ਪੰਜਾਬੀ ਬੋਲੀ

  ਪੰਜਾਬੀ ਬੋਲੀ

ਰਾਜ ਬੋਲੀ ਪੰਜਾਬ ਦੀ ਭਾਵੇਂ ‘ਪੰਜਾਬੀ’ ਹੀ ਹੈ ਅਤੇ ਹੁਕਮ ਵੀ ਚਲਦੈ ਹੈ ਏਥੇ ਇਕ ਪੰਜਾਬੀ ਦਾ।

ਪਰ! ਵਿਹਾਰ ’ਚ ਤਾਂ ਰਾਜ-ਰਾਣੀ ਧੱਕੇ ਖਾਂਦੀ ਐ, ਦਰਦੀ ਦਿਖਦਾ ਨਾ ਕੋਈ ਏਥੇ ਅੱਜ ਪੰਜਾਬੀ ਦਾ।

 ਕਚੈਹਰੀਆਂ ’ਚ ਕੋਈ ਪੁੱਛ ਪ੍ਰਤੀਤ ਨਹੀਂ, ਦਫਤਰਾਂ ਕਨਵੈਂਟ ਸਕੂਲਾਂ ’ਚ ਵੀ ਦਾਖ਼ਲਾ ਬੰਦ ਪੰਜਾਬੀ ਦਾ।

ਸੜਕਾਂ ਦੇ ਮੀਲ ਪੱਥਰਾਂ ਤੋਂ ਪੰਜਾਬੀ ਗਾਇਬ ਹੈ, ਦੁਕਾਨਾਂ ਦੇ ਬੋਰਡ ਵੀ ਵਿਰਲਾ ਹੀ ਲਾਉਂਦਾ ਪੰਜਾਬੀ ਦਾ।

ਈਰਖਾਵਾਦੀ ਤਬਕਾ ਇਸ ਦਾ ਦੁਸ਼ਮਣ ਬਣਿਆ, ਗਵਾਰਾਂ ਦੀ ਬੋਲੀ ਕਹਿ ਅਨਾਦਰ ਕਰਦੈ ਹਰ ਪੰਜਾਬੀ ਦਾ।

ਉੱਪਰ ਥੁੱਕਣ ਵਾਲੇ ਦੇ ਥੁੱਕ ਵਾਪਸ ਮੁੰਹ ’ਤੇ ਆਉਂਦੈ, ਉਹ ਰੱਖਣ ਯਾਦ ਹਮੇਸ਼ਾ ਮੁਹਾਵਰਾ ਇਹ ਪੰਜਾਬੀ ਦਾ।

ਮਾਂ ਬੋਲੀ ਛੱਡ ਜੋ ‘ਬੋਲੀ ਅਵਰ ਤੁਮ੍ਹਾਰੀ’ ਕਰਦਾ ਏ, ਹੁੰਦਾ ਉਹ ਹਰਾਮੀ ਮਾਂ ਪਿਉ ਛੱਡ ਪੁੱਤ ਬਣੇ ਗਵਾਂਢੀ ਦਾ।

ਇਹ ਮਾਖਿਉ ਮਿੱਠੀ ਬੋਲੀ ਆਪਣੇ ਆਪ ’ਚ ਪੂਰੀ ਐ, ਸਭ ਨੂੰ ਪਿਆਰ ਵੰਡਦੀ, ਹੈ ਭਰਪੂਰ ਖ਼ਜ਼ਾਨਾ ਪੰਜਾਬੀ ਦਾ।

ਗੁਰੂਆਂ, ਭਗਤਾਂ, ਉਪਦੇਸ਼ ਉਚਾਰੇ ਬੋਲੀ ਏਸੇ ’ਚ, ਵਾਰਿਸ, ਬੁੱਲਾ, ਸ਼ਾਹ-ਮੁਹੰਮਦ ਵੀ ਗੁਲਦਸਤਾ ਪੰਜਾਬੀ ਦਾ।

ਬੋਲੀਆਂ ਕਿੰਨੀਆਂ ਹੀ ਸਿਖਿਓ, ਮਾਂ ਬੋਲੀ ਭੁਲਿਓ ਨਾ, ‘ਸੁਰਿੰਦਰ ਸਿੰਘਾ’ ਨਾ ਭੁੱਲੀਂ ਕਰਨਾ ਸਤਿਕਾਰ ਪੰਜਾਬੀ ਦਾ।

ਸ਼. ਸੁਰਿੰਦਰ ਸਿੰਘ ‘ਖਾਲਸਾ’ ਮਿਉਦ ਕਲਾਂ ਫਤਿਹਾਬਾਦ ਫੋਨ=94662-66708, 97287-43287

E -MAIL= sskhalsa223@yahoo.com sskhalsa1957@gmail.com