ਸਾਈਂ ਨੇ ਘਰ ਆਉਣਾ ਹੈ।
-ਗੁਰਪ੍ਰੀਤ ਸਿੰਘ (USA)
ਕਿਸ ਨੂੰ ਮੈਂ, ਮੰਨਾ ਧਰਮੀ ?
ਮੱਥੇ ਤੋਂ ਨਹੀਂ ਦਿਸਦਾ, ਮੈਨੂੰ।
ਕਰਾਂ ਕਿਹੜਾ, ਮੈਂ ਹੀਲਾ ਸਾਈਂ !
ਵੇਖ ਸਕਾਂ, ਸਭ ਵਿੱਚ ਹੀ ਤੈਨੂੰ।
ਸੂਰਜ ਨਹੀਂ ਕਰਦਾ ਕਿਸੇ ਨਾਲ ਵੈਰ ਹੈ।
ਸਭ ਲਈ ਹੀ ਦਿੰਦਾ ਧੁੱਪ ਬਿਖੇਰ ਹੈ।
ਧੁੱਪ ਹੈ ਬੜੀ ਨਿੱਘੀ, ਸੂਰਜ ਚਾਹੇ ਦੂਰ ਹੈ।
ਹਰ ਹਿਰਦੇ ’ਚ ਵਰਸਦਾ, ਸਾਈਂ ਦਾ ਹੀ ਨੂਰ ਹੈ।
ਮੂੰਹੋਂ ਨਿੱਤ, ਸਾਈਂ-ਸਾਈਂ ਦਾ ਹੋਕਾ ਲਾਇਆ ।
ਖ਼ਲਕਤ ਦੀ ਸੇਵਾ ਦਾ, ਖ਼ਿਆਲ ਨਾ ਆਇਆ ।
ਸਾਹਾਂ ਤੋਂ ਵੀ ਨੇੜੇ ਸਾਈਂ, ਨਜ਼ਰੀਂ ਨਾ ਆਵੇ !
ਦਿਲ ਵਿੱਚ ਯਾਦ ਦਾ, ਕਿਉਂ ਨਾ ਦੀਵਾ ਜਗਾਇਆ ?
ਮੁਕਤੀ ਦੀ ਸੱਧਰ ਰੱਖ ਕੇ, ਜੇ ‘ਪ੍ਰੀਤ’ ਲਗਾਈ।
ਵੇਖੀਂ ਸੱਜਣਾ ! ਕਿੱਧਰੇ ਮੁੱਢੋਂ ਹੀ ਨਾ ਸੁੱਕ ਜਾਈਂ ।
ਸਰਤਾਂ ਵਾਲਾ ਪਿਆਰ ਵੀ ਕੋਈ, ਦਿਲ ਲਗਾਉਣਾ ਹੈ !
ਡਰ ਨੂੰ ਛੱਡਿਆਂ ਹੀ, ਸਾਈਂ ਨੇ ਘਰ ਆਉਣਾ ਹੈ।
