ਜ਼ਿੰਦਗੀ ਦੀ ਰਫ਼ਤਾਰ
– ਗੁਰਪ੍ਰੀਤ ਸਿੰਘ, ਯੂ.ਐੱਸ.ਏ
ਕੀ ਸੁਣਾਵਾਂ ਮੈ, ਦੋ ਆਰ ਦੀਆਂ |
ਇਸ਼ਕ ਵਾਲੀਆਂ ਗੱਲਾਂ ਨੇ ਹੁਣ, ਪਾਰ ਦੀਆਂ | |
ਗੀਤਾਂ ਦੇ ਸਨ ਮੌਸਮ, ਪੈਲਾਂ ਬਹਾਰ ਦੀਆਂ |
ਗਲੀ ਗਲੀ ਸਨ ਹੁੰਦੀਆਂ, ਗੱਲਾਂ ਪਿਆਰ ਦੀਆਂ | |
ਚੋਹੀਂ ਪਾਸੀਂ ਸਨ ਧੂੰਮਾਂ, ਇੱਜ਼ਤ ਤੇ ਸਤਿਕਾਰ ਦੀਆਂ |
ਕੌਣ ਕਰਦਾ ਸੀ ਗੱਲਾਂ ਕਦੀ, ਜਿੱਤ ਤੇ ਹਾਰ ਦੀਆਂ | |
ਨਕਦ ਉਧਾਰ ਨਾ ਕੋਈ, ਗੱਲਾਂ ਸਨ ਇਤਬਾਰ ਦੀਆਂ |
ਨਾ ਉਸ ਦੇ ਇਨਕਾਰ ਦੀਆਂ, ਨਾ ਤੇਰੇ ਮੇਰੇ ਤਕਰਾਰ ਦੀਆਂ | |
ਕੀਡ਼ੀਆਂ ਸਨ ਪੀਢੀਆਂ, ਮਹਿਕਣ ਤੰਦਾਂ ਇਕਰਾਰ ਦੀਆਂ |
ਕਰੇ ਕੌਣ ਯਕੀਨ, ਗੱਲਾਂ ਸਨ ਇਸੇ ਗੁਲਜ਼ਾਰ ਦੀਆਂ | |
ਦਿਲ ਦੀਆਂ ਕੋਠੜੀਆਂ ਹੁਣ, ਬਣੀਆਂ ਨੇ ਗਾਰ ਦੀਆਂ |
ਜਿਹਦੇ ਲੱਗਣ ਦਾਅ, ਹੱਕ ਸਭਨਾਂ ਦੇ ਮਾਰ ਦੀਆਂ | |
ਸਵਾਹ ਨੂੰ ਸੋਨਾ ਦੱਸ ਵੇਚਦੇ, ਖਾਂਦੇ ਸੋਹਾਂ ਕਰਤਾਰ ਦੀਆਂ |
ਪ੍ਰਦੇਸਾਂ ਦੀਆਂ ਨਹੀਂ, ਗੱਲਾਂ ਨੇ ਇਸੇ ਬਜ਼ਾਰ ਦੀਆਂ | |
ਅਸਲ ਗੱਲਾਂ ਤੇ ਨੇ, ਜ਼ਿੰਦਗੀ ਦੀ ਰਫ਼ਤਾਰ ਦੀਆਂ |
ਹੋਵਣ ਸ਼ਾਇਦ ਇਹ ਵੀ, ਗੁੱਝੀਆਂ ਚਾਲਾਂ ਸਰਕਾਰ ਦੀਆਂ | |
ਤੂੰ ਵਸਦਾ ਏ ਤਾਂ, ਵਸਦਾ ਰਹਿ ” ਪ੍ਰੀਤ”
ਡਾਰੋਂ ਖੁੰਝੀਆਂ ਹੀ ਜਾਨਣ, ਕਦਰਾਂ ਯਾਰ ਦੀਆਂ | |
