੇ ਵਿਗਿਆਨਕ ਕੈਲੰਡਰਾਂ ਨੂੰ ਠੀਕ ਮੰਨਦਾ ਹਾਂ ਕਿਸੇ ਕੈਲੰਡਰ ਤੋਂ ਘਿਰਨਾ ਨਹੀਂ। 2003 ਵਾਲੇ ਕੈਲੰਡਰ ਦਾ ਵਿਰੋਧ ਜ਼ਰੂਰ ਕਰਦਾ ਹਾਂ ਕਿਉਂਕਿ ਇਸ ਕੈਲੰਡਰ ਵਿਚ ਸਿੱਖ ਇਤਿਹਾਸ ਦੀਆਂ ਤਾਰੀਖ਼ਾਂ ਨੂੰ ਗ਼ਲਤ ਦਰਸਾਇਆ ਗਿਆ ਹੈ।

ਇਸ ਸਮੇਂ ਵੈੱਬਸਾਈਟਾਂ ਦੀ ਭਰਮਾਰ ਹੈ ਅਤੇ ਤੁਹਾਡੀ ਵੈੱਬਸਾਈਟ ਤੇ ਸ: ਅਜੀਤ ਸਿੰਘ ਜਿਹੇ ਗੁਰਮੁਖ ਵੀ ਹਨ ਜਿਨ੍ਹਾਂ ਵੱਲੋਂ ਵਰਤੇ ਸ਼ਬਦ ਪੜ੍ਹ ਕੇ ਗੁਰਬਾਣੀ ਦੀ ਪੰਗਤੀ ਯਾਦ ਆਈ ਕਿ ” ਰੋਗੀ ਕੈ ਭਾਣੇ ਸਭ ਰੋਗੀ” ਆਪ ਇਨਸਾਨ ਜਿਹੋ ਜਿਹਾ ਹੁੰਦਾ ਹੈ ਉਸ ਨੂੰ ਸਾਰੇ ਉਹੋ ਜਿਹੇ ਹੀ ਨਜ਼ਰ ਆਉਂਦੇ ਹਨ।

ਪੰਥਕ ਮਸਲੇ ਦਾ ਹੱਲ ਵੈੱਬਸਾਈਟਾਂ ਨਹੀਂ ਕਰ ਸਕਦੀਆਂ ਇਸ ਦਾ ਫ਼ੈਸਲਾ ਤਾਂ ਪੰਥਕ ਜਥੇਬੰਦੀਆਂ ਹੀ ਕਰ ਸਕਦੀਆਂ ਹਨ।

ਹੁਣ ਤੁਸੀਂ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਦੇ ਪਰਕਾਸ਼ ਪੁਰਬ ਦੀ ਤਾਰੀਖ਼ ਪੋਹ ਸੁਦੀ 7, 23 ਪੋਹ 1723 ਬਿਕਰਮੀ/198 ਨਾਨਕਸ਼ਾਹੀ ਮੁਤਾਬਿਕ 22-12-1666 ਜੁਲੀਅਨ/1-1-1667 (ਗਰੀਗੋਰੀਅਨ) ਨੂੰ 23 ਪੋਹ (ਪੁਰੇਵਾਲ ਵਾਲੇ ਕੈਲੰਡਰ) ਨਾਨਕਸ਼ਾਹੀ 198 ਦੇ ਬਰਾਬਰ ਸਿੱਧ ਕਰ ਕੇ 1 ਲੱਖ ਜਿੱਤਣ ਦਾ ਆਹਰ ਕਰੋ। ਅਗਲੀ ਵਿਚਾਰ ਚਰਚਾ ਉਸ ਤੋਂ ਬਾਅਦ। 

SURJIT SINGH NISHAN M.sc., MIS, MCA.

ਲੈ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਜੀ !

ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਿਹ।

ਨਿਸ਼ਾਨ ਜੀ ! ਮੈਂ ਆਪਣੇ ਪਹਿਲੇ ਪੱਤਰ (ਮਾਰਚ ੨੦) ਤੁਹਾਡੇ ਵੱਲੋਂ ਬਣਾਏ ਕੈਲੰਡਰ ਅਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੀਤੇ ਗਏ ਕੈਲੰਡਰ ਵਿਚ ਦਰਜ ਤਾਰੀਖ਼ਾਂ ਦੇ ਅੰਤਰ ਬਾਰੇ ਸਵਾਲ ਕੀਤਾ ਸੀ। ਇਕ ਮਹੀਨੇ ਪਿਛੋਂ, ਤੁਸੀਂ ਅਸਿੱਧੇ ਤਰੀਕੇ ਮੰਨਿਆ ਹੈ ਕਿ ਮੇਰੇ ਵੱਲੋਂ ਦਰਜ ਤਾਰੀਖ਼ਾਂ ਗਲਤ ਹਨ। ਤੁਹਾਡੇ ਬਚਨ, “ਪੰਥਕ ਏਕਤਾ ਲਈ ਇਹ ਜ਼ਰੂਰੀ ਹੈ ਕਿ ਉਸੇ ਕੈਲੰਡਰ ਮੁਤਾਬਿਕ ਹੀ ਸਾਰੇ ਗੁਰਪੁਰਬ ਮਨਾਏ ਜਾਣ। ਸ਼ਰੋਮਣੀ ਕਮੇਟੀ ਚਾਹੇ ਤਾਂ ਇਨ੍ਹਾਂ ਵਿਚ ਤਬਦੀਲੀ ਕਰ ਸਕਦੀ ਹੈ। ਉਸ ਤੇ ਕਿੰਤੂ ਪਰੰਤੂ ਕਰਨ ਦਾ ਸੁਆਲ ਹੀ ਪੈਦਾ ਨਹੀਂ ਹੁੰਦਾ”।

ਚੰਗਾ ਹੁੰਦਾ ਜੇ ਪਹਿਲੇ ਪੱਤਰ ਵਿੱਚ ਹੀ ਮੰਨ ਲੈਂਦੇ। ਹੁਣ ਆਪਣੇ ਜਵਾਬ 27 ਨੂੰ ਗਲਤ ਮੰਨਣ ਲਈ ਹੋਰ ਕਿੰਨਾ ਸਮਾਂ ਲਵੋਂਗੇ ?

ਤੁਸੀਂ ਲਿਖਿਆ ਹੈ ਕਿ, “ਮੈਨੂੰ ਆਪਣੀਆਂ ਕੈਲਕੁਲੇਸ਼ਨਜ਼ ਤੇ ਭਰੋਸਾ ਹੈ”। ਨਿਸ਼ਾਨ ਜੀ !  ਤੁਸੀਂ ਆਪਣੀ ਗਣਿਤ ਸੂਰਜੀ ਸਿਧਾਂਤ ਅਨੁਸਾਰ ਕੀਤੀ ਹੈ ਜਾਂ ਦ੍ਰਿਕ ਗਣਿਤ ਸਿਧਾਂਤ ਅਨੁਸਾਰ ?

ਅੱਗੇ ਆਪ ਜੀ ਲਿਖਦੇ ਹੋ, “ਤੁਸੀਂ ਪੁਰੇਵਾਲ ਵੱਲੋਂ ਬਣਾਏ ਜਿਹੜੇ ਸੂਰਜੀ ਕੈਲੰਡਰ ਦੀ ਹਮਾਇਤ ਕਰ ਰਹੇ ਹੋ, ਉਸ ਦੀਆਂ ਸਾਰੀਆਂ ਹੀ ਸੂਰਜੀ ਤਾਰੀਖ਼ਾਂ ਗ਼ਲਤ ਹਨ ”।

ਹਾਂ, ਅਸੀਂ “ਸੂਰਜੀ ਕੈਲੰਡਰ” ਦੀ ਹਮਾਇਤ ਕਰਦੇ ਹਾਂ।

ਨਿਸ਼ਾਨ ਜੀ !  ਕੀ ਤੁਹਾਡੇ ਵਿੱਚ ਸਮਰੱਥਾ ਹੈ ਕਿ ਤੁਸੀਂ ਸਪੱਸ਼ਟ ਲਿਖ ਸਕੋ ਕਿ “ਮੈਂ ਚੰਦਰ-ਸੂਰਜੀ ਬਿਕ੍ਰਮੀ ਕੈਲੰਡਰ ਦੀ ਹਮਾਇਤ ਕਰਦਾ ਹਾਂ”।  ਤੁਸੀਂ ਇਕ ਲੱਖ ਦਾ ਇਨਾਮ ਰੱਖਿਆ ਹੈ, ਮੈਂ ਵਿਚਾਰ ਕਰਨ ਲਈ ਸੱਦਾ ਦਿੱਤਾ ਸੀ। ਤੁਸੀਂ ਕੋਈ ਲੜ-ਸਿਰਾ ਨਹੀਂ ਸੀ ਫੜਾਇਆ। ਅੱਜ ਫੇਰ ਲਿਖ ਰਿਹਾ ਹਾਂ, ਕਰਨਲ ਨਿਸ਼ਾਨ ਜੀ !  ਮੈਂ ਤੁਹਾਡੇ ਵੱਲੋਂ ਰੱਖੇ ਗਏ ਇਕ ਲੱਖ ਦੇ ਇਨਾਮ ਨੂੰ ਜਿੱਤਣਾ ਚਾਹੁੰਦਾ ਹਾਂ।

ਸ਼੍ਰੋਮਣੀ ਕਮੇਟੀ ਵੱਲੋਂ ਬਣਾਈ ਕਮੇਟੀ ਦੀ ਮੀਟਿੰਗ ਸਬੰਧੀ ਬੇਨਤੀ ਹੈ ਕਿ “ਨਾ ਨੌ ਮਣ ਤੇਲ ਹੋਵੇ , ਨਾ ਰਾਧਾ ਨੱਚੇ”।  ਨਿਸ਼ਾਨ ਜੀ !  ਅੱਜ 18ਵੀਂ ਸਦੀ ਨਹੀਂ ਹੈ ਕਿ ਦਿਵਾਲੀ-ਵਿਸਾਖੀ ਨੂੰ ਇਕੱਠੇ ਹੋਣਾ ਹੈ। ਅੱਜ 21ਵੀ ਸਦੀ ਹੈ। ਹਰ ਵਿਅਕਤੀ ਸੰਚਾਰ ਦੇ ਸਾਧਨਾ ਨਾਲ ਲੈਸ ਹੈ। ਆਓ, ਸਮੇਂ ਦੇ ਹਾਣੀ ਬਣੀਏ। ਦੱਸੋ, ਕਿਹੜੇ ਮੰਚ (ਵੈਬ ਸਾਈਟ) ਤੇ ਵਿਚਾਰ ਚਰਚਾ ਕਰਨ ਨੂੰ ਤਿਆਰ ਹੋ ?

ਧੰਨਵਾਦ

ਸਰਵਜੀਤ ਸਿੰਘ ਸੈਕਰਾਮੈਂਟੋ         ਅਪ੍ਰੈਲ ੨੫, ੨੦੧੮

Sarbjit Singh

ਵਾਹਿਗੁਰੂ ਜੀ ਕਾ ਖ਼ਾਲਸਾ। ਵਾਹਿਗੁਰੂ ਜੀ ਕੀ ਫ਼ਤਿਹ॥

ਵਿਸ਼ਾ: ਵਿਸ਼ਾ: ਕੈਲੰਡਰ ਦੀਆਂ ਤਾਰੀਖ਼ਾਂ ਬਾਰੇ ਭੁਲੇਖਾ

1. ਸ਼ਰੋਮਣੀ ਕਮੇਟੀ ਸਿੱਖ ਪੰਥ ਦੀ ਸਿਰਮੌਰ ਸੰਸਥਾ ਹੈ ਇਸ ਲਈ ਉਸ ਵੱਲੋਂ ਉਲੀਕੇ ਪ੍ਰੋਗਰਾਮਾਂ ਅਨੁਸਾਰ ਇਸ ਸਾਲ ਲਈ ਜੋ ਕੈਲੰਡਰ ਸ਼ਰੋਮਣੀ ਕਮੇਟੀ ਨੇ ਛਾਪਿਆ ਹੈ, ਪੰਥਕ ਏਕਤਾ ਲਈ ਇਹ ਜ਼ਰੂਰੀ ਹੈ ਕਿ ਉਸੇ ਕੈਲੰਡਰ ਮੁਤਾਬਿਕ ਹੀ ਸਾਰੇ ਗੁਰਪੁਰਬ ਮਨਾਏ ਜਾਣ। ਸ਼ਰੋਮਣੀ ਕਮੇਟੀ ਚਾਹੇ ਤਾਂ ਇਨ੍ਹਾਂ ਵਿਚ ਤਬਦੀਲੀ ਕਰ ਸਕਦੀ ਹੈ। ਉਸ ਤੇ ਕਿੰਤੂ ਪਰੰਤੂ ਕਰਨ ਦਾ ਸੁਆਲ ਹੀ ਪੈਦਾ ਨਹੀਂ ਹੁੰਦਾ।

2. ਗੁਰਮਤ ਕਿਸੇ ਖ਼ਾਸ ਮਹੀਨੇ/ਦਿਨ/ਵਾਰ/ਥਿੱਤ ਨੂੰ ਬੁਰਾ ਨਹੀਂ ਮੰਨਦੀ। ਸਾਡੇ ਲਈ ਸਾਰੇ ਮਹੀਨੇ/ਦਿਨ/ਵਾਰ ਥਿੱਤਾਂ ਭਲੀਆਂ ਹਨ। ਗੁਰ ਸਿੱਖ ਲਈ ”ਮਾਹ ਦਿਵਸ ਮੂਰਤ ਭਲੇ….” ਹਨ ਕੋਈ ਮਾੜਾ ਨਹੀਂ। ਇਸੇ ਲਈ ਮੈਂ ਸੁਆਲ ਨੰਬਰ 27 ਵਿਚ ਗੁਰਮਤ ਦਾ ਪੱਖ ਸਪਸ਼ਟ ਕਰ ਦਿੱਤਾ ਸੀ ਅਤੇ ਉਸੇ ਮੁਤਾਬਿਕ ਗੁਰਪੁਰਬਾਂ ਦੀਆਂ ਤਾਰੀਖ਼ਾਂ ਨਿਸ਼ਚਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।

3. Leap/intercalary month ਜਿਸ ਨੂੰ ਮਲ ਮਾਸ ਜਾਂ ਵਾਧੂ ਮਹੀਨਾ ਵੀ ਕਹਿੰਦੇ ਹਨ ਇਸ ਦਾ 19 ਸਾਲਾਂ ਵਿਚ 7 ਵਾਰ ਆਉਣਾ ਇਹ ਕੈਲੰਡਰ ਦੀ ਬਣਤਰ ਮੁਤਾਬਿਕ ਹੈ ਅਤੇ ਇਸ ਤੋਂ ਬਾਅਦ ਆਉਣ ਵਾਲੇ ਗੁਰਪੁਰਬਾਂ ਦਾ 384/385 ਦਿਨਾਂ ਬਾਅਦ ਆਉਣਾ ਕੁਦਰਤੀ ਹੈ। ਮੈਂ ਮਲ ਮਾਸ ਦੀ ਹੋਂਦ ਨੂੰ ਨਹੀਂ ਨਕਾਰਿਆ ਬਲਕਿ ਇਸ ਦਾ ਗੰਦੇ ਹੋਣ ਦੇ ਪੱਖ ਨੂੰ ਸਵੀਕਾਰ ਨਹੀਂ ਕੀਤਾ।

4. ਥਿੱਤਾਂ ਨੂੰ ਦਿਨਾਂ ਦੀ ਗਿਣਤੀ ਨਾਲ ਜੋੜ ਕੇ ਹੀ ਵੇਖਣਾ ਤੁਹਾਡੀ ਥਿੱਤਾਂ ਬਾਰੇ ਅਧੂਰੀ ਜਾਣਕਾਰੀ ਦਾ ਹੀ ਸਬੂਤ ਹੈ। ਕਿਰਪਾ ਕਰ ਕੇ ਜਿਸ ਸੀਡੀ ਬਾਰੇ ਤੁਸੀਂ ਜਾਣਕਾਰੀ ਮੰਗੀ ਹੈ ਉਸ ਦੇ ਕਰਤਾ ਦੀ ਕਿਤਾਬ ਕੈਲੰਡ੍ਰੀਕਲ ਕੈਲਕੁਲੇਸ਼ਨਜ਼ ਖਰੀਦ ਕੇ ਪੜ੍ਹੋ ਉਸ ਵਿਚ ਤੁਹਾਨੂੰ ਸੀਡੀ ਦਾ ਸਾਫੇਵੇਅਰ ਵੀ ਮਿਲ ਜਾਏਗਾ ਖੋਜ ਕਰ ਲੈਣੀ। ਮੇਰੇ ਲਈ ਉਹ ਸੀਡੀ ਇੱਕ ਸਰੋਤ ਤੋਂ ਵੱਧ ਕੁੱਝ ਨਹੀਂ। ਮੈਨੂੰ ਆਪਣੀਆਂ ਕੈਲਕੁਲੇਸ਼ਨਜ਼ ਤੇ ਭਰੋਸਾ ਹੈ।

5. ਤੁਸੀਂ ਲਿਖਿਆ ਹੈ ਕਿ ਪਿਛਲੇ ਸਾਲ ਗੁਰੂ ਹਰਿ ਕ੍ਰਿਸ਼ਨ ਜੀ ਮਹਾਰਾਜ ਦੇ ਜੋਤੀ ਜੋਤਿ ਸਮਾਉਣ ਅਤੇ ਗੁਰੂ ਤੇਗ ਬਹਾਦਰ ਜੀ ਦੇ ਗੁਰਗੱਦੀ ਦਿਵਸ ਨੂੰ ਸ਼ਰੋਮਣੀ ਕਮੇਟੀ ਨੇ 10 ਅਪ੍ਰੈਲ ਨੂੰ ਸੋਮਵਾਰ ਦਿਖਾਇਆ ਹੈ ਅਤੇ ”ਗੁਰਪੁਰਬ ਦਰਪਣ” ਵਿਚ ਐਤਵਾਰ ਲਿਖਿਆ ਹੈ ਇਹ ਇੱਕ ਦਿਨ ਦਾ ਫਰਕ ਕਿਉਂ? ਕੀ ਇਹ ਤੁਸੀਂ ਜਾਣ ਬੁੱਝ ਕੇ ਭੰਬਲਭੂਸਾ ਪੈਦਾ ਨਹੀਂ ਕਰ ਰਹੇ। ਗੁਰਪੁਰਬ ਦਰਪਣ ਵਿਚ ਤਾਂ ਸੋਮਵਾਰ ਹੀ ਲਿਖਿਆ ਹੈ ਤੁਸੀਂ ਐਤਵਾਰ ਕਿੱਥੋਂ ਪੜ੍ਹ ਲਿਆ?

6. ਤੁਸੀਂ ਪੁਰੇਵਾਲ ਵੱਲੋਂ ਬਣਾਏ ਜਿਹੜੇ ਸੂਰਜੀ ਕੈਲੰਡਰ ਦੀ ਹਮਾਇਤ ਕਰ ਰਹੇ ਹੋ ਅਤੇ ਜਿਸ ਨੂੰ ਪੰਥ ਉੱਤੇ ਥੋਪਣ ਦਾ ਪ੍ਰਚਾਰ ਹੋ ਰਿਹਾ ਹੈ ਉਸ ਦੀਆਂ ਸਾਰੀਆਂ ਹੀ ਸੂਰਜੀ ਤਾਰੀਖ਼ਾਂ ਗ਼ਲਤ ਹਨ ਕਦੀ ਉਨ੍ਹਾਂ ਤਾਰੀਖ਼ਾਂ ਵਲ ਝਾਤੀ ਮਾਰੀ ਹੈ। ਮਿਸਾਲ ਦੇ ਤੌਰ ਤੇ ਗੁਰੂ ਅਰਜਨ ਦੇਵ ਜੀ ਮਹਾਰਾਜ ਦਾ ਸ਼ਹੀਦੀ ਦਿਹਾੜਾ ਹੀ ਲੈ ਲਵੋ। ਸ਼ਹੀਦੀ ਵਾਲੇ ਦਿਨ ਜੇਠ ਸੁਦੀ 4, 2 ਹਾੜ੍ਹ ਬਿਕਰਮੀ ਸੰਮਤ 1663 ਮੁਤਾਬਿਕ 30-5-1606 (ਜੁਲੀਅਨ) ਅਤੇ 9-6-1606 (ਗਰੀਗੋਰੀਅਨ) ਸੀ। ਜਿਸ ਨੂੰ ਪੁਰੇਵਾਲ ਵਾਲੇ ਕੈਲੰਡਰ ਨੇ 2 ਹਾੜ ਮੁਤਾਬਿਕ 16 ਜੂਨ ਬਣਾ ਦਿੱਤਾ ਹੈ ਸਿੱਧਾ ਹੀ ਇਤਿਹਾਸ ਨਾਲੋਂ 7 ਦਿਨਾਂ ਦਾ ਫ਼ਰਕ ਹੈ। ਕੀ ਸ਼ਹੀਦੀ ਵਾਲੇ ਦਿਨ ਤੁਹਾਡੇ ਸੂਰਜੀ ਕੈਲੰਡਰ ਦੀ 2 ਹਾੜ ਬਣਦੀ ਹੈ? ਅਸਲ ਵਿਚ ਉਸ ਨੇ ਸ਼ਹੀਦੀ ਦਿਨ ਵਾਲੀ ਤਾਰੀਖ਼ ਕੱਢੀ ਹੀ ਨਹੀਂ ਅਤੇ ਮਨ ਮਰਜ਼ੀ ਦੀ 2 ਹਾੜ ਮੁਤਾਬਿਕ 16 ਜੂਨ ਨੂੰ ਸ਼ਹੀਦੀ ਦਿਨ ਮਿੱਥ ਲਿਆ। ਇਸੇ ਤਰ੍ਹਾਂ ਬਾਕੀ ਸਾਰੇ ਗੁਰਪੁਰਬਾਂ ਦੀਆਂ ਤਾਰੀਖ਼ਾਂ ਮਿੱਥ ਕੇ ਇਤਿਹਾਸ ਨਾਲ ਖਿਲਵਾੜ ਕੀਤਾ ਹੈ।

7. ਕਿਰਪਾ ਕਰ ਕੇ ਕੈਲੰਡਰ ਸਬੰਧੀ ਅਧੂਰੀ ਜਾਣਕਾਰੀ ਨਾਲ ਸੰਗਤਾਂ ਵਿਚ ਭੰਬਲਭੂਸਾ ਪੈਦਾ ਨਾ ਕਰੋ।

8. ਮੈਂ ਇਹ ਸਮਝਦਾ ਹਾਂ ਕਿ ਕੈਲੰਡਰ ਸਬੰਧੀ ਸੰਗਤਾਂ ਵਿਚ ਪਾਏ ਜਾ ਰਹੇ ਭਰਮ ਭੁਲੇਖਿਆਂ ਨੂੰ ਦੂਰ ਕਰਨ ਲਈ ਸ੍ਰੀ ਅਕਾਲ ਤਖ਼ਤ ਵੱਲੋਂ ਪਿਛਲੇ ਸਾਲ ਜੋ ਪਹਿਲ ਇੱਕ ਪੰਥਕ ਕਮੇਟੀ ਸਥਾਪਤ ਕੀਤੀ ਗਈ ਸੀ ਉਸ ਕਮੇਟੀ ਦੀ ਮੀਟਿੰਗ ਜਲਦੀ ਤੋਂ ਜਲਦੀ ਬੁਲਾਈ ਜਾਏ ਤਾਂ ਕਿ ਅਗਲੇ ਸਾਲ ਦਾ ਕੈਲੰਡਰ ਛਾਪਣ ਤੱਕ ਇੱਕ ਦੋ ਟੁੱਕ ਫ਼ੈਸਲਾ ਹੋ ਜਾਏ।

ਸੁਰਜੀਤ ਸਿੰਘ ਨਿਸ਼ਾਨ

SURJIT SINGH NISHAN M.sc., MIS, MCA.

ਖੁੱਲ੍ਹਾ ਪੱਤਰ

ਸਤਿਕਾਰਯੋਗ     1 ਲੈਫ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਸਾਹਿਬ ਜੀ।

                                                2 ਭਾਈ ਗੋਬਿੰਦ ਸਿੰਘ ਲੌਂਗੋਵਾਲ ਸਾਹਿਬ ਜੀ, ਪ੍ਰਧਾਨ ਸ਼੍ਰੋਮਣੀ ਕਮੇਟੀ।

                                                3 ਗਿਆਨੀ ਗੁਰਬਚਨ ਸਿੰਘ ਜੀ, ਜਥੇਦਾਰ ਸ਼੍ਰੀ ਅਕਾਲ ਤਖ਼ਤ ਸਾਹਿਬ।

                                                4 ਸੰਤ ਸੇਵਾ ਸਿੰਘ ਜੀ, ਰਾਮਪੁਰ ਖੇੜਾ।

                                                5  ਡਾ: ਅਨੁਰਾਗ ਸਿੰਘ ਜੀ, ਸਾਬਕਾ ਮੈਂਬਰ, ਸਿੱਖ ਇਤਿਹਾਸ ਬੋਰਡ ਸ਼੍ਰੋਮਣੀ ਕਮੇਟੀ।

ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫਤਹਿ॥

ਵਿਸ਼ਾ: ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੀਤੇ ਗਏ ਨਾਨਕਸ਼ਾਹੀ ਸੰਮਤ 550 ਦੇ ਕੈਲੰਡਰ ਵਿੱਚ ਤਰੀਖ਼ਾਂ ਦੀ ਭਿੰਨਤਾ ਬਾਬਤ।

(ਨੋਟ : ਇਸ ਹਥਲੇ ਵਿਸ਼ੇ ’ਚ ਕਈ ਵਾਰ ਲੈਫ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਸਾਹਿਬ ਜੀ ਨੂੰ ਸੰਬੋਧਨ ਕਰ ਵਿਸ਼ੇ ਨੂੰ ਸੰਗਤਾਂ ਦੇ ਸਾਹਮਣੇ ਲਿਆਉਣ ਦਾ ਨਿਮਾਣਾ ਜਿਹਾ ਯਤਨ ਕੀਤਾ ਗਿਆ ਹੈ ਕਿਉਂਕਿ ਉਨ੍ਹਾਂ ਦੀ ਸਲਾਹ ਮੁਤਾਬਕ ਹੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ 2003 ਵਾਲੇ ਮੂਲ ਨਾਨਕਸ਼ਾਹੀ ਕੈਲੰਡਰ ਦੇ ਵਿਰੁਧ ਆਪਣਾ ਫ਼ੈਸਲਾ ਸੁਣਾ ਕੇ ਹਰ ਸਾਲ ਸੂਰਜ ਆਧਾਰਿਤ ਅਤੇ ਚੰਦ੍ਰਮਾ ਆਧਾਰਿਤ ਕੈਲੰਡਰ ਜਾਰੀ ਕੀਤਾ ਜਾਂਦਾ ਹੈ।)

20 ਮਾਰਚ 2018 ਨੂੰ ਸ: ਸਰਬਜੀਤ ਸਿੰਘ ਸੈਕਰਾਮੈਂਟੋ ਨੇ ਲੈਫ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਜੀ ਨੂੰ ਈਮੇਲ ਰਾਹੀਂ ਪੱਤਰ ਲਿਖ ਕੇ ਸਵਾਲ ਕੀਤਾ ਸੀ ਕਿ ਤੁਹਾਡੇ ਵੱਲੋਂ ਲਿਖੀ ਗਈ ਪੁਸਤਕ ‘ਗੁਰ ਪੁਰਬ ਦਰਪਣ’ ਅਤੇ ਸ਼੍ਰੋਮਣੀ ਕਮੇਟੀ ਵੱਲੋਂ ਜਾਰੀ ਕੀਤੇ ਗਏ ਕੈਲੰਡਰ ਸੰਮਤ 550 ਵਿੱਚ ਦਰਜ ਕੀਤੀਆਂ ਗਈਆਂ ਤਰੀਖ਼ਾਂ ਵਿੱਚ ਭਿੰਨਤਾ ਹੈ, ਇਸ ਲਈ ਦੱਸਿਆ ਜਾਵੇ ਕਿ ਤੁਹਾਡੇ ਦੋਵਾਂ ਵਿੱਚੋਂ ਕਿਸ ਦੀਆਂ ਤਰੀਖ਼ਾਂ ਗ਼ਲਤ ਹਨ ? ਇਸ ਚਿੱਠੀ ਦੀ ਕਾਪੀ ਉਪਰੋਕਤ ਦਰਸਾਈਆਂ ਗਈਆਂ ਸਾਰੀਆਂ ਸਤਿਕਾਰਤ ਹਸਤੀਆਂ ਤੋਂ ਇਲਾਵਾ ਇਸ ਵਿਸ਼ੇ ਵਿੱਚ ਰੁਚੀ ਰੱਖਣ ਵਾਲੇ ਮੇਰੇ ਸਮੇਤ ਹੋਰ ਵੀ ਬਹੁਤ ਸਾਰੇ ਸੱਜਣਾਂ ਨੂੰ ਨਾਲੋ ਨਾਲ ਭੇਜੀ ਗਈ ਸੀ, ਇਸ ਕਾਰਨ ਮੈਂ ਵੀ ਇਸ ਚਰਚਾ ਵਿੱਚ ਸ਼ਾਮਲ ਹੋ ਗਿਆ ਜੋ ਕਿ ਹੁਣ ਤੱਕ ਕਿਸੇ ਜਵਾਬ ਦੀ ਉਡੀਕ ਵਿੱਚ ਹਾਂ।

ਇਸ ਵੀਚਾਰ ਚਰਚਾ ਦੀਆਂ ਪਹਿਲੀਆਂ 9 ਚਿੱਠੀਆਂ ਜਿਸ ਵਿੱਚ 3-3 ਚਿੱਠੀਆਂ ਕਰਨਲ ਨਿਸ਼ਾਨ ਜੀ, ਸਰਬਜੀਤ ਸਿੰਘ ਜੀ ਸੈਕਰਾਮੈਂਟੋ ਅਤੇ ਇਸ ਪੱਤਰ ਦੇ ਲੇਖਕ ਦੀਆਂ ਸ਼ਾਮਲ ਹਨ; ਉਹ ‘ਗੁਰਮਤਿ ਬਿਬੇਕ’ ਤਿਮਾਹੀ ਪੱਤਰ ਦੇ ਅਪ੍ਰੈਲ/ ਮਈ/ ਜੂਨ 2018 ਦੇ ਅੰਕ ਵਿੱਚ ਛਪ ਚੁੱਕੀਆਂ ਹਨ ਅਤੇ ਹੁਣ ਤੱਕ ਦੀਆਂ ਸਾਰੀਆਂ 19 ਚਿੱਠੀਆਂ gurparsad.com  ’ਤੇ ਵੀ ਤਰਤੀਬਵਾਰ ਪੜ੍ਹੀਆਂ ਜਾ ਸਕਦੀਆਂ ਹਨ, ਪਰ ਹੈਰਾਨੀ ਦੀ ਗੱਲ ਹੈ ਕਿ ਕਰਨਲ ਨਿਸ਼ਾਨ ਤੋਂ ਇਲਾਵਾ ਕਿਸੇ ਵੀ ਜ਼ਿੰਮੇਵਾਰ ਵਿਅਕਤੀ ਨੇ ਕੌਮ ਨਾਲ ਸਬੰਧਿਤ ਇਸ ਗੰਭੀਰ ਮਸਲੇ ਬਾਰੇ ਜਵਾਬ ਦੇਣ ਦੀ ਲੋੜ ਹੀ ਮਹਿਸੂਸ ਨਹੀਂ ਕੀਤੀ ਹਾਲਾਂ ਕਿ ਸ਼੍ਰੋਮਣੀ ਕਮੇਟੀ ਦੇ ਦੋ ਸਕੱਤਰਾਂ ਨਾਲ ਸਰਬਜੀਤ ਸਿੰਘ ਸੈਕਰਾਮੈਂਟੋ ਅਤੇ ਡਾ: ਅਨੁਰਾਗ ਸਿੰਘ, ਸੰਤ ਸੇਵਾ ਸਿੰਘ ਅਤੇ ਸ਼੍ਰੋਮਣੀ ਕਮੇਟੀ ਪ੍ਰਧਾਨ (ਲੌਂਗੋਵਾਲ) ਨਾਲ ਮੇਰੀ ਨਿਜੀ ਤੌਰ ’ਤੇ ਫ਼ੋਨ ’ਤੇ ਗੱਲਬਾਤ ਵੀ ਹੋ ਚੁੱਕੀ ਹੈ। ਪ੍ਰਧਾਨ ਲੌਂਗੋਵਾਲ ਸਾਹਿਬ ਨਾਲ ਹੋਈ ਫ਼ੋਨ ਕਾਲ ਦੀ ਰੀਕਾਰਡਿੰਗ ਤੁਸੀਂ ਇਸ ਲਿੰਕ ’ਤੇ ਸੁਣ ਸਕਦੇ ਹੋ। ਕਰਨਲ ਨਿਸ਼ਾਨ ਜੀ ਨੇ ਵੀ ਸਿਰਫ਼ ਆਪਣੀ ਪੁਸਤਕ ਵਿੱਚ ਦਰਜ ਤਰੀਖ਼ਾਂ ਨੂੰ ਆਪਣੇ ਹੀ ਮਨਘੜਤ ਨਿਯਮਾਂ ਅਨੁਸਾਰ ਸਹੀ ਸਿੱਧ ਕਰਨ ਦਾ ਨਿਰਮੂਲ ਯਤਨ ਕੀਤਾ ਹੈ ਕਿਉਂਕਿ ਉਹ ਪੁੱਛੇ ਗਏ ਕਿਸੇ ਵੀ ਸਵਾਲ ਦਾ ਤਸੱਲੀਬਖ਼ਸ਼ ਜਵਾਬ ਨਾ ਦੇ ਸਕੇ ਤੇ ਸਵਾਲ ਨੂੰ ਜਾਣ ਬੁੱਝ ਕੇ ਗ਼ਲਤ ਪਾਸੇ ਘੁੰਮਾਉਣ ਦਾ ਯਤਨ ਕਰਦੇ ਰਹੇ।  ਹਰ ਇੱਕ ਸਵਾਲ ਕਰਤਾ ਨੂੰ ਉਹ ਕੇਵਲ ਆਪਣੀ ਹੀ ਪੁਸਤਕ ਵਿੱਚ ਛਪੇ 28 ਸਵਾਲ ਜਵਾਬ ਪੜ੍ਹਨ ਦੀ ਵਾਰ ਵਾਰ ਹਦਾਇਤ ਕਰ ਰਹੇ ਹਨ। ਕਰਨਲ ਸਾਹਿਬ ਜੀ ਨੂੰ ਬੇਨਤੀ ਕੀਤੀ ਗਈ ਸੀ ਕਿ ਇਹ ਸਵਾਲ ਕਿਸੇ ਹੋਰ ਦੇ ਨਹੀਂ ਤੁਸੀਂ ਆਪ ਹੀ ਪੈਦਾ ਕਰ ਜਵਾਬ ਦਿੱਤੇ ਹਨ, ਜੋ ਕਿ ਕਿਸੇ ਵੀ ਪ੍ਰਚਲਿਤ ਕੈਲੰਡਰ ਦੇ ਨਿਯਮਾਂ ਉੱਪਰ ਪੂਰੇ ਨਹੀਂ ਉਤਰਦੇ। ਹੁਣ ਤੱਕ ਚੱਲੇ ਚਿੱਠੀ ਪੱਤਰਾਂ ਦੇ ਸਾਰ ਦੇ ਆਧਾਰ ’ਤੇ ਸੰਖੇਪ ਵਿੱਚ ਕੁਝ ਸਵਾਲ ਹੇਠਾਂ ਦਰਜ ਕੀਤੇ ਜਾ ਰਹੇ ਹਨ ਜਿਨ੍ਹਾਂ ਦੇ ਉਪਰੋਕਤ ਸਾਰੀਆਂ ਜ਼ਿੰਮੇਵਾਰ ਧਿਰਾਂ ਨੂੰ ਜਵਾਬ ਦੇਣ ਦੀ ਬੇਨਤੀ ਕੀਤੀ ਜਾਂਦੀ ਹੈ ਅਤੇ ਆਸ ਕੀਤੀ ਜਾਂਦੀ ਹੈ ਕਿ ਕੌਮ ਲਈ ਅਤਿ ਵਿਵਾਦ ਦਾ ਵਿਸ਼ਾ ਬਣੇ ਕੈਲੰਡਰ ਦਾ ਕੋਈ ਢੁੱਕਵਾਂ ਹੱਲ ਲੱਭਣ ਦੇ ਲਈ ਆਪਣੇ ਵੱਲੋਂ ਜਵਾਬ ਜ਼ਰੂਰ ਦੇਣ ਦਾ ਯਤਨ ਕਰਨ।

1. ਕਰਨਲ ਨਿਸ਼ਾਨ ਸਾਹਿਬ ਜੀ ! ਤੁਸੀਂ ਆਪਣੇ ਵੱਲੋਂ ਸਵਾਲ ਨੰ: 27 ਦੇ ਜਵਾਬ ਵਿੱਚ ਲਿਖਿਆ ਹੈ ਕਿ ਗੁਰ ਪਰਬਾਂ ਦੀਆਂ ਤਿੱਥਾਂ ਨਿਰਧਾਰਿਤ ਕਰਨ ਲਈ ਤੁਸੀਂ ਇਤਿਹਾਸ ਨੂੰ ਮੁੱਖ ਰੱਖਿਆ ਹੈ, ਨਾ ਕਿ ਮਲ ਮਾਸ ਨੂੰ, ਪਰ ਸਾਡਾ ਸਵਾਲ ਹੈ ਕਿ ਤੁਸੀਂ ਆਪਣੀ ਪੁਸਤਕ ਵਿੱਚ ਬਹੁਤ ਸਾਰੀਆਂ ਤਰੀਖ਼ਾਂ ਮਲ ਮਾਸ ਵਿੱਚ ਨਿਰਧਾਰਿਤ ਕੀਤੀਆਂ ਹਨ ਅਤੇ ਬਹੁਤੇ ਕੇਸਾਂ ਵਿੱਚ ਮਲ ਮਾਸ ਦਾ ਖ਼ਿਆਲ ਰੱਖ ਕੇ ਇੱਕ ਮਹੀਨਾ ਲੇਟ ਨਿਰਧਾਰਿਤ ਕੀਤੀਆਂ ਹਨ। ਐਸਾ ਕਿਉਂ ਹੈ ?

ਇਸ ਦੇ ਬਾਵਜੂਦ ਤੁਸੀਂ ਆਪਣੇ ਹੀ ਬਣਾਏ ਨਿਯਮ ’ਤੇ ਪੂਰੇ ਨਹੀਂ ਉੱਤਰ ਰਹੇ।  ਤੁਹਾਡੇ ਲਈ ਸਵਾਲ ਕੀਤਾ ਗਿਆ ਕਿ ਜੇਕਰ ਪੰਡਿਤਾਂ ਵਾਲੇ ‘ਮਲ ਮਾਸ’ ਦਾ ਸਿੱਖਾਂ ਨੇ ਧਿਆਨ ਹੀ ਨਹੀਂ ਰੱਖਣਾ ਤਾਂ ਕਿਉਂ ਨਹੀਂ ਸੂਰਜੀ ਕੈਲੰਡਰ ਅਪਣਾ ਲਿਆ ਜਾਵੇ, ਜਿਸ ਵਿੱਚ ਕੋਈ ‘ਮਲ ਮਾਸ’ ਨਹੀਂ ਹੁੰਦਾ ਅਤੇ ਹਰ ਦਿਹਾੜਾ ਸੈਂਕੜੇ ਹਜ਼ਾਰਾਂ ਸਾਲਾਂ ਉਪਰੰਤ ਵੀ ਨਿਸ਼ਚਿਤ ਮਿਤੀ ਨੂੰ ਆਏਗਾ ਭਾਵ ਹਰ ਸਾਲ 365/66 ਦਿਨਾਂ ਬਾਅਦ ਨਿਸ਼ਚਿਤ ਤਰੀਖ਼ਾਂ ਨੂੰ ਹੀ ਆਉਂਦਾ ਰਹੇਗਾ ਜਾਂ ਅਗਰ ਤੁਸੀਂ ਸੂਰਜੀ ਕੈਲੰਡਰ ਨੂੰ ਸ਼ੁੱਧ ਨਹੀਂ ਮੰਨਦੇ ਤਾਂ ਸ਼ੁੱਧ ਚੰਦਰਮਾਂ ਕੈਲੰਡਰ ਅਪਣਾ ਲਿਆ ਜਾਵੇ; ਜਿਸ ਵਿੱਚ ਹਰ ਦਿਹਾੜਾ 354/55 ਦਿਨ ਬਾਅਦ ਆਇਆ ਕਰੇਗਾ ਅਤੇ ਕੋਈ ਵੀ ਮਲ ਮਾਸ ਨਹੀਂ ਰਹੇਗਾ; ਜਿਵੇਂ ਕਿ ਇਸਲਾਮ ਧਰਮ ਵਾਲਿਆਂ ਨੇ ਸ਼ੁੱਧ ਚੰਦਰ ਕੈਲੰਡਰ ਅਪਣਾਇਆ ਹੋਇਆ ਹੈ, ਜਿਸ ਦੇ 33 ਸੂਰਜੀ ਸਾਲਾਂ ਦੇ ਲਗਭਗ 34 ਚੰਦਰ ਸਾਲ ਬਣ ਜਾਂਦੇ ਹਨ।

(ਨੋਟ : ਚੰਦਰਮਾ ਸਾਲ ਵਿੱਚ 354/55 ਦਿਨ ਅਤੇ ਸੂਰਜੀ ਸਾਲ ਵਿੱਚ 365/66 ਦਿਨ ਹੁੰਦੇ ਹਨ। ਇਸ ਲਈ ਚੰਦਰ ਸੂਰਜੀ ਬਿਕ੍ਰਮੀ ਕੈਲੰਡਰ ਵਿੱਚ ਚੰਦਰ ਸਾਲ ਨੂੰ ਸੂਰਜੀ ਕੈਲੰਡਰ ਦੇ ਨੇੜੇ ਤੇੜੇ ਰੱਖਣ ਲਈ ਹਰ ਦੂਜੇ ਜਾਂ ਤੀਜੇ ਸਾਲ ਵਿੱਚ ਇੱਕ ਫਾਲਤੂ ਮਹੀਨਾ ਜੋੜ ਦਿੱਤਾ ਜਾਂਦਾ ਹੈ ਭਾਵ ਇੱਕੋ ਨਾਮ ਦੇ ਦੋ ਮਹੀਨੇ ਆ ਜਾਂਦੇ ਹਨ। ਹਿੰਦੂ ਮਤ ਅਨੁਸਾਰ ਚੰਦ੍ਰਮਾ ਸਾਲ ਦਾ ਇਹ ਫਾਲਤੂ ਮਹੀਨਾ ‘ਮਲ ਮਾਸ’ (ਅਪਵਿੱਤਰ ਮਹੀਨਾ) ਅਖਵਾਉਂਦਾ ਹੈ ਤੇ ਇਸ ਵਿੱਚ ਕੋਈ ਵੀ ਸ਼ੁਭ ਕਾਰਜ ਨਹੀਂ ਕੀਤਾ ਜਾਂਦਾ ਅਤੇ ਸੂਰਜ ਆਧਾਰਿਤ ਸਾਂਝੇ ਕੈਲੰਡਰ ਨੂੰ ਮੌਸਮੀ ਕੈਲੰਡਰ ਨਾਲ ਮਿਲਾਉਣ ਲਈ ਹਰ ਚੌਥੇ ਸਾਲ ਫ਼ਰਵਰੀ 29 ਦਿਨ ਕਰਨੀ ਪੈਂਦੀ ਹੈ।)

2. ਇਤਿਹਾਸ ਮੁਤਾਬਕ ਤਰੀਖ਼ਾਂ ਨਿਸ਼ਚਿਤ ਕਰਨ ਵਿੱਚ ਤੁਸੀਂ ਖੁਦ ਵੀ ਬੁਰੀ ਤਰ੍ਹਾਂ ਅਸਫਲ ਰਹੇ ਹੋ ਕਿਉਂਕਿ ਇਸ ਸਾਲ ਤਾਂ ਤੁਸੀਂ ਗੁਰੂ ਹਰਗੋਬਿੰਦ ਸਾਹਿਬ ਜੀ ਦੇ ਗੁਰਗੁੱਦੀ ਪੁਰਬ ਤੋਂ 11 ਦਿਨ ਬਾਅਦ ਗੁਰੂ ਅਰਜਨ ਸਾਹਿਬ ਜੀ ਦੀ ਸ਼ਹੀਦੀ 19 ਮਈ ਨੂੰ ਮੰਨੀ ਹੈ ਜਦ ਕਿ ਬਹੁਤੇ ਇਤਿਹਾਸਕਾਰ ਸਿਰਫ਼ ਪੰਜ ਦਿਨਾਂ ਦਾ ਹੀ ਅੰਤਰ ਲਿਖਦੇੇ ਹਨ, ਪਰ ਤੁਹਾਡੀ ਮਨੌਤ ਮੁਤਾਬਕ ਇਸ ਸਾਲ ਗੁਰ ਅਰਜਨ ਸਾਹਿਬ ਜੀ ਦਾ ਸ਼ਹੀਦੀ ਦਿਹਾੜਾ ਪਿਛਲੇ ਸਾਲ ਨਾਲੋਂ 355 ਦਿਨ ਬਾਅਦ ਨਿਰਧਾਰਿਤ ਕਰ ਦਿੱਤਾ ਅਤੇ ਅਗਲੇ ਸਾਲ ਇਹੀ ਦਿਹਾੜਾ 384 ਦਿਨਾਂ ਬਾਅਦ 7 ਜੂਨ 2019 ਨਿਰਧਾਰਿਤ ਕੀਤਾ ਹੈ। ਅਜਿਹਾ ਕਿਉਂ ? ਕੀ ਇਸ ਦਾ ਕਾਰਨ ‘ਮਲ ਮਾਸ’ ਨਹੀਂ, ਜਿਸ ਨੂੰ ਤੁਸੀਂ ਆਪ ਹੀ ਨਾ ਮੰਨਣ ਬਾਰੇ ਲਿਖ ਚੁੱਕੇ ਹੋ।  ਹੇਠਾਂ ਦਿੱਤਾ ਗਿਆ ਚਾਰਟ ਤੁਹਾਡੀ ਹੀ ਪੁਸਤਕ ਦੇ ਪੰਨਾ 54 ਤੇ 57 ਦੇ ਅਧਾਰ ’ਤੇ ਹੈ, ਜਿਸ ਵਿੱਚ (ਗੁਰਗੱਦੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਅਤੇ ਸ਼ਹੀਦੀ ਗੁਰੂ ਅਰਜਨ ਸਾਹਿਬ ਜੀ) ਨਾਨਕਸ਼ਾਹੀ ਸੰਮਤ 549 (2017-2018) ਵਿੱਚ 10 ਦਿਨਾਂ ਦਾ ਫ਼ਰਕ ਸੀ; ਸਾਲ ਸੰਮਤ 550 (2018-2019) ਵਿੱਚ 11 ਦਿਨ ਹੈ ਅਤੇ ਸੰਮਤ 553 (2020-2021) ਵਿੱਚ 12 ਦਿਨਾਂ ਦਾ ਫ਼ਰਕ ਦਰਸਾਇਆ ਗਿਆ ਹੈ।

ਜਦ ਕਿ ਤੁਹਾਡੇ ਸਵਾਲ ਨੰ: 13 ਦੇ ਜਵਾਬ ਵਿੱਚ ਤੁਸੀਂ ਆਪ ਹੀ ਲਿਖਿਆ ਹੈ ਕਿ ਪੋਹ ਸੁਦੀ 7 ਦਾ ਮਤਲਬ ਹੈ ਕਿ ਇਹ ਚੰਦ੍ਰਮੀ ਪੋਹ ਮਹੀਨੇ ਦੀ ਮੱਸਿਆ ਤੋਂ ਬਾਅਦ 7ਵੀਂ ਤਿੱਥ ਹੈ। ਹੁਣ ਜ਼ਰਾ ਆਪਣੀ ਸੀਡੀ ਤੋਂ ਵੇਖ ਕੇ ਦੱਸਣਾ ਕਿ ਜੇਠ ਵਦੀ 8 ਤੋਂ ਬਾਅਦ ਜੇਠ ਸੁਦੀ 4 ਕਿੰਨੇ ਦਿਨਾਂ ਬਾਅਦ ਆਉਂਦੀ ਹੈ ?  ਜੇ ਤੁਹਾਡੀ ਇਸ ਨਾਲ ਤਸੱਲੀ ਨਾ ਹੋਈ ਤਾਂ ਪੋਹ ਮਹੀਨੇ ਦੀ ਮੱਸਿਆ ਤੋਂ ਬਾਅਦ ਪੋਹ ਸੁਦੀ 7 ਦੀ ਵੀ ਪੜਤਾਲ ਕਰ ਲਓ ਕਿ ਇਹ ਹਰ ਸਾਲ ਹੀ 7 ਦਿਨ ਬਾਅਦ ਆਉਂਦੀ ਹੈ ਜਾਂ ਕਦੀ 6 ਤੇ ਕਦੀ 8 ਦਿਨ ਬਾਅਦ ਵੀ ?  ਜੇ ਦਿਨ ਘੱਟ ਵੱਧ ਹੁੰਦੇ ਹਨ ਤਾਂ ਕਿਉਂ ਤੇ ਕੀ ਇਸ ਦਾ ਕੋਈ ਹੋਰ ਹੱਲ ਵੀ ਸੰਭਵ ਹੈ ?

3. ਤੁਹਾਡੀ ਪੁਸਤਕ ਦੇ ਪੰਨਾ ਨੰ: 84 ਉੱਪਰ ਸੰਮਤ ਨਾਨਕਸ਼ਾਹੀ 549 ਵਿੱਚ ਆਉਣ ਵਾਲੇ ਪੁਰਬਾਂ ਦੀ ਸੂਚੀ ਦਾ ਸ਼੍ਰੋੋਮਣੀ ਕਮੇਟੀ ਵੱਲੋਂ ਪਿਛਲੇ ਸਾਲ ਜਾਰੀ ਕੀਤੇ ਗਏ ਕੈਲੰਡਰ ਨਾਲ ਮਿਲਾਣ ਕਰ ਕੇ ਵੇਖਿਆ ਤਾਂ ਪਤਾ ਲੱਗਾ ਕਿ ਪਿਛਲੇ ਸਾਲ ਵੀ ਗੁਰਗੱਦੀ ਪੁਰਬ ਗੁਰੂ ਅਮਰਦਾਸ ਜੀ ਅਤੇ ਹਾੜ ਮਹੀਨੇ ਦੀ ਸੰਗ੍ਰਾਂਦ ਦਾ ਇੱਕ ਇੱਕ ਦਿਨ ਦਾ ਫ਼ਰਕ ਸੀ; ਗੁਰਗੱਦੀ ਪੁਰਬ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਅਤੇ ਜੋਤੀ ਜੋਤ ਪੁਰਬ ਗੁਰੂ ਹਰਿ ਕ੍ਰਿਸ਼ਨ ਸਾਹਿਬ ਜੀ ਦੀ ਤਰੀਖ਼ 10 ਅਪਰੈਲ ਭਾਵੇਂ ਦੋਵਾਂ ਦੀ ਮਿਲਦੀ ਸੀ ਪਰ ਸ਼੍ਰੋਮਣੀ ਕਮੇਟੀ ਦੇ ਕੈਲੰਡਰ ਵਿੱਚ 10 ਅਪਰੈਲ ਦਿਨ ਸੋਮਵਾਰ ਨੂੰ ਵਿਖਾਈ ਗਈ ਸੀ ਜਦ ਕਿ ਤੁਹਾਡੀ ਪੁਸਤਕ ਵਿੱਚ 10 ਅਪਰੈਲ ਨੂੰ ਐਤਵਾਰ ਸੀ। ਇੱਕ ਦਿਨ ਦਾ ਇਹ ਫ਼ਰਕ ਕਿਉਂ ?

ਹਰ ਸਾਲ ਹੀ ਤੁਹਾਡੀਆਂ 4-5 ਤਰੀਖ਼ਾਂ ਵਿੱਚ ਅੰਤਰ ਹੋਣ ਕਾਰਨ ਸ਼ੱਕ ਪੈਦਾ ਹੁੰਦਾ ਹੈ ਕਿ ਤੁਹਾਡੇ ਵੱਲੋਂ ਵਰਤੀ ਜਾਂਦੀ ਸੀਡੀ ਸਮੇਂ ਅਨੁਕੂਲ ਨਹੀਂ, ਜਿਸ ਵਿੱਚ ਕੁਝ ਸੋਧਾਂ ਵੀ ਹੋ ਚੁੱਕੀਆਂ ਹਨ ਤੇ ਸ਼ਾਇਦ ਤੁਹਾਨੂੰ ਇਸ ਦਾ ਗਿਆਨ ਹੀ ਨਾ ਹੋਵੇ!  ਤੁਹਾਡੀ ਇਸ ਗੱਲ ਨਾਲ ਤਾਂ ਸਹਿਮਤ ਹੋਵੇਗੀ ਕਿ ਚੰਦਰ-ਸੂਰਜੀ ਬਿਕ੍ਰਮੀ ਕੈਲੰਡਰ ਵਿੱਚ ਕਦੀ ਐਸਾ ਵਾਪਰ ਜਾਂਦਾ ਹੈ ਕਿ ਇੱਕ ਮਹੀਨਾ ਹੀ ਖ਼ੈ (ਖ਼ਤਮ) ਹੋ ਜਾਂਦਾ ਹੈ ਭਾਵ ਸਾਲ ਵਿੱਚ ਉਸ ਨਾਮ ਦਾ ਮਹੀਨਾ ਹੀ ਨਹੀਂ ਹੁੰਦਾ।  ਤੁਹਾਨੂੰ ਬੇਨਤੀ ਹੈ ਕਿ ਇੱਕ ਤਾਂ ਤੁਸੀਂ ਜਿਸ ਸੀਡੀ ਦੀ ਵਰਤੋਂ ਕਰ ਰਹੇ ਹੋ ਉਸ ਦਾ ਨਾਮ, ਨਿਰਮਾਤਾ ਦਾ ਨਾਮ ਅਤੇ ਉਹ ਕਿਹੜੇ ਸਿਧਾਂਤ ਭਾਵ ਸੂਰਯ ਸਿਧਾਂਤ ਜਾਂ ਦ੍ਰਿਕ ਗਣਿਤ ਆਧਾਰਿਤ ਤਿਆਰ ਕੀਤੀ ਗਈ ਹੈ; ਉਸ ਬਾਰੇ ਸਿੱਖ ਸੰਗਤ ਨੂੰ ਜਾਣਕਾਰੀ ਦਿੱਤੀ ਜਾਵੇ ਅਤੇ ਦੂਸਰਾ ਉਸ ਸੀਡੀ ਦੀ ਮਦਦ ਨਾਲ ਇਹ ਦੱਸਿਆ ਜਾਵੇ ਕਿ ਪੋਹ ਦਾ ਮਹੀਨਾ ਭਵਿੱਖ ’ਚ ਆਉਣ ਵਾਲੇ ਕਿਹੜੇ-ਕਿਹੜੇ ਸਾਲਾਂ ਵਿੱਚ ਨਹੀਂ ਆਵੇਗਾ ?  ਇਸ ਵੇਰਵਾ ਦਾ ਇਹੀ ਮਤਲਬ ਹੈ ਕਿ ਕੈਲੰਡਰ ਵਿਦਵਾਨਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਭਾਰਤ ਵਿੱਚ 30 ਕਿਸਮ ਦੇ ਬਿਕ੍ਰਮੀ ਕੈਲੰਡਰ ਵੱਖ-ਵੱਖ ਸਿਧਾਂਤਾਂ ਅਤੇ ਵੱਖ-ਵੱਖ ਪ੍ਰਾਂਤਾਂ ਦੀ ਲੋੜ ਅਨੁਸਾਰ ਬਣਾਏ ਹੋਏ ਹਨ।  ਤੁਹਾਡੇ ਵੱਲੋਂ ਮਿਲੀ ਜਾਣਕਾਰੀ ਨਾਲ ਇਹ ਪਤਾ ਲਗਾਉਣਾ ਅਸਾਨ ਹੋ ਜਾਵੇਗਾ ਕਿ ਤੁਸੀਂ ਕਿਹੜੇ ਸਿਧਾਂਤ ਅਨੁਸਾਰ ਬਣੇ ਕੈਲੰਡਰ ਉੱਤੇ ਗੁਰਮਤ ਅਤੇ ਸਿੱਖ ਇਤਿਹਾਸ ਨੂੰ ਮਾਪਦੇ ਹੋ ਅਤੇ ਸ਼੍ਰੋਮਣੀ ਕਮੇਟੀ ਕਿਹੜੇ ਕੈਲੰਡਰ ਨੂੰ ਮਾਨਤਾ ਦੇ ਰਹੀ ਹੈ ?

4. ਡਾ: ਅਨੁਰਾਗ ਸਿੰਘ ਜੀ ! ਤੁਸੀਂ ਪਿਛਲੇ ਤਕਰੀਬਨ 15 ਸਾਲਾਂ ਤੋਂ ਇਹੀ ਰਾਗ ਅਲਾਪਦੇ ਆ ਰਹੇ ਹੋ ਕਿ 2003 ਈ: ਵਿੱਚ ਤੁਹਾਡੇ ਘਰ ਬੈਠ ਕੇ ਹੋਈ ਮੀਟਿੰਗ ਵਿੱਚ ਗੁਰ ਪੁਰਬਾਂ ਦੀਆਂ ਦਰੁਸਤ ਤਰੀਖ਼ਾਂ ਪ੍ਰਵਾਨ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਦੀ ਫੋਟੋ ਕਾਪੀ ਤੁਸੀਂ 2009 ਈ: ਵਿੱਚ ਅਕਾਲ ਤਖ਼ਤ ਸਾਹਿਬ ਅਤੇ ਪਰਮਜੀਤ ਸਿੰਘ ਸਰਨਾ (ਮੁਕਾਮੀ ਪ੍ਰਧਾਨ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ) ਨੂੰ ਡਾਕ ਰਜਿਸਟਰੀ ਰਾਹੀੋਂ ਭੇਜੀਆਂ ਸਨ। ਉਨ੍ਹਾਂ ਦੋਵਾਂ ਨੂੰ ਲਿਖੇ ਪੱਤਰ ਦੀ ਫੋਟੋ ਕਾਪੀ ਵੀ ਤੁਸੀਂ ਕਈ ਵਾਰ ਆਪਣੀ ਫੇਸ ਬੁੱਕ ’ਤੇ ਪੋਸਟ ਕਰ ਚੁੱਕੇ ਹੋ ਪਰ ਕਦੀ ਵੀ ਉਨ੍ਹਾਂ ਸਹੀ ਤਰੀਖ਼ਾਂ ਦੀ ਨਕਲ ਆਪਣੀ ਫੇਸ ਬੁੱਕ ਜਾਂ ਕਿਸੇ ਹੋਰ ਸਾਧਨ ਰਾਹੀਂ ਜਨਤਕ ਨਹੀਂ ਕੀਤੀ।

ਸ. ਸਰਬਜੀਤ ਸਿੰਘ ਸੈਕਰਾਮੈਂਟੋ ਤਕਰੀਬਨ ਪਿਛਲੇ ਇੱਕ ਸਾਲ ਤੋਂ ਲਗਾਤਰ ਆਪ ਜੀ ਤੋਂ ਮੰਗ ਕਰਦਾ ਆ ਰਿਹਾ ਹੈ ਕਿ ਤੁਹਾਡੇ ਵੱਲੋਂ ਗੁਰ ਪੁਰਬਾਂ ਦੀਆਂ ਸਹੀ ਤਰੀਖ਼ਾਂ ਦੀ ਜਿਹੜੀ ਸੂਚੀ ਅਕਾਲ ਤਖ਼ਤ ਸਾਹਿਬ ਨੂੰ ਭੇਜੀ ਗਈ ਸੀ ਉਹ ਜਨਤਕ ਕੀਤੀ ਜਾਵੇ ਤਾਂ ਜੋ ਉਨ੍ਹਾਂ ’ਤੇ ਵਿਚਾਰ ਕਰ ਕੇ ਕਿਸੇ ਨਤੀਜੇ ’ਤੇ ਪੁੱਜਿਆ ਜਾ ਸਕੇ ।  ਤੁਸੀਂ ਸੰਗਤ ਨੂੰ ਉਹ ਸੂਚੀ ਤਾਂ ਕੀ ਮੁਹੱਈਆ ਕਰਵਾਉਣੀ ਸੀ ਸਗੋਂ ਸੁਆਲ ਕਰਨ ਦੇ ਦੋਸ਼ ਵਿੱਚ ਉਸ ਨੂੰ ਆਪਣੀ ਫੇਸ ਬੁੱਕ ’ਤੇ ਵੀ ਬਲਾਕ ਕਰ ਦਿੱਤਾ ਤਾਂ ਜੋ ਮੁੜ ਐਸੇ ਸਵਾਲ ਹੀ ਪੈਦਾ ਨਾ ਹੋ ਸਕਣ।  ਹੈਰਾਨੀ ਤਾਂ ਇਹ ਹੈ ਕਿ ਸੰਤ ਸੇਵਾ ਸਿੰਘ ਆਦਿਕ ਸੰਤ ਸਮਾਜ ਦੇ ਆਗੂਆਂ ਅਤੇ ਸ਼੍ਰੋਮਣੀ ਕਮੇਟੀ ਨੂੰ ਪ੍ਰਭਾਵਤ ਕਰਨ ਲਈ ਤੁਸੀਂ ਵਾਰ-ਵਾਰ ਆਪਣੀ ਉਹੀ ਪੋਸਟ ਫੇਸ-ਬੁੱਕ ’ਤੇ ਰੀਪੀਟ ਕਰ ਰਹੇ ਹੋ ਤਾਂ ਕਿ ਇਹ ਪ੍ਰਭਾਵ ਦਿੱਤਾ ਜਾ ਸਕੇ ਕਿ ਕੋਈ ਤੁਹਾਡੇ ਵੱਲੋਂ ਦਿੱਤੀਆਂ ਦਰੁਸਤ ਤਰੀਖ਼ਾਂ ਨੂੰ ਰੱਦ ਨਹੀਂ ਕਰ ਸਕਿਆ ਅਤੇ ਨਾ ਹੀ ਪੁਰੇਵਾਲ ਸਮੇਤ ਕੋਈ ਵੀ ਜਵਾਬ ਦੇਣ ਦੀ ਹਿੰਮਤ ਜੁਟਾ ਸਕਿਆ ਹੈ। ਇਸ ਲਈ ਆਪਣਾ ਕੌਮੀ ਫ਼ਰਜ਼ ਸਮਝ ਕੇ ਉਨ੍ਹਾਂ ਪ੍ਰਵਾਨ ਹੋਈਆਂ ਤਰੀਖ਼ਾਂ ਦੀ ਸੂਚੀ ਤੁਰੰਤ ਜਨਤਕ ਕੀਤੀ ਜਾਵੇ ਤੇ ਦੱਸਿਆ ਜਾਵੇ ਕਿ ਤੁਹਾਡੇ ਅਨੁਸਾਰ ਦਰੁਸਤ ਤਰੀਖ਼ਾਂ ਨੂੰ ਪ੍ਰਵਾਨ ਕਰਨ ਵਾਲਿਆਂ ਦੀ ਮੀਟਿੰਗ ਵਿੱਚ ਕਿਹੜੇ-ਕਿਹੜੇ ਵਿਦਵਾਨ ਸ਼ਾਮਲ ਸਨ, ਜੋ ਤੁਹਾਡੇ ਨਾਲ ਸਹਿਮਤ ਸਨ ਜਾਂ ਤੁਸੀਂ ਉਨ੍ਹਾਂ ਦਾ ਕੇਵਲ ਨਾਮ ਵਰਤ ਕੇ ਹੀ ਆਪਣੀ ਸੋਚ ਸਿੱਖ ਸੰਗਤ ’ਤੇ ਥੋਪ ਰਹੇ ਹੋ ?

5. ਇਸ ਪੱਤਰ ਵਿੱਚ ਸੰਬੋਧਿਤ ਕੀਤੀਆਂ ਗਈਆਂ ਉਪਰੋਕਤ ਸਾਰੀਆਂ ਜ਼ਿੰਮੇਵਾਰ ਸ਼ਖ਼ਸੀਅਤਾਂ ਨੂੰ ਵੀ ਬੇਨਤੀ ਹੈ ਕਿ ਉਹ ਜ਼ਰੂਰ ਵਿਚਾਰਨ ਕਿ ਗੁਰਬਾਣੀ ਵਿੱਚ ਇਹ ਕਿੱਥੇ ਦਰਜ ਹੈ ਕਿ ਗੁਰ ਪੁਰਬ ਚੰਦਰ ਮਹੀਨੇ ਦੀਆਂ ਤਿੱਥਾਂ ਅਤੇ ਬਾਕੀ ਦੇ ਹੋਰ ਸਾਰੇ ਇਤਿਹਾਸਕ ਦਿਹਾੜੇ ਸੂਰਜੀ ਮਹੀਨੇ ਦੀਆਂ ਤਰੀਖ਼ਾਂ ਨਾਲ ਮਨਾਉਣੇ ਹੀ ਵਾਜਬ ਹਨ ਜਾਂ ਆਧੁਨਿਕ ਖੋਜ ਆਧਾਰਿਤ ਪ੍ਰਣਾਲੀ ਨੂੰ ਅਪਣਾਉਣ ਨਾਲ ਅਨਰਥ (ਪਾਪ) ਹੋ ਜਾਵੇਗਾ ?

ਮਿਸਾਲ ਵਜੋਂ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਜੀ ਦੀ ਸਿਰਜਣਾ ਗੁਰੂ ਹਰਿਗੋਬਿੰਦ ਸਿੰਘ ਜੀ ਨੇ 18 ਹਾੜ ਸੰਮਤ 1665 ਨੂੰ ਕੀਤੀ ਸੀ ਅਤੇ 19 ਦਿਨਾਂ ਬਾਅਦ 6 ਸਾਵਣ ਨੂੰ ਉਸੇ ਅਕਾਲ ਤਖ਼ਤ ਸਾਹਿਬ ’ਤੇ ਬੈਠ ਕੇ ਮੀਰੀ ਪੀਰੀ ਦੀਆਂ ਦੋ ਤਲਵਾਰਾਂ ਵੀ ਉਨ੍ਹਾਂ ਪਹਿਨੀਆਂ ਸਨ। ਹੁਣ ਇਹ ਕਿਹੜੀ ਪ੍ਰ੍ਰਮਾਣਿਕਤਾ ਹੈ ਕਿ ਸਿਰਜਣਾ ਦਿਵਸ ਸੂਰਜੀ ਮਹੀਨੇ ਦੀ 18 ਜੇਠ ਨੂੰ ਮਨਾਇਆ ਜਾਵੇ ਤੇ ਮੀਰੀ ਪੀਰੀ ਦਿਵਸ ਚੰਦਰ ਮਹੀਨੇ ਦੀਆਂ ਤਿਥਾਂ ਅਨੁਸਾਰ। ਇਸੇ ਅਬਿਬੇਕਤਾ ਕਾਰਨ ਦੋਵੇਂ ਮਹੱਤਵਪੂਰਨ ਦਿਹਾੜਿਆਂ ਦੀਆਂ ਤਰੀਖ਼ਾਂ ਵਿੱਚ ਹਮੇਸ਼ਾਂ 19 ਦਿਨਾਂ ਦਾ ਅੰਤਰ ਰੱਖਣ ਦੀ ਬਜਾਏ ਹੇਠ ਲਿਖੇ ਮਾਤਰ (ਪਿਛਲੇ) 5 ਸਾਲਾਂ ਦੇ ਕੈਲੰਡਰਾਂ ਤੋਂ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ :

ਸਾਡੇ ਬੱਚਿਆਂ ਪਾਸੋਂ ਅਗਰ ਕੋਈ ਅਧਿਆਪਕ ਜਾਂ ਕੋਈ ਬੰਦਾ, ਗੁਰੂ ਇਤਿਹਾਸ ਜਾਂ ਸਿੱਖ ਇਤਿਹਾਸ ਬਾਰੇ ਕੋਈ ਸਵਾਲ ਪੁੱਛੇ ਤਾਂ ਕੀ ਉਹ ਜਵਾਬ ਦੇ ਸਕਦੇ ਹਨ ?  ਇਸੇ ਤਰ੍ਹਾਂ ਸੰਨ 1699 ’ਚ ਅਨੰਦਪੁਰ ਸਾਹਿਬ ਵਿਖੇ ਪੰਜ ਪਿਆਰਿਆਂ ਤੋਂ ਸੀਸ ਦੀ ਮੰਗ ਕਰ ਖ਼ਾਲਸਾ ਸਥਾਪਨਾ ਦਿਵਸ ਅਤੇ ਹੋਲ਼ੀ ਦੇ ਕੱਚੇ ਰੰਗਾਂ ਜਾਂ ਗੰਦ ਮੰਦ ਨਾਲ ਖੇਡਣ ਦੀ ਬਜਾਏ ਹੋਲਾ ਮਹੱਲਾ ਪ੍ਰਚਲਿਤ ਕਰਨ ਦੀ ਰੀਤ ਵੀ ਅਨੰਦਪੁਰ ਸਾਹਿਬ ਵਿਖੇ ਗੁਰੂ ਗੋਬਿੰਦ ਸਿੰਘ ਜੀ ਦੁਆਰਾ ਆਰੰਭ ਕੀਤੀ ਗਈ ਸੀ, ਪਰ ਕੀ ਕਾਰਨ ਹੈ ਕਿ ਖ਼ਾਲਸਾ ਸਾਜਨਾ ਦਿਵਸ ਤਾਂ ਸੂਰਜੀ ਤਰੀਖ਼ਾਂ ਅਨੁਸਾਰ ਵੈਸਾਖ ਮਹੀਨੇ ਦੀ ਸੰਗ੍ਰਾਂਦ ਨੂੰ ਅਤੇ ਹੋਲਾ ਮਹੱਲਾ ਚੰਦਰ ਮਹੀਨੇ ਦੀਆਂ ਤਿੱਥਾਂ ਮੁਤਾਬਕ ਚੇਤ ਵਦੀ 1 ਨੂੰ ਮਨਾਇਆ ਜਾਂਦਾ ਹੈ ? ਇਹੋ ਕਾਰਨ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੁਆਰਾ ਜਾਰੀ ਕੀਤੇ ਜਾਂਦੇ ਸਾਲਾਨਾ ਕੈਲੰਡਰਾਂ ਵਿੱਚ ਹੋਲਾ ਮਹੱਲਾ ਕਦੇ ਤਾਂ ਸਾਲ ਵਿੱਚ ਦੋ ਵਾਰ (ਇੱਕ ਵਾਰ ਚੇਤ ਮਹੀਨੇ ਤੇ ਦੂਜੀ ਵਾਰ ਫੱਗਣ ਮਹੀਨੇ ’ਚ) ਮਨਾਇਆ ਜਾਂਦਾ ਹੈ ਤੇ ਕਦੇ ਇਹ ਤਿਉਹਾਰ ਇੱਕ ਸਾਲ ’ਚ ਆਉਂਦਾ ਹੀ ਨਹੀਂ। ਮਿਸਾਲ ਵਜੋਂ ਸੰਮਤ 548 ਵਿੱਚ ਦੋ ਵਾਰ ਆਇਆ ਤੇ ਇਸ ਸੰਮਤ 550 ਵਿੱਚ ਆ ਹੀ ਨਹੀਂ ਰਿਹਾ।  ਚੇਤ ਵਦੀ 1 ਅਤੇ 1 ਵੈਸਾਖ ਦਾ ਆਪਸੀ ਅੰਤਰ, ਕਰਨਲ ਸੁਰਜੀਤ ਸਿੰਘ ਜੀ ਮੁਤਾਬਕ ਵੀ ਕਦੇ ਇਕਸਾਰ ਨਹੀਂ ਰਹਿੰਦਾ।

6. ਅਜਿਹੇ ਦੁਬਿਧਾ ਭਰਪੂਰ (ਮਿਲਗੋਭਾ/ਖਿੱਚੜੀ) ਕੈਲੰਡਰ ਨੂੰ ਜੇਕਰ ਕਰਨਲ ਨਿਸ਼ਾਨ ਸਾਹਿਬ ਵਰਗਾ ਵਿਦਵਾਨ ਸਿੱਖ ਕੈਲੰਡਰ ਵਜੋਂ ਬਿਆਨ ਕਰੇ ਤੇ ਉਕਤ ਬਿਆਨ ਕੀਤੀਆਂ ਗਈਆਂ ਸਿੱਖ ਕੌਮ ਦੀਆਂ ਸ਼ਖ਼ਸੀਅਤਾਂ ਪ੍ਰਵਾਨ ਕਰ ਲੈਣ ਤਾਂ ਵਿਗਿਆਨਕ ਯੁੱਗ ਵਿੱਚ ਤਰਕ ਉੱਠਣੇ ਸੁਭਾਵਕ ਹਨ, ਜਿਨ੍ਹਾਂ ਦਾ ਜਵਾਬ ਦੇਣਾ ਵੀ ਬਣਦਾ ਹੈ। ਇਸ ਲਈ ਸਿੱਖ ਸੰਗਤਾਂ ਦੇ ਸਵਾਲ ਹਨ ਕਿ ਕੀ ਅਜਿਹੀ ਵਿਦਵਤਾ ਨੂੰ ਤਰਜੀਹ ਦੇਣਾ ਚਾਹੀਦੀ ਹੈ ?

ਅਜਿਹਾ ਕੈਲੰਡਰ, ਜਿਸ ਵਿੱਚ ਮਲ ਮਾਸ ਨੂੰ ਮਹੱਤਵ ਨਾ ਮਿਲੇ ਤੇ ਵੈਸੇ ਉਹ ਚੰਦਰ-ਸੂਰਜੀ ਆਧਾਰਿਤ ਹੋਵੇ; ਐਸੇ ਕੈਲੰਡਰ ਨੂੰ ਅੱਜ ਤੱਕ ਸਿੱਖ ਕੌਮ ਨੇ ਕਦੇ ਨਹੀਂ ਅਪਣਾਇਆ, ਫਿਰ ਕਰਨਲ ਨਿਸ਼ਾਨ ਸਾਹਿਬ ਤੋਂ ਪੁੱਛਣਾ ਬਣਦਾ ਹੈ ਕਿ ਇਸ ਕੈਲੰਡਰ ਦਾ ਨਾਮਕਰਨ ਕਰ ਕਦੋਂ ਤੋਂ ਸਿੱਖ ਕੈਲੰਡਰ ਆਖਣਾ ਤੇ ਲਿਖਣਾ ਸ਼ੁਰੂ ਕੀਤਾ ਹੈ ?  ਕਰਨਲ ਸਾਹਿਬ ਅਨੁਸਾਰ ਜਿਸ ਕੈਲੰਡਰ ਵਿੱਚ ਬਿਨਾਂ ਇਤਿਹਾਸਕ ਪੱਖ ਵਾਚਿਆਂ ਕੇਵਲ ਮਲ ਮਾਸ ਦਾ ਖ਼ਿਆਲ ਰੱਖ ਕੇ ਗੁਰ ਪੁਰਬ ਇੱਕ ਮਹੀਨਾ ਲੇਟ ਮਿੱਥ ਲਏ ਜਾਣ; ਜਿਵੇਂ ਕਿ ਸ਼੍ਰੋਮਣੀ ਕਮੇਟੀ ਨੇ ਇਸ ਸਾਲ ਗੁਰੂ ਅਰਜਨ ਸਾਹਿਬ ਜੀ ਦਾ ਸ਼ਹੀਦੀ ਦਿਹਾੜਾ ਕਰਨਲ ਨਿਸ਼ਾਨ ਵੱਲੋਂ ਸੁਝਾਈ ਗਈ ਤਰੀਖ਼ 19 ਮਈ ਦੀ ਥਾਂ ਮਲ ਮਾਸ ਦਾ ਮਹੀਨਾ ਲੰਘਾ ਕੇ ਸ਼ਹੀਦੀ ਦਿਹਾੜਾ 17 ਜੂਨ ਦਰਜ ਕੀਤਾ ਹੈ, ਜਿਸ ਕਾਰਨ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦੇ ਗੁਰਗੱਦੀ ਪੁਰਬ ਤੋਂ ਗੁਰੂ ਅਰਜੁਨ ਸਾਹਿਬ ਜੀ ਦਾ ਸ਼ਹੀਦੀ ਪੁਰਬ 5 ਦਿਨ (ਜਾਂ ਕਰਨਲ ਨਿਸ਼ਾਨ ਮੁਤਾਬਕ 11 ਦਿਨ) ਪਿੱਛੋਂ ਆਉਣ ਦੀ ਬਜਾਏ 40 ਦਿਨ ਪਿੱਛੋਂ ਨਿਸ਼ਚਿਤ ਕੀਤੇ ਜਾਣਾ; ਕੀ ਸਿੱਖ ਇਤਿਹਾਸ ਨੂੰ ਬਰਬਾਦ ਕਰਨਾ ਨਹੀਂ ?  ਕੀ ਇਸ ਤਰ੍ਹਾਂ ਦੇ ਕੈਲੰਡਰਾਂ ਨੂੰ ਲਾਗੂ ਕਰਵਾ ਕੇ ਸਾਡੀ ਕੌਮੀ ਲੀਡਰਸ਼ਿਪ ਸਿੱਖ ਕੌਮ ਨੂੰ ਹਨੇਰੇ ਵੱਲ ਨਹੀਂ ਧੱਕ ਰਹੀ ?

7.  21 ਅਪਰੈਲ 2018 ਨੂੰ ਜਦ ਇਸ ਦੁਬਿਧਾ ਭਰਪੂਰ ਕੈਲੰਡਰ ਸਬੰਧੀ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਭਾਈ ਲੌਂਗੋਵਾਲ ਸਾਹਿਬ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਸਵੀਕਾਰਿਆ ਕਿ ਮੈਨੂੰ ਕੈਲੰਡਰ ਵਿਗਿਆਨ ਬਾਰੇ ਸੋਝੀ ਨਹੀਂ ਤੇ ਇਹ ਵਿਦਵਾਨਾਂ ਦੇ ਮਿਲ ਬੈਠ ਕੇ ਮਸਲਾ ਸੁਲਝਾਉਣ ਵਾਲਾ ਕਾਰਜ ਹੈ, ਜਿਸ ਸਬੰਧੀ ਉਹ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨਾਲ ਗੱਲ ਕਰਨਗੇ ਤਾਂ ਕਿ ਜਲਦੀ ਦੋਵੇਂ ਧਿਰਾਂ ਦੀ ਮੀਟਿੰਗ ਸੱਦ ਕੇ ਕੋਈ ਹੱਲ ਕੱਢਣ। ਇਸ ਫ਼ੋਨ ਕਾਲ ਦੀ ਰੀਕਾਰਡਿੰਗ https://youtu.be/_xAoIVGYzWg  ਲਿੰਕ ’ਤੇ ਸੁਣੀ ਜਾ ਸਕਦੀ ਹੈ। ਇਸੇ ਤਰ੍ਹਾਂ ਦਾ ਜਵਾਬ ਹੀ ਕਰਨਲ ਨਿਸ਼ਾਨ ਜੀ ਦੀ ਪੁਸਤਕ ‘ਗੁਰ ਪੁਰਬ ਦਰਪਣ’ ਛਪਾ ਕੇ ਵੱਡੀ ਗਿਣਤੀ ਵਿੱਚ ਮੁਫ਼ਤ ਵੰਡਣ ਵਾਲੇ ਸੰਤ ਸੇਵਾ ਸਿੰਘ ਜੀ ਪਾਸੋਂ ਮਿਲਿਆ।

ਡਾਕਟਰ ਅਨੁਰਾਗ ਸਿੰਘ ਜੀ ਦਾ ਇੱਕ ਜਵਾਬ ਬੜਾ ਹਾਸੋਹੀਣਾ ਸੀ ਜਿਸ ਵਿੱਚ ਉਨ੍ਹਾਂ ਕਿਹਾ ਕਿ ਸੂਰਜੀ ਸਾਲ 365 ਦਿਨਾਂ ਦਾ ਹੁੰਦਾ ਹੈ ਜਦ ਕਿ ਧਰਤੀ ਸੂਰਜ ਦੇ ਦੁਆਲੇ ਚੱਕਰ ਲਾਉਣ ਵੇਲੇ 360 ਡਿਗਰੀ ਦਾ ਸਫ਼ਰ ਤਹਿ ਕਰਦੀ ਹੈ, ਇਸ ਲਈ ਤੁਸੀਂ 365 ਦਿਨਾਂ ਵਿੱਚ 360 ਡਿਗਰੀ ਨੂੰ ਕਿਵੇਂ ਪੂਰਾ ਪੂਰਾ ਵੰਡ ਕੇ ਸ਼ੁੱਧ ਕੈਲੰਡਰ ਬਣਾ ਸਕਦੇ ਹੋ ? ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਤੁਹਾਡੇ ਹਿਸਾਬ ਨਾਲ ਤਾਂ ਚੰਦਰ ਕੈਲੰਡਰ ਵੀ ਸ਼ੁੱਧ ਨਹੀਂ ਕਿਉਂਕਿ ਇਸ ਦੇ ਵੀ 354/355 ਦਿਨ ਹੁੰਦੇ ਹਨ, ਜੋ 360 ਨਾਲ ਪੂਰੇ ਪੂਰੇ ਨਹੀਂ ਵੰਡੇ ਜਾ ਸਕਦੇ। ਵੱਡੇ ਵਿਦਵਾਨ ਕਹਾਉਣ ਵਾਲੇ ਡਾ: ਅਨੁਰਾਗ ਸਿੰਘ ਨੇ ਦੋ ਵਾਰ ਦੁਹਰਾਅ ਕੇ ਕਿਹਾ 354 ਨਹੀਂ, 360 ਦਿਨ ਹੀ ਹੁੰਦੇ ਹਨ। ਜਿਸ ਵਿਦਵਾਨ ਨੂੰ ਇਹੀ ਪਤਾ ਨਹੀਂ ਕਿ ਚੰਦਰ ਸਾਲ ਦੇ 354 ਦਿਨ ਹੁੰਦੇ ਹਨ ਜਾਂ 360; ਉਹ ਕੈਲੰਡਰ ਸਬੰਧੀ ਕੋਈ ਰਾਇ ਦੇਣ ਦਾ ਕੀ ਹੱਕਦਾਰ ਹੋ ਸਕਦਾ ਹੈ ?

ਅੰਤ ’ਚ ਸਿੱਖ ਸੰਗਤ ਨੂੰ ਬੇਨਤੀ ਹੈ ਕਿ ਪ੍ਰਧਾਨ ਲੌਂਗੋਵਾਲ ਸਾਹਿਬ ਨਾਲ ਹੋਈ ਗੱਲਬਾਤ ਵਿੱਚ ਉਨ੍ਹਾਂ ਵੱਲੋਂ ਕਹੇ ਹੋਏ ਸ਼ਬਦਾਂ ’ਤੇ ਕੋਈ ਕਾਰਵਾਈ ਕਰਨ ਲਈ ਉਕਤ ਸਾਰੀਆਂ ਧਿਰਾਂ ਸਹਿਯੋਗ ਵੀ ਦਿੰਦੀਆਂ ਹਨ ਜਾਂ ‘‘ਜੋ ਜੀਇ ਹੋਇ ਸੁ ਉਗਵੈ; ਮੁਹ ਕਾ ਕਹਿਆ ਵਾਉ ॥’’ ਵਚਨਾਂ ਵਾਙ ਇਹ ਸੰਵੇਦਨਸ਼ੀਲ ਮਸਲਾ ਵੀ ਅਧਵਾਟੇ ਹੀ ਲਟਕਿਆ ਰਹੇਗਾ।

ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਵਿਚਾਰਧਾਰਾ ਨੇ ਸਿੱਖ ਨੂੰ ‘‘ਬੰਦੇ ! ਖੋਜੁ ਦਿਲ, ਹਰ ਰੋਜ.. ॥’’ (ਭਗਤ ਕਬੀਰ/੭੨੭) ਨਸੀਹਤ ਵੱਲ ਪ੍ਰੇਰਿਆ ਹੈ, ਜਿਸ ਕਾਰਨ ਭਿੰਨ-ਭਿੰਨ ਵਿਸ਼ਿਆਂ ਨਾਲ ਸਬੰਧਿਤ ਅਨੇਕਾਂ ਵਿਦਵਾਨ, ਸਿੱਖ ਕੌਮ ਪਾਸ ਅੱਜ ਵੀ ਮੌਜੂਦ ਹਨ।  ਜਿਹੜੀ ਕੌਮ ਆਪਣੇ ਆਪ ਨੂੰ ਗਿਆਨ ਗੁਰੂ ਦੇ ਪੈਰੋਕਾਰ ਅਖਵਾਵੇ ਅਤੇ ਹਰ ਵਿਸ਼ੇ ਨਾਲ ਸਬੰਧਿਤ ਬੁਧੀਜੀਵੀ ਵਰਗ ਦੀ ਮਦਦ ਲੈਣ ਤੋਂ ਕਿਸੇ ਰਾਜਸੀ ਹਿੱਤ ਕਾਰਨ ਸੰਕੋਚ ਕਰੇ, ਉਨ੍ਹਾਂ ਦੇ ਲੀਡਰਾਂ/ਜਥੇਦਾਰਾਂ ਦੀ ਕਥਨੀ ਤੇ ਕਰਨੀ ਵਿੱਚ ਅੰਤਰ ਆ ਹੀ ਜਾਂਦਾ ਹੈ, ਜੋ ਦੇਰ-ਸਵੇਰ ਕੌਮ ਲਈ ਪ੍ਰੇਸ਼ਾਨੀ ਦਾ ਕਾਰਨ ਬਣਦਾ ਹੈ।  ਹਰ ਵਿਸ਼ਾ ਬੁਧੀਜੀਵੀਆਂ ਦੁਆਰਾ ਪੜਚੋਲ ਕਰਨ ਦੀ ਬਜਾਇ ਉਨ੍ਹਾਂ ਲੀਡਰਾਂ ਜਾਂ ਜਥੇਬੰਦੀਆਂ ਦੇ ਸਪੁਰਦ ਕਰ ਦਿੱਤਾ ਜਾਵੇ, ਜੋ ਉਕਤ ਪੁੱਛੇ ਜਾ ਰਹੇ ਸਵਾਲਾਂ ਦੇ ਜਵਾਬ ਵਿੱਚ ਆਪਣੇ ਆਪ ਨੂੰ ਵਿਸ਼ੇ ਬਾਰੇ ਬੋਧ ਨਾ ਹੋਣਾ, ਮੰਨਣ ਤਾਂ ਕੀ ਸਿੱਖ ਸੰਗਤ ਨੂੰ ਅੱਗੇ ਆ ਕੇ ਆਪਣਾ ਫ਼ਰਜ਼ ਅਦਾ ਨਹੀਂ ਕਰਨਾ ਚਾਹੀਦਾ ?  ਮੇਰਾ ਇਸ਼ਾਰਾ ਕਿਸੇ ਟਕਰਾਅ ਨੂੰ ਉਤਪੰਨ ਕਰਨ ਵੱਲ ਨਹੀਂ ਬਲਕਿ ਇਨ੍ਹਾਂ ਕੌਮੀ ਸ਼ਖ਼ਸੀਅਤਾਂ ਪਾਸੋਂ ਅਜਿਹੇ ਵਿਸ਼ਿਆਂ ਬਾਰੇ ਵਾਰ-ਵਾਰ ਸਵਾਲ ਪੁੱਛਣ ਵੱਲ ਹੈ।

ਧੰਨਵਾਦ ਸਹਿਤ ਪੰਥ ਦਾ ਸੇਵਕ ਕਿਰਪਾਲ ਸਿੰਘ (ਬਠਿੰਡਾ)-98554-80797

ਈਮੇਲ Kirpal Singh kirpalsinghbathinda@gmail.com

ਸ. ਅਨੁਰਾਗ ਸਿੰਘ ਜੀ,

ਜੇ ਤੁਹਾਨੂੰ ਯਾਦ ਹੋਵੇ ਤਾਂ, 7 ਅਗਸਤ 2017 ਈ: ਨੂੰ ਹੇਠ ਲਿਖਿਆ ਇਕ ਪੱਤਰ ਲਿਖਿਆ ਸੀ। ਇਸ ਪੱਤਰ ਵਿੱਚ ਤੁਸੀਂ ਅਕਾਲ ਤਖਤ ਦੇ ਜਥੇਦਾਰ ਨੂੰ ਭੇਜੇ ਪੱਤਰ (12 ਅਗਸਤ 2009) ਅਤੇ ਨਵੰਬਰ 2009 ਈ: ਵਿੱਚ ਸ. ਪਰਮਜੀਤ ਸਿੰਘ ਸਰਨਾ ਨੂੰ ਭੇਜੇ ਪੱਤਰ ਦੀਆਂ ਫ਼ੋਟੋ ਵੀ ਨੱਥੀ ਕੀਤੀਆਂ ਸਨ। ਪੜ੍ਹੋ ਆਪਣਾ ਪੱਤਰ;

PAL SINGH PUREWAL’S FAKE NANAKSHAHI CALENDAR with
FAKE HISTORICAL DATES already REJECTED by THE
ECCLESIASTICAL COURT of SRI AKAL TAKHAT SAHIB
————————————————————-
POST-8 for Sarabjit Singh Sacramento,Satpal Singh Purewal,Sukhpreet Singh Udoke to respond
————————————————————-

Friends,

We are noticing that Comrade Purewal and his Salvation Army of Writers are conspicuously silent on all the objections raised by different writers,scholars,historians since 2003.
In this list I include Surjeet Singh Nishan,Dr Amarjeet Kaur of 
Belgium,Baba Baljinder Singh Rara Sahib,Principal Santokh Singh on behalf of Singh Sabha Amritsar and many more.

In 2009 Pal Singh Purewal was called by the Ecclesiastical Court of Sri Akal Takhat Sahib as well as SGPC to confront all the objections so that this new headache of the Sikhs may be given a required medicine.

Knowing full well his own weakness and spurious nature of the so-called Nanakshahi Calendar-Samvat with unhistorical dates Comrade Purewal preferred to stay away from these meetings:One at Amritsar and two at Fatehgarh Sahib.In these meetings the Fake Calendar with Fake Date,introduced by Comrade Purewal with borrowed support of certain SGPC Officials was fully demolished to the hilt.

In these meetings I provided 400 written pages,including manuscript of my book,”GUBANI,ITIHAS ATE SIDHANTAN TON BEMUKH NANAKSHAHI CALENDAR,which nailed all the perfidious lies of Comrade Purewal in this so-called Government Sponsored Fake Nanakshahi Calendar.

Consequently SGPC on the recommendation of the Ecclesiastical Court of Sri Akal Takhat Sahib decided to discard this so-called Nanakshahi Calendar, which sowed the seeds of discord and confusion among the Sikhs. I was asked by Jathedar Sri Akal Takhat Sahib telephonically to send the correct dates for amendment, which I submitted vide my letter dated August 12,2009 to send the actual historical dates for amending the Sikh Calendar of 2010-11.Copy of my letter is enclosed as evidence.

Accepting defeat at his home ground-SGPC and Sri Akal Takhat Sahib- Comrade Purewal took the shelter with DSGMC,ruled by Congress sympathisers Sarna Akali Dal.
I was also invited for this meeting,but when I was informed that it is not a seminar on so-called Nanakshahi Calendar of Comrade Purewal but to garner support for this rejected Maker(Nirmata) of Fake Calendar and Unhistorical Dates then I canceled my tickets and sent a 4 pages letter to S.Paramjit Singh Sarna on November 16,2009 along with manuscript copy of my book on Nanakshahi Calendar of Purewal and many other objections from various quarters with request to consider all the points before backing this Fake Calendar with Fake Dates out of political compulsions.Copy of my 4 pages letter to S.Paramjit Singh Sarna is enclosed and is self-explanatory.

Read this post carefully to post your comments.

Gur-Fateh,
7.8.2017.

ਅਨੁਰਾਗ ਸਿੰਘ ਜੀ ! ਤੁਹਾਡੇ ਇਸ ਪੱਤਰ ਦੇ ਜਵਾਬ ਵਿੱਚ 9 ਅਗਸਤ ਨੂੰ, ਮੈਂ ਇਕ ਪੱਤਰ (ਕਿਸ਼ਤ 4) ਲਿਖਿਆ ਸੀ ਜਿਸ ਰਾਹੀ ਤੁਹਾਨੂੰ ਬੇਨਤੀ ਕੀਤੀ ਸੀ,“ਤੁਸੀਂ ਉਹ ਤਾਰੀਖ਼ਾਂ ਜਿਹੜੀਆਂ 2003 ਈ: ਵਿੱਚ ਤੁਹਾਡੇ ਘਰ ਬੈਠ ਕੇ ਪ੍ਰਵਾਨ ਕੀਤੀਆਂ ਗਈਆਂ ਸਨ ਅਤੇ ਤੁਸੀਂ 2009 ਈ: ਵਿਚ ਅਕਾਲ ਤਖਤ ਸਾਹਿਬ ਨੂੰ ਵੀ ਭੇਜੀਆਂ ਸਨ, ਉਨ੍ਹਾਂ ਨੂੰ ਸੰਗਤਾਂ ਦੀ ਕਚਿਹਰੀ ਵਿੱਚ ਰੱਖੋ ਤਾਂ ਜੋ ਉਨ੍ਹਾਂ ਤੇ ਵਿਚਾਰ ਕਰ ਕੇ ਕਿਸੇ ਨਤੀਜੇ ਤੇ ਪੁੱਜਿਆ ਜਾਂ ਸਕੇ”।

ਇਸ ਤੋਂ ਪਿਛੋਂ ਮੈਂ ਆਪਣੇ ਹਰ ਪੱਤਰ ਵਿੱਚ (14, 17, 31 ਅਗਸਤ, 15, 24 ਅਕਤੂਬਰ, 25 ਨਵੰਬਰ, 10 ਦਸੰਬਰ 2017, 22 ਮਾਰਚ ਅਤੇ 23 ਮਾਰਚ 2018) ਬੇਨਤੀ ਕਰ ਰਿਹਾ ਹਾਂ ਕਿ ਸਿੱਖ ਇਤਿਹਾਸ ਦੀਆਂ  “ਸ਼ੁੱਧ ਤਾਰੀਖ਼ਾਂ” ਜਿਹੜੀਆਂ ਤੁਹਾਡੇ ਘਰ ਬੈਠ ਕੇ 23 ਮਾਰਚ 2003 ਨੂੰ ਨਿਰਧਾਰਿਤ ਕੀਤੀਆਂ ਗਈਆਂ ਸਨ ਅਤੇ ਤੁਸੀਂ 12 ਅਗਸਤ 2009 ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਨੂੰ ਭੇਜੀਆਂ ਸਨ, 7 ਪੰਨਿਆਂ ਦੀ ਸੂਚੀ ਪਾਠਕਾਂ ਦੀ ਕਚਿਹਰੀ ਵਿਚ ਪੇਸ਼ ਕਰੋ, ਤਾਂ ਜੋ ਉਨ੍ਹਾਂ ਤੇ ਵਿਚਾਰ ਕੀਤੀ ਜਾ ਸਕੇ।

ਅਨੁਰਾਗ ਸਿੰਘ ਜੀ, ਤੁਸੀਂ ਨਾ ਤਾਂ ਮੇਰੇ ਸਵਾਲ, “ਕੀ ਸ਼੍ਰੋਮਣੀ ਕਮੇਟੀ ਨੇ ਸੰਮਤ ੫੪੨ ਨਾਨਕਸ਼ਾਹੀ (2010-2011 ਈ:) ਦਾ ਕੈਲੰਡਰ ਤੁਹਾਡੇ ਵੱਲੋਂ ਸੁਝਾਈਆਂ ਗਈਆਂ ਇਤਿਹਾਸਿਕ ਤਾਰੀਖ਼ਾਂ ਮੁਤਾਬਕ ਬਣਾਇਆ ਸੀ? ਦਾ ਜਵਾਬ ਦਿੱਤਾ ਹੈ ਅਤੇ ਨਾ ਹੀ ਸਿੱਖ ਇਤਿਹਾਸ ਦੀਆਂ “ਸ਼ੁੱਧ ਤਾਰੀਖ਼ਾਂ”  ਸੰਗਤਾਂ ਦੇ ਸਨਮੁੱਖ ਪੇਸ਼ ਕੀਤੀਆਂ ਹਨ।

ਦੂਜੇ ਪਾਸੇ ਤੁਸੀਂ ਇਹ ਦਾਵਾ ਕਰਦੇ ਹੋ ਕਿ ਨਾਨਕਸ਼ਾਹੀ ਕੈਲੰਡਰ ਦੀਆਂ ਤਾਰੀਖ਼ਾਂ ਗਲਤ ਹਨ, ਫਰਜ਼ੀ ਹਨ, ਇਤਿਹਾਸ ਨੂੰ ਬਿਗਾੜਨ ਵਾਲੀਆਂ ਹਨ। ਹੈਰਾਨੀ ਦੀ ਗੱਲ ਹੈ ਕਿ ਜਦੋਂ ਤੁਹਾਡੇ ਘਰ ਬੈਠ ਕੇ ਨਿਰਧਾਰਿਤ ਕੀਤੀ ਗਈ “ਸ਼ੁੱਧ ਤਰੀਖਾਂ” ਨੂੰ ਬਦਲ ਦਿੱਤਾ ਗਿਆ ਸੀ, ਤੁਹਾਨੂੰ ਤਾਂ ਕੋਠੇ ਤੇ ਚੜ ਕੇ ਰੌਲਾ ਪਾਉਣਾ ਚਾਹੀਦਾ ਸੀ।ਤੁਸੀਂ ਪਿਛਲੇ 15 ਸਾਲਾਂ ਤੋਂ (ਮਾਰਚ 2003 ਤੋਂ 2018) ਤੋਂ  ਚੁੱਪ ਕਿਉ ਹੋ?ਤੁਸੀਂ ਤਾਂ ਵਾਰ-ਵਾਰ ਬੇਨਤੀ ਕਰਨ ਤੇ ਵੀ ਉਹ ਤਾਰੀਖ਼ਾਂ ਪੇਸ਼ ਨਹੀਂ ਕਰ ਰਹੇ।

ਅਨੁਰਾਗ ਸਿੰਘ ਜੀ ! ਅੱਜ ਫੇਰ ਬੇਨਤੀ ਕਰ ਰਿਹਾ ਹਾਂ ਕਿ ਸਿੱਖ ਇਤਿਹਾਸ ਦੀਆਂ “ਸ਼ੁੱਧ ਤਾਰੀਖ਼ਾਂ” ਜਿਹੜੀਆਂ ਤੁਹਾਡੇ ਘਰ ਬੈਠ ਕੇ 23 ਮਾਰਚ 2003 ਨੂੰ ਨਿਰਧਾਰਿਤ ਕੀਤੀਆਂ ਗਈਆਂ ਸਨ, ਨੂੰ 29 ਅਪ੍ਰੈਲ 2018, ਦਿਨ ਐਤਵਾਰ ਤੋਂ ਪਹਿਲਾ-ਪਹਿਲਾ ਪੇਸ਼ ਕੀਤਾ ਜਾਵੇ। ਨਹੀਂ ਤਾਂ 30 ਅਪ੍ਰੈਲ ਦਿਨ ਸੋਮਵਾਰ ਨੂੰ ਤੁਹਾਨੂੰ ਝੂਠਾ, ਬੇਈਮਾਨ ਅਤੇ ਫਰੇਬੀ ਐਲਾਨ ਦਿੱਤਾ ਜਾਵੇਗਾ। ਉਹ ਸਾਰੇ ਸ਼ਬਦ ਜੋ ਹੁਣ ਤੀਕ ਤੁਸੀਂ ਮੇਰੇ ਲਈ ਵਰਤਦੇ ਰਹੋ ਹੋ, ਜਿਵੇ ਪੇਟੀ ਬੰਦ ਦਿਮਾਗ, ਭਾੜੇ ਦਾ ਟੱਟੂ, ਪੱਕਾ ਢੀਠ, ਇਲਤੀ, ਸ਼ਰਾਰਤੀ, ਸਰਕਾਰੀ ਪਿੱਠੂ ਆਦਿ ਤੁਹਾਡੇ ਨਾਮ ਨਾਲ ਜੋੜ ਦਿੱਤੇ ਜਾਣਗੇ। ਅੱਗੋਂ ਤੋਂ ਤੁਹਾਡੀਆਂ ਜੱਬਲੀਆਂ ਦਾ ਜਵਾਬ ਦੇਣ ਵੇਲੇ, ਤੂਹਾਨੂੰ ਇਨ੍ਹਾਂ ਸ਼ਬਦਾਂ ਨਾਲ ਹੀ ਸੰਬੋਧਨ ਕੀਤਾ ਜਾਵੇਗਾ।

ਧੰਨਵਾਦ

ਸਰਵਜੀਤ ਸਿੰਘ ਸੈਕਰਾਮੈਂਟੋ

4/20/2018

ਪੱਤਰ ਨੰਬਰ 18

ਲੈ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਜੀ !

ਵਾਹਿਗੁਰੂ ਜੀ ਕਾ ਖਾਲਸਾ। ਵਾਹਿਗੁਰੂ ਜੀ ਕੀ ਫ਼ਤਿਹ।

ਕਰਨਲ ਨਿਸ਼ਾਨ ਜੀ !  ਤੁਸੀਂ ਲਿਖਿਆ ਹੈ, “ਇਹ ਸਾਰੇ ਬਿਕਰਮੀ ਕੈਲੰਡਰ ਦੇ ਹੀ ਹਿੱਸੇ ਪੁਰਜੇ ਹਨ, ਕਿਸੇ ਦੂਸਰੇ ਕੈਲੰਡਰ ਤੋਂ ਨਹੀਂ ਲਏ ਗਏ, ਇਸੇ ਲਈ ਇਹ ਮਰਸਡੀ ਕਾਰ ਰੂਪੀ ਕੈਲੰਡਰ ਪਿਛਲੇ 2000 ਸਾਲਾਂ ਤੋਂ ਬਿਨਾਂ ਵਿਘਨ ਤੋਂ ਚਲ ਰਿਹਾ ਹੈ”।  ਇਹ ਤਾਂ ਮੈਂ ਪਿਛਲੇ ਪੱਤਰ ਵਿੱਚ ਹੀ ਲਿਖ ਦਿੱਤਾ ਸੀ ਕਿ ਇਸ ਕੈਲੰਡਰ ਦਾ 2075 ਸੰਮਤ ਹੈ। ਸਵਾਲ ਤਾਂ ਇਹ ਸੀ ਕਿ ਇਸ ਕੈਲੰਡਰ ਤੇ ਤੁਸੀਂ ਨਾਨਕਸ਼ਾਹੀ 550 ਕਿਵੇਂ ਲਿਖ ਸਕਦੇ ਹੋ ? ਬਿਕ੍ਰਮੀ ਕੈਲੰਡਰ ਸਿਰਫ ਨਾਮ ਬਦਲਣ ਨਾਲ ਹੀ ਸਿੱਖ ਕੈਲੰਡਰ ਕਿਵੇਂ ਬਣ ਗਿਆ ? ਇਹ ਕੈਲੰਡਰ ਤਾਂ ਆਪਣੇ ਤਰੀਕੇ ਨਾਲ ਹੀ ਚਲੇਗਾ।

ਕਰਨਲ ਨਿਸ਼ਾਨ ਜੀ !  ਮੈਂ ਇਹ ਸਮਝਿਆ ਹਾਂ ਕਿ ਤੁਸੀਂ ਬਿਕ੍ਰਮੀ ਕੈਲੰਡਰ ਨੂੰ ਛੱਡਣਾ ਨਹੀਂ ਚਾਹੁੰਦੇ, ਪਰ ਤੁਹਾਡੇ ਵਿੱਚ ਸੱਚ ਲਿਖਣ ਦੀ ਸਮਰੱਥਾ ਨਹੀਂ ਹੈ। ਹੁਣ ਇਹ ਦੱਸੋ ਕਿ ਤੁਹਾਡੇ ਜਵਾਬ ਨੰਬਰ 27 ਦਾ ਕੀ ਕਰੀਏ ?

ਮੈਂ ਤੁਹਾਡੇ ਪਿਛਲੇ ਪੱਤਰ ਦਾ ਜਵਾਬ ਲਿਖ ਹੀ ਰਿਹਾ ਸੀ ਕਿ ਤੁਹਾਡੀ ਇਕ ਹੋਰ ਈ ਮੇਲ ਮਿਲੀ ਹੈ। ਜਿਸ ਵਿੱਚ ਤੁਸੀਂ ਲਿਖਿਆ ਹੈ, “ਤੁਹਾਡਾ ਇੱਕ ਅਖ਼ਬਾਰੀ ਬਿਆਨ ਮੇਰੇ ਧਿਆਨ ਵਿਚ ਲਿਆਂਦਾ ਗਿਆ ਹੈ, ਜੋ ਬਿਲਕੁਲ ਝੂਠਾ ਹੈ”। ਕਰਨਲ ਨਿਸ਼ਾਨ ਜੀ !  ਤੁਹਾਡਾ ਇਹ ਬਿਆਨ 100% ਝੂਠ ਹੈ। ਜੇ ਤੂਹਾਨੂੰ ਯਾਦ ਹੋਵੇ ਤਾਂ ਇਸ ਸਬੰਧ ਵਿੱਚ ਮੈਂ ਤੁਹਾਡੇ ਸਮੇਤ ਹੋਰ ਬਹੁਤ ਸਾਰੇ ਸੱਜਣਾ ਨੂੰ 2 ਦਸੰਬਰ 2017 ਨੂੰ ਈ ਮੇਲ ਕੀਤੀ ਸੀ।

ਲੈ: ਕਰਨਲ ਸੁਰਜੀਤ ਸਿੰਘ ਨਿਸ਼ਾਨ ਜੀ !

ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫਤਹਿ।

ਨਿਸ਼ਾਨ ਜੀ !  ਜਿਵੇ ਕਿ ਆਪ ਜੀ ਜਾਣਦੇ ਹੀ ਹੋ, ਕਿ ਤੁਹਾਡੀ ਕਿਤਾਬ, “ਗੁਰਪੁਰਬ ਦਰਪਣ” ਦੇ ਪੰਨਾ 95 ਉੱਪਰ ਇਹ ਚੁਣੌਤੀ ਦਰਜ ਹੈ। ਮੈਂ ਇਹ ਚੁਣੌਤੀ ਪ੍ਰਵਾਨ ਕਰਦਾ ਹਾਂ। ਆਪਣੀ ਸਾਰੀ ਗੱਲਬਾਤ ਲਿਖਤੀ ਰੂਪ ਵਿਚ ਹੋਵੇਗੀ ਤਾਂ ਜੋ ਦੁਨੀਆ ਦੇ ਕੋਨੇ-ਕੋਨੇ ਵਿੱਚ ਬੈਠੀਆਂ ਸਿੱਖ ਸੰਗਤਾਂ, ਇਸ ਨੂੰ ਨਾਲੋਂ ਨਾਲ ਹੀ ਪੜ੍ਹ ਸਕਣ। ਮੈਂ ਆਪਣੇ ਵੱਲੋਂ,www.Sikhmarg.com ਪੇਸ਼ ਕਰਦਾ ਹਾਂ ਜਿਸ ਦਾ ਈ-ਮੇਲ ਪਤਾ ਹੈ,info@sikhmarg.com. ਜਿਹੜਾ ਮੰਚ ਆਪ ਜੀ ਨੂੰ ਪਸੰਦ ਹੋਵੇ, ਉਸ ਦਾ ਪਤਾ ਤੁਸੀਂ ਦੱਸ ਦਿਓ ਮੈਨੂੰ ਪ੍ਰਵਾਨ ਹੋਵੇਗਾ।

ਨਿਸ਼ਾਨ ਜੀ ! ਜੇਕਰ ਆਪ ਜੀ ਇਸ ਚੁਣੌਤੀ ਨੂੰ ਵਾਪਸ ਲੈਣਾ ਚਾਹੋ ਤਾਂ 9 ਦਸੰਬਰ 2017 ਈ: ਦਿਨ ਸ਼ਨਿਚਰਵਾਰ ਤੋਂ ਪਹਿਲਾਂ-ਪਹਿਲਾਂ ਵਾਪਸ ਲੈਣ ਦਾ ਐਲਾਨ ਵੀ ਕਰ ਸਕਦੇ ਹੋ। ਨਹੀਂ ਤਾਂ 10 ਦਸੰਬਰ 2017 ਈ: ਦਿਨ ਐਤਵਾਰ ਤੋਂ ਆਪਾ ਵਿਚਾਰ ਚਰਚਾ ਆਰੰਭ ਕਰਾਂਗੇ।

ਸਤਿਕਾਰ ਸਹਿਤ

ਸਰਵਜੀਤ ਸਿੰਘ ਸੈਕਰਾਮੈਂਟੋ 12/2/2017

ਦੂਜੀ ਈ ਮੇਲ 10 ਦਸੰਬਰ ਨੂੰ, ਤੀਜੀ ਈ ਮੇਲ 17 ਦਸੰਬਰ, ਚੌਥੀ ਈ ਮੇਲ 24 ਦਸੰਬਰ, ਪੰਜਵੀਂ 30 ਦਸੰਬਰ 2017 ਅਤੇ ਛੇਵੀਂ 7 ਜਨਵਰੀ 2018 ਨੂੰ ਕੀਤੀ ਸੀ। ਇਸੇ ਸਮੇਂ ਦੌਰਾਨ 30 ਦਸੰਬਰ ਨੂੰ ਤੁਹਾਡੀ ਈ ਮੇਲ ਮਿਲੀ ਸੀ, ਜਿਸ ਵਿੱਚ ਤੁਸੀਂ ਲਿਖਿਆ ਸੀ, “ਜੇ ਤੁਸੀਂ 23 ਪੋਹ ਬਿਕਰਮੀ ਅਤੇ 23 ਪੋਹ ਪੁਰੇਵਾਲ ਵਾਲੇ 2003 ਵਾਲੇ ਕੈਲੰਡਰ ਵਿਚ ਅਜੇ ਤੱਕ ਫਰਕ ਨਹੀਂ ਸਮਝ ਸਕੇ ਤਾਂ 1 ਲੱਖ ਇਨਾਮ ਲੈਣ ਲਈ ਤੁਹਾਨੂੰ ਹਾਲੇ ਬਹੁਤ ਮਿਹਨਤ ਕਰਨ ਦੀ ਲੋੜ ਹੈ”। ਅੱਜ ਤੁਸੀਂ ਲਿਖਿਆ ਹੈ, “ਤੁਹਾਡਾ ਇੱਕ ਅਖ਼ਬਾਰੀ ਬਿਆਨ ਮੇਰੇ ਧਿਆਨ ਵਿਚ ਲਿਆਂਦਾ ਗਿਆ ਹੈ, ਜੋ ਬਿਲਕੁਲ ਝੂਠਾ ਹੈ”।

ਕਰਨਲ ਨਿਸ਼ਾਨ ਜੀ !  ਅਨੁਰਾਗ ਸਿੰਘ ਵਾਂਗੂੰ ਤੁਸੀਂ ਵੀ ਝੂਠ ਲਿਖਣਾ ਆਰੰਭ ਕਰ ਦਿੱਤਾ ਹੈ ?

ਮੇਰੇ ਪੱਤਰ ਅੱਜ ਵੀ ਸਿੱਖ ਮਾਰਗ ਤੇ ਪੜ੍ਹੇ ਜਾ ਸਕਦੇ ਹਨ।

http://www.sikhmarg.com/your-view/your-view138.html

http://www.sikhmarg.com/your-view/your-view139.html

ਕਰਨਲ ਨਿਸ਼ਾਨ ਜੀ !  ਜਦੋਂ ਤੁਸੀਂ ਕਿਤਾਬ ਲਿਖੀ ਸੀ ਉਦੋਂ ਨਹੀਂ ਸੀ ਸੋਚਿਆ ਕਿ ਸਵਾਲ ਵੀ ਆ ਸਕਦੇ ਹਨ ? ਤੁਹਾਡੇ ਵੱਲੋਂ ਰੱਖੇ ਗਏ ਇਕ ਲੱਖ ਰੁਪਏ ਦੇ ਇਨਾਮ (ਪੰਨਾ 95) ਬਾਰੇ ਵਿਚਾਰ ਕਰਨ ਦਾ ਯਤਨ ਕੀਤਾ ਤਾਂ ਤੁਸੀਂ ਕੋਈ ਲੜ-ਸਿਰਾ ਨਹੀਂ ਫੜਾਇਆ। ਹੁਣ ਕਿਤਾਬ ਵਿੱਚ ਪੰਨਾ 17 ਉੱਪਰ ਦਰਜ ਤੁਹਾਡੇ ਨਿਮਰਤਾ ਭਰੇ ਸ਼ਬਦਾਂ ਤੋਂ ਪ੍ਰਭਾਵਤ ਹੋ ਕੇ ਮੈਂ ਆਪ ਜੀ ਨਾਲ ਵਿਚਾਰ ਆਰੰਭ ਕੀਤੀ ਹੈ, ਹੁਣ ਫੇਰ ਤੁਸੀਂ ਗਿਲਾ ਪੀਹਣ ਪਾ ਕੇ ਬੈਠ ਗਏ ਹੋ, ਹੁਣ ਤੁਹਾਡੀ ਨਿਮਰਤਾ, ਕਫੂਰ ਕਿਉਂ ਹੋ ਗਈ ਹੈ ? ਨਾ ਤੁਸੀਂ ਕੁਝ ਸਮਝਾਉਣ ਨੂੰ ਤਿਆਰ ਹੋ, ਨਾ ਤੁਸੀਂ ਕੁਝ ਮੰਨਣ ਨੂੰ ਤਿਆਰ ਹੋ। ਲਗਭਗ ਮਹੀਨਾ ਹੋ ਗਿਆ ਪੱਤਰ ਲਿਖਦਿਆਂ ਨੂੰ, ਅਜੇ ਤਾਈਂ ਇਕ ਸਵਾਲ (27) ਦਾ ਫੈਸਲਾ ਨਹੀਂ ਹੋ ਸਕਿਆ। ਹੋਰ ਕਈ ਸਵਾਲ ਹਨ ਜਿਨ੍ਹਾਂ ਤੇ ਵਿਚਾਰ ਕੀਤੀ ਜਾਣੀ ਜਰੂਰੀ ਹੈ। ਕਰਨਲ ਨਿਸ਼ਾਨ ਜੀ !  ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਜੇ ਵਿਚਾਰ ਚਰਚਾ ਕਰਨ ਦੇ ਸਮਰੱਥ ਨਹੀਂ ਹੋ ਤਾਂ “ਦੋ ਸ਼ਬਦਾਂ” ਵਿੱਚ ਗੱਲ ਨਿਬੇੜ ਦਿਓ।

ਸਪੱਸ਼ਟ ਹੁੰਗਾਰੇ ਦੀ ਉਡੀਕ ਵਿੱਚ

ਸਰਵਜੀਤ ਸਿੰਘ ਸੈਕਰਾਮੈਂਟੋ 4/17/2018

ਪੱਤਰ ਨੰਬਰ 17

ਸ: ਸਰਬਜੀਤ ਸਿੰਘ ਜੀਓ !

ਵਾਹਿਗੁਰੂ ਜੀ ਕਾ ਖਾਲਸਾ ਵਾਹਿਗੁਰੂ ਜੀ ਕੀ ਫ਼ਤਿਹ॥

1. ਤੁਹਾਡਾ ਇੱਕ ਅਖਬਾਰੀ ਬਿਆਨ ਮੇਰੇ ਧਿਆਨ ਵਿਚ ਲਿਆਂਦਾ ਗਿਆ ਹੈ ਜੋ ਬਿਲਕੁਲ ਝੂਠਾ ਹੈ। ਮੈਂ ਆਪਣੀ ਲਿਖਤ ”ਇੱਕ ਲੱਖ ਦਾ ਇਨਾਮ” ਤੇ ਅੱਜ ਵੀ ਕਾਇਮ ਹਾਂ, ਕਦੇ ਮੁਕਰਿਆ ਨਹੀਂ। ਤੁਹਾਨੂੰ ਜਿਸ ਦਿਨ 23 ਪੋਹ 198 ਨਾਨਕਸ਼ਾਹੀ/ ਬਿਕਰਮੀ 1723 ਮੁਤਾਬਿਕ 22 ਦਿਸੰਬਰ1666 ਅਤੇ 23 ਪੋਹ ਨਾਨਕਸ਼ਾਹੀ 198 (ਪੁਰੇਵਾਲ) ਮੁਤਾਬਿਕ 5 ਜਨਵਰੀ 1667 ਵਿਚ ਫਰਕ ਦੀ ਸਮਝ ਆ ਜਾਏਗੀ ਤਾਂ ਤੁਹਾਨੂੰ ਮੇਰੀਆਂ ਦਲੀਲਾਂ ਦੀ ਸਾਰਥਕਤਾ ਦਾ ਪਤਾ ਲੱਗ ਜਾਏਗਾ। ਤੁਹਾਨੂੰ ਤਾਂ ਅਜੇ ਬਿਕਰਮੀ ਕੈਲੰਡਰ ਅਤੇ ਹਿੰਦੂ ਬਿਕਰਮੀ ਕੈਲੰਡਰ, ਗ੍ਰੀਗੋਰੀਅਨ ਕੈਲੰਡਰ ਅਤੇ ਕ੍ਰਿਸਚੀਅਨ ਗ੍ਰੀਗੋਰੀਅਨ ਕੈਲੰਡਰ ਵਿਚ ਕੀ ਫ਼ਰਕ ਹੈ, ਇਨ੍ਹਾਂ ਬੁਣਿਆਦੀ ਨੁਕਤਿਆਂ ਬਾਰੇ ਹੀ ਪਤਾ ਨਹੀਂ। ਜਿਵੇਂ ਕਿ ਮੈਂ ਪਹਿਲਾਂ ਲਿਖਿਆ ਸੀ ਇਹ ਫ਼ਰਕ ਸਮਝਣ ਲਈ ਤੁਹਾਨੂੰ ਹੋਰ ਜ਼ਿਆਦਾ ਮਿਹਣਤ ਕਰਨ ਦੀ ਲੋੜ ਹੈ।

2. ਮੈਂ ਗੁਰ ਪੁਰਬ ਦਰਪਣ ਰਾਹੀਂ ਸੰਗਤਾਂ ਵਿਚੋਂ ਉਹ ਭਰਮ ਭੁਲੇਖੇ ਦੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ, ਜੋ ਕੈਲੰਡਰਾਂ ਦੇ ਸਬੰਧ ਵਿਚ ਕੁੱਝ ਸਾਲਾਂ ਤੋਂ ਪਰਚਾਰੇ ਜਾ ਰਹੇ ਹਨ।.

3 ਕੈਲੰਡਰ ਚਾਹੇ ਚੰਦਰਮੀ ਹੋਵੇ ਅਤੇ ਚਾਹੇ ਸੂਰਜੀ ਜੇ ਕਰ ਉਹ ਵਿਗਿਆਨਕ ਢੰਗ ਤਰੀਕਿਆਂ ਨਾਲ ਨਹੀਂ ਬਣਦਾ ਤਾਂ ਉਹ ਇੱਕ ਛਲਾਵਾ ਹੈ, ਹੋਰ ਕੁੱਝ ਨਹੀਂ।

4. ਕਿਸੇ ਵੀ ਇਤਿਹਾਸਕ ਤਾਰੀਖ਼ ਨੂੰ ਕਿਸੇ ਕੈਲੰਡਰ ਦੇ ਜ਼ਰੀਏ ਨਹੀਂ ਬਦਲਿਆ ਜਾ ਸਕਦਾ। ਪਰ ਇਹ ਕਾਰਨਾਮਾਂ ਪੁਰੇਵਾਲ ਵਾਲੇ ਕੈਲੰਡਰ ਨੇ ਕਰ ਵਿਖਾਇਆ ਹੈ ਜਿਸ ਵਿਚ ਗੁਰਪੁਰਬਾਂ ਦੀਆਂ ਸਾਰੀਆਂ ਸੂਰਜੀ ਤਾਰੀਖ਼ਾਂ ਗਲਤ ਮਿਥੀਆਂ ਗਈਆਂ ਹਨ। ਇਹ ਸੋਝੀ ਆਉਣ ਤੇ ਹੀ ਸ਼ਰੋਮਣੀ ਕਮੇਟੀ ਨੇ ਇਸ ਕੈਲੰਡਰ ਨੂੰ ਤਿਆਗਿਆ ਹੈ।

5. ਸਿੱਖ ਕੈਲੰਡਰ ਸਬੰਧੀ ਮੇਰੀ ਸੋਚ ਅਤੇ ਮੇਰੀਆਂ ਦਲੀਲਾਂ 28 ਸੁਆਲਾਂ ਦੇ ਰੂਪ ਵਿਚ ਸਭ ਦੇ ਸਾਹਮਣੇ ਹਨ ਤੁਹਾਡੇ 4/4 ਵਾਲੇ ਪੱਤਰ ਵਿਚ ਕੀਤੀ ਸਿਫ਼ਾਰਸ਼ ”ਕਿ ਕਿਹੋ ਜਿਹੀਆਂ ਦਲੀਲਾਂ ਦਿੰਦੇ ਹੋਣਗੇ” ਮੁਤਾਬਿਕ ਕਿਸੇ ਨੂੰ ਅੰਦਾਜ਼ਾ ਲਗਾਉਣ ਦੀ ਲੋੜ ਨਹੀਂ।

4/17/2018