‘ਗੁਰ ਨਾਨਕ ਸਾਹਿਬ’ ਦੇ ਪੁਰਬ ਦਾ ਮਹੱਤਵ

0
260

‘ਗੁਰ ਨਾਨਕ ਸਾਹਿਬ’ ਦੇ ਪੁਰਬ ਦਾ ਮਹੱਤਵ

ਸ. ਸੁਰਿੰਦਰ ਸਿੰਘ ‘ਖਾਲਸਾ’ ਮਿਉਦ ਕਲਾਂ (ਫਤਿਹਾਬਾਦ) ਫੋਨ= 94662 66708, 97287 43287

ਗੁਰਾਂ ਦਾ ਪੁਰਬ ਹੈ ਆਇਆ, ਸਭ ਨੂੰ ਵਧਾਈਆਂ ਨੇ.. ਕਿਸੇ ਜਗਾਏ ਦੀਵੇ ਕਿਸੇ ਲੜੀਆਂ ਲਗਾਈਆਂ ਨੇ।

ਗੁਰ ਪੁਰਬ ’ਤੇ ਸਭ ਮਿਲ ਕੇ ਖੁਸ਼ੀਆਂ ਮਨਾਈਆਂ ਨੇ.. ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਾਈਆਂ ਨੇ।

ਗੁਰ ਪੁਰਬ ਹਰ ਸਾਲ ਹੀ, ਰਲ-ਮਿਲ ਮਣਾਉਂਦੇ ਹਾਂ, ਗੁਰਬਾਣੀ ਤੇ ਇਤਿਹਾਸ ਵੀ ਸੁਣਦੇ ਸੁਣਾਉਂਦੇ ਹਾਂ।

ਰਾਗੀ ਗਾਉਂਦੇ ਬਾਣੀ, ਢਾਡੀਆਂ ਵਾਰਾਂ ਗਾਈਆਂ ਨੇ.. ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।

ਬਿਰਧ ਮਾਈਆਂ ਅੱਜ ਸਭੇ, ਗੁਰੂ ਦੁਆਰੇ ਆਏ ਨੇ, ਰੰਗ ਬਿਰੰਗੇ ਕੱਪੜਿਆਂ ਸਮੇਤ ਬੱਚੇ ਵੀ ਲਿਆਏ ਨੇ।

ਬਜ਼ੁਰਗਾਂ ਵੀ ਆ ਕੇ ਹਾਜ਼ਰੀਆਂ ਲਵਾਈਆਂ ਨੇ… ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।

ਕੋਈ ਸੰਭਾਲੇ ਜੋੜੇ, ਕੋਈ ਪਾਣੀ ਪਿਲਾਉਂਦਾ ਏ, ਸੰਗਤਾਂ ਦੀ ਸਹੂਲਤ ਲਈ ਕੋਈ ਰਾਹ ਵਿਖਾਉਂਦਾ ਏ।

ਗੱਭਰੂਆਂ ਸੇਵਾ ਦੀਆਂ ਇਉਂ ਡਿਊਟੀਆਂ ਨਿਭਾਈਆਂ ਨੇ.. ਕਿਸੇ ਨੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਾਈਆਂ ਨੇ।

ਨਗਰ ਕੀਰਤਨ ਦਾ ਮਤਾ ਵੀ ਸਭ ਮਿਲ ਪਕਾਇਆ ਏ, ਜੱਥਾ ਕਵੀਸ਼ਰੀ ਇਸ ਰੌਣਕ ਲਈ ਬੁੱਕ ਕਰਵਾਇਆ ਏ।

ਪ੍ਰਭਾਤ ਫੇਰੀਆਂ ਕਈ ਦਿਨਾਂ ਤੋਂ ਚਲਦੀਆਂ ਆਈਆਂ ਨੇ…..ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।

ਪਾਠ ਗੁਰਬਾਣੀ ਦੇ ਕੀਤੇ ਤੇ ਅੱਜ ਭੋਗ ਵੀ ਪਾਏ ਨੇ, ਸਰੀਰਕ ਤ੍ਰਿਪਤੀ ਲਈ ਵੀ ਲੰਗਰ ਬਣਵਾਏ ਨੇ।

ਸ਼ਰਧਾ ਨਾਲ ਵਰਤਾਉਂਦੇ, ‘ਸੰਗਤਾਂ’ ਪੰਗਤਾਂ ਲਾਈਆਂ ਨੇ..ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।

ਗਾ ਸੁਣ ਕੇ ਗੁਰਬਾਣੀ, ਗੱਲ ਮੰਨਣ ਦੀ ਆਉਂਦੀ ਐ, ਬਾਣੀ ਦੀ ਜਦ ਮੰਨ ਲਈ, ਜੀਵਨ ਮੁਕਤ ਕਰਾਉਂਦੀ ਐ।

ਸਤਿਗੁਰਾਂ ਨੇ ਅਸਾਂ ਨੂੰ ਇਹ ਗੱਲਾਂ ਸਮਝਾਈਆਂ ਨੇ…. ਕਿਸੇ ਜਗਾਏ ਦੀਵੇ , ਕਿਸੇ ਲੜੀਆਂ ਲਗਾਈਆਂ ਨੇ।

‘ਸੁਰਿੰਦਰ ਸਿੰਘਾ’ ਗੁਰਪੁਰਬ ’ਤੇ ਇਹੀ ਸਿੱਖਿਆ ਲੈਣੀ ਐ, ਕਿ ਸਾਰੀ ਕੌਮ ਹੈ ਬੂਟਾ, ਸਿੱਖ ਉਸੇ ਦੀ ਟਹਿਣੀ ਐ।

ਗੁਰਮਤਿ ਦੇ ਪ੍ਰਚਾਰਕਾਂ ਨੇ ਇਹ ਗੱਲਾਂ ਬਤਾਈਆਂ ਨੇ…. ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।

ਆਤਮ ਪੜਚੋਲ ਹਰ ਪੁਰਬ ’ਤੇ ਕਰਦੇ ਰਹਿਣਾ ਜੀ, ਕੀ ਖਟਿਆ ? ਕੀ ਗਵਾਇਆ ? ਹਿਸਾਬ ਕਰਦੇ ਰਹਿਣਾ ਜੀ।

ਨਿੱਤਨੇਮ ਦੀਆਂ ਕਿੰਨੀਆਂ ਕੁ, ਕੀਤੀਆਂ ਕਮਾਈਆਂ ਨੇ…. ਕਿਸੇ ਜਗਾਏ ਦੀਵੇ, ਕਿਸੇ ਲੜੀਆਂ ਲਗਾਈਆਂ ਨੇ।