ਦਸਤਾਰ ਦੀ ਦਾਸਤਾਨ

0
345

ਦਸਤਾਰ ਦੀ ਦਾਸਤਾਨ

ਅੱਜ ਕਿੱਸਾ ਇੱਕ ਸੁਣਾਉਣ ਲੱਗਾ, ਨਵਾਂ ਨਹੀਂ, ਪੁਰਾਣਾ ਛੂਹਣ ਲੱਗਾ।

ਲੱਗਦੀ ਸਿਰ ’ਤੇ ਭਾਰੀ ਜੋ, ਮੋੜ ਓਥੇ ਹੀ ਗੱਲ ਲਿਆਉਣ ਲੱਗਾ।

ਸਫ਼ਰ ਲੰਬਾ ਹੈ ਇਸ ਦੀ ਦਾਸਤਾਨ ਦਾ, ਬੜੀਆ ਔਕੁੜਾਂ ਤੇ ਸਿਖਰ ਹੈ ਕਸ਼ਟਾਂ ਦੀ।

ਪਰ ਪੂਰੀ ਦੁਨੀਆ ਵਿੱਚ ਸਨਮਾਨਿਤ ਹੈ, ਸਿਰ ਸੋਂਹਦੀ ਦਸਤਾਰ ਜੋ ਸਿੱਖਾਂ ਦੀ।

ਗੱਲ ਮੁੱਕੀ ਨਹੀਂ ਹਾਲੇ ਸ਼ੁਰੂ ਕੀਤੀ, ਉਹ ਸਭ ਸੁਣਾਉਂ ਜੋ ਇਸ ਨਾਲ ਸੀ ਬੀਤੀ।

ਬਾਬਰ ਨੂੰ ਜਾਬਰ ਕਹਿਣ ਦੀ, ਹਿੰਮਤ ਭਰੀ ਹੈ ਇਸ ਅੰਦਰ।

ਸੇਕ ਤਪਦੀ ਤਵੀ ਦਾ ਸਹਾਰ ਕੇ, ਸੀਸ ਚਾਂਦਨੀ ਚੌਂਕ ’ਚ ਇਹ ਵਾਰਦੀ ਏ।

ਉਬਲ਼ਦੀਆਂ ਦੇਗਾਂ ’ਚ ਇਹ ਖਾਵੇ ਉਬਾਲ਼ੇ, ਜੈਕਾਰੇ ਲਾਉਂਦੀ ਏ ਸਰਹਿੰਦ ਦੀ ਦੀਵਾਰ ਅੰਦਰ।

ਖੋਪਰ ਲੁਹਾ ਕੇ ਚਰਖੜੀਆਂ ’ਤੇ ਚੱਕਰ ਲਾਵੇ, ਬੰਦ-ਬੰਦ ਕਟਵਾ ਕੇ ਜਪੁ ਜੀ ਪਈ ਉਚਾਰਦੀ ਏ।

ਮਸੂਮ ਜਿੰਦਾਂ ਦੇ ਚਿਣ, ਗਲ਼ ਮਾਂਵਾਂ ਦੇ ਹਾਰ ਦਿੱਤੇ, ਕਿੰਞ ਨੇਜ਼ਾ ਧਸਿਆ ਦੇਖ ਲੋ, ਮਸੂਮ ਜਿੰਦ ਜਾਨ ਅੰਦਰ।

ਇੱਕ ਝਾਤ ਪਾਵਾਂ ਇਸ ਦੇ ਰੂਹਾਨੀ ਗੁਣਾਂ ਵੱਲ, ਇਮਾਨਦਾਰੀ, ਸਚਾਈ ਤੇ ਹੱਕ-ਸੱਚ ਦਾ ਇਹ ਪਹਿਰਾ ਦੇਵੇ।

ਰਾਹ ਦਇਆ ਦੇ ਤੁਰਦੀ ਇਹ, ਨਿਆਸਰਿਆਂ ਦੇ ਬਣ ਆਸਰੇ, ਮਹਿਫ਼ੂਜ਼ ਹੈ ਪੱਤ ਔਰਤ ਦੀ, ਨਿਰਭਉ ਦੇ ਇਸ ਸੰਕੇਤ ਅੰਦਰ।

ਡੰਗੋਰੀ ਵੀ ਹੈ ਇਹ ਬਿਰਧ ਮਾਪਿਆਂ ਦੀ, ਇੱਕ ਔਰਤ ਦਾ ਸੁਹਾਗ ਇਹ।

ਧੀ ਲਈ ਇਹ ਮੱਕਾ ਬਣਦੀ, ਇੱਕ ਧੀ ਦੇ ਬਾਪ ਹੋਣ ਦਾ ਫ਼ਰਜ਼ ਛੁਪਿਆ ਹੈ ਇਸ ਅੰਦਰ। 

ਫ਼ਖ਼ਰ ਨਾਲ ਹੈ ਇਹ ਆਜ਼ਾਦ ਰਹਿੰਦੀ, ਪੈਣ ਦੇਵੇ ਨ ਜ਼ੰਜੀਰ ਗ਼ੁਲਾਮੀਆਂ ਦੀ।

ਹਿੰਦੂ-ਮੁਸਲਿਮ ਭਾਈਆਂ ਵਿੱਚ ਮੁਹਿੰਮ ਛੇੜੋ, ਦੱਸੋ, ਭਾਈਚਾਰਕ ਸਾਂਝ ਹੈ ਇਸ ਦਸਤਾਰ ਅੰਦਰ।

ਗੁਰਜੀਤ ਸਿੰਘ ਗੀਤੂ 94653-10052