(ਸ. ਜੱਸਾ ਸਿੰਘ ਆਹਲੂਵਾਲੀਏ ਨੂੰ ਸਮਰਪਿਤ)
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਵਿਚ ਮੈਦਾਨੇ ਰਿਹਾ ਜੂਝਦਾ ਸੀਸ ਤਲੀ ’ਤੇ ਧਰ ਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਜ਼ਿਲ੍ਹਾ ਲਾਹੌਰ ਦੇ ਆਹਲੂ ਪਿੰਡ ਵਿਚ, ਬਦਰ ਸਿੰਘ ਸੀ ਰਹਿੰਦਾ,
ਕਰਕੇ ਸੁੱਚੀ ਕਿਰਤ ਕਮਾਈ, ਮੁੱਖੋਂ ਸਤਿਨਾਮ ਸੀ ਕਹਿੰਦਾ ।
ਲੋਕ ਪ੍ਰਲੋਕ ਸਵਾਰੇ ਬਾਣੀ ਗੁਰੂ ਗ੍ਰੰਥ ਦੀ ਪੜ੍ਹ ਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਛੋਟੀ ਉਮਰੇ ਸਿਰ ਤੋਂ ਉਠ ਗਿਆ,ਜਦੋਂ ਪਿਤਾ ਦਾ ਸਾਇਆ,
ਆਹਲੂਵਾਲੀਏ ਉਸ ਵਕਤ ਨੂੰ ਹੌਂਸਲੇ ਨਾਲ ਲੰਘਾਇਆ ।
ਵੱਧਦਾ ਰਿਹਾ ਵੱਲ ਅਗਾਂਹ ਨੂੰ, ਦੁੱਖ ਤਕਲੀਫ਼ਾਂ ਜਰ ਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਮਾਤਾ ਸੁੰਦਰੀ ਨੇ ਜੱਸੇ ’ਤੇ ਨਜ਼ਰ ਮਿਹਰ ਦੀ ਕੀਤੀ,
ਪੁੱਤ ਸਮਝ ਕੇ ਤੋੜ ਨਿਭਾਈ, ਉਸ ਦੇ ਨਾਲ ਪ੍ਰੀਤੀ ।
ਸ਼ਸਤਰ ਸੌਂਪ ਕੇ ਆਖਿਆ, ਜੀਣਾ ਨਹੀਂ ਕਿਸੇ ਤੋਂ ਡਰ ਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਗੁਰੂ ਸਮਝ ਕੇ ਗ੍ਰੰਥ ਸਾਹਿਬ ਤੋਂ, ਲੈਂਦਾ ਰਿਹਾ ਅਗਵਾਈ,
ਇਸ ਅਗਵਾਈ ਨੇ ਹੀ ਉਸ ਨੂੰ, ਜੀਵਨ ਜਾਚ ਸਿਖਾਈ ।
ਚੁੱਕੇ ਹੋਏ ਕਦਮ ਕਦੇ ਨਾ, ਪਿੱਛੇ ਵੱਲ ਨੂੰ ਸਰਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਮੱਘਦੇ ਸੂਰਜ ਵਰਗੀ ਸੀ, ਉਸ ਦੇ ਚੇਹਰੇ ’ਤੇ ਲਾਲੀ,
ਕੰਬਦਾ ਸੀ ਤੱਕ ਕੇ ਜਿਸ ਨੂੰ, ਅਹਿਮਦ ਸ਼ਾਹ ਅਬਦਾਲੀ ।
ਮੁੜ ਜਾਂਦਾ ਸੀ ਖ਼ਾਲੀ ਆਪਣੀ ਜਿੱਤੀ ਬਾਜੀ ਹਰਕੇ।
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
ਏਨਾ ਸੌਖਾ ਹੁੰਦਾ ਨਹੀਂ, ਸੁਲਤਾਨ ਕੌਮ ਦਾ ਬਣਨਾ,
ਦੁਸ਼ਮਣ ਦੀਆਂ ਬੰਦੂਕਾਂ ਅੱਗੇ ਸੀਨਾ ਪੈਂਦਾ ਤਣਨਾ ।
ਬਿਨ ਕੁਰਬਾਨੀ ਨਹੀਂ ਬਦਲਦੇ, ਕਦੇ ਇਤਿਹਾਸ ਦੇ ਵਰਕੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
‘ਚੋਹਲੇ ਵਾਲਿਆ’ ਜਗ ਦੇ ਉੱਤੇ, ਆਉਂਦੇ ਵਿਰਲੇ ਟਾਵੇਂ,
ਭਰੇ ਹੁੰਦੇ ਕੁਰਬਾਨੀਆਂ ਦੇ ਨਾਲ, ਜਿਹਨਾਂ ਦੇ ਸਿਰਨਾਵੇਂ ।
ਤਾਹੀਓਂ ਸੀਸ ਝੁਕਾਉਂਦੇ ਲੋਕੀਂ, ਆ ਉਨ੍ਹਾਂ ਦੇ ਦਰ ’ਤੇ,
ਜੱਸਾ ਸਿੰਘ ਨੇ ਜਸ ਖੱਟ ਲਿਆ, ਕੌਮ ਦੀ ਸੇਵਾ ਕਰਕੇ ।
-ਰਮੇਸ਼ ਬੱਗਾ ਚੋਹਲਾ, ਗਲੀ ਨੰਬਰ 8 ਰਿਸ਼ੀ ਨਗਰ ਐਕਸਟੈਂਸ਼ਨ (ਲੁਧਿਆਣਾ) 94631-32719
—-0—–
