ਕੌਣ ਕਹਿੰਦਾ ਅਸੀਂ ਧੂਤੇ ਹਾਂ ?
ਬਾਬਾ ਨਾਨਕ ਜਾਹ ! ਅਸੀਂ ਨਹੀਂ ਸੁਣਨੀ ਤੇਰੀ ਮਿੱਠੀ ਬਾਣੀ।
ਸਾਨੂੰ ਤਾਂ ਬੱਸ ਚੰਗੀ ਲਗਦੀ, ਮਨ-ਘੜਤ ਗੱਪ ਕਹਾਣੀ।।
ਸੱਚ ਸੁਣਾ ਕੇ ਗੁਰੂ ਗ੍ਰੰਥ, ਬੰਦੇ ਨੂੰ ਅਕਾਲ ਦੇ ਲੜ ਲਾਉਂਦੇ ਨੇ।
ਸਾਨੂੰ ਚੰਗੇ ਲੱਗਦੇ ਗ੍ਰੰਥ, ਜਿਹੜੇ ਬੰਦੇ ਨੂੰ ਹੈਵਾਨ ਬਣਾਉਂਦੇ ਨੇ।।
ਗੁਰੂ ਡੰਮ੍ਹ ਨੂੰ ਵਧਾਏ ਜਿਹੜਾ, ਮੰਨਦੇ ਉਸ ਨੂੰ ਸਹੀ ਪ੍ਰਚਾਰ ਹਾਂ ।
ਜੋ ਪ੍ਰਚਾਰੇ ਬਾਣੀ ਗੁਰੂ ਗ੍ਰੰਥ ਦੀ, ਲਾਹੁੰਦੇ ਉਸ ਦੀ ਦਸਤਾਰ ਹਾਂ ।।
ਦੇਖਣ ਨੂੰ ਕਛਹਿਰਾ ਲੱਗੇ ਪਰ ਸਾਡੇ ਚੋਲ਼ੇ ਥੱਲੇ ਧੋਤੀ ਹੈ।
ਗੋਲ ਦੁਮਾਲੇ ਵਿੱਚ ਆਸਾਨੀ ਨਾਲ, ਲੁਕ ਜਾਂਦੀ ਸਾਡੀ ਬੋਦੀ ਹੈ।।
ਗੁਰ ਪੁਰਬ ਛੱਡ; ਮਨਾਈਏ ਅਸ਼ਟਮੀਆਂ, ਨਾਲੇ ਖੇਲੀਏ ਹੋਲੀ ਜੀ।
ਕਾਲ ਦੇ ਪੁਜਾਰੀ ਹਾਂ; ਦੁਰਗਾ, ਚੰਡੀ, ਭਗੌਤੀ ਸਾਡੇ ਬੇਲੀ ਜੀ।
ਵੱਖਰੀ ਮਰਯਾਦਾ ਚਲਾ ਕੇ, ਅਕਾਲ ਤਖ਼ਤ ਦੀ ਪ੍ਰਭੂਸੱਤਾ ਕਰਦੇ ਹਾਂ ਲੀਰੋ-ਲੀਰ।
ਬਿਪਰ ਦੇ ਦੱਸੇ ਕਰਮਕਾਂਡ ਨਿੱਤ ਕਰਦੇ, ਬਿਪਰ ਹੀ ਸਾਡਾ ਗੁਰੂ ਪੀਰ ।।
ਸਾਡੀ ਗੁੰਡਾ-ਗਰਦੀ ਕਾਰਨ, ਹੁਣ ਕਿਸ ਨੇ ਦੀਵਾਨਾਂ ’ਚ ਹਾਜ਼ਰੀ ਭਰਨੀ ਹੈ ?
ਬੁੱਕਲ ਦੇ ਸੱਪ ਬਣ ਕੇ, ਗੁਰੂ ਗ੍ਰੰਥ ਦੀ ਬਾਣੀ ਦੂਜੇ ਨੰਬਰ ’ਤੇ ਕਰਨੀ ਹੈ।।
ਅੱਗੇ ਤਾਂ ਸਨ ਬਹੁਤ ਮੋਜਾਂ, ਗੋਲਕ ’ਤੇ ਹੁਣ ਚੜ੍ਹਾਵਾ ਘੱਟ ਚੜ੍ਹਨਾ ਹੈ।
ਸਿੱਖੀ ਦਾ ਬੇੜਾ ਗਰਕ ਕਰ ਕੇ, ਆਰ. ਐਸ. ਐਸ ਤੋਂ ਨਾਵਾਂ ਮੋਟਾ ਫੜਨਾ ਹੈ।।
ਵੀਚਾਰ ਤੋਂ ਡਰਦੇ ਤੇ ਬੱਕੜਵਾਹ ਕਰਕੇ, ਭਾਵੇਂ ਫਸ ਜਾਂਦੇ ਕਸੂਤੇ ਹਾਂ ।
ਅਸੀਂ ਹਾਂ ਗੁਰੂ ਦੇ ਅਸਲੀ ਸਿੱਖ, ਕੌਣ ਕਹਿੰਦਾ ਅਸੀਂ ਧੂਤੇ ਹਾਂ ?
-ਗੁਰਪ੍ਰੀਤ ਸਿੰਘ, (USA)
