ਸੁਣ ਪੰਜਾਬ ਦਿਆ ਹਾਕਮਾਂ !
– ਰਘਬੀਰ ਸਿੰਘ ‘ਮਾਨਾਂਵਾਲੀ’ ਮੋਬਾਇਲ: 88728-54500
ਸੁਣ ਪੰਜਾਬ ਦੇ ਹਾਕਮਾਂ, ਤੂੰ ਉਹਨਾਂ ਮਾਵਾਂ ਦੀ ਹੂਕ,
ਪੁੱਤ ਜਿਨ੍ਹਾਂ ਦੇ ਗਭਰੂ, ਅੱਜ ਨਸ਼ਿਆਂ ’ਚ ਦਿੱਤੇ ਫੂਕ।
ਹਰ ਗੱਲ ਨੂੰ ਵਿੱਚ ਮਜ਼ਾਕ ਦੇ , ਦੇਂਦਾ ਏ ਤੂੰ ਟਾਲ਼,
ਹੁਣ ਪੰਜਾਬੀ ਤੜਫ ਕੇ, ਰਹੇ ਤੀਜੇ ਬਦਲ ਨੂੰ ਭਾਲ਼।
ਉਫ਼ ! ਕਿਸਾਨ ਪੰਜਾਬ ਦੇ, ਪੈ ਗਏ ਖ਼ੁਦਕਸ਼ੀਆਂ ਦੇ ਰਾਹ,
ਟੱਬਰ ਉਹਨਾਂ ਦੇ ਰੁਲ਼ ਗਏ, ਤੇਰੇ ਮੂਹੋਂ ਨਾ ਨਿਕਲੀ ਆਹ।
ਵੱਡਮੁੱਲਾ ਖ਼ਜ਼ਾਨਾ ਪੰਜਾਬ ਦਾ, ਤੀਰਥਾਂ ਉੱਤੇ ਨਾ ਐਵੇਂ ਰੋੜ੍ਹ।
ਬਚਾਉਣ ਲਈ ਕਿਰਸਾਨ ਨੂੰ, ਤੂੰ ਕਰਜ਼ ਉਹਨਾ ਦਾ ਮੋੜ੍ਹ।
ਅੱਜ ਅਫਰਾ-ਤਫਰੀ ਮੱਚ ਰਹੀ, ਹੋ ਰਿਹਾ ਪੰਥ-ਗ੍ਰੰਥ ਖ਼ੁਆਰ,
ਹੁਣ ਛੱਡ ਹਕੂਮਤਾਂ ਆਪਣੀਆਂ, ਤੈਥੋਂ ਹੋਣਾ ਨੀ ਕੁਝ ਸੁਆਰ।
ਤੂੰ ਲੋਕ ਰਾਜ ਨੂੰ ਸਮਝਿਆ, ਸਿਰਫ਼ ਆਪਣੇ ਘਰ ਦਾ ਖੇਲ੍ਹ,
ਹਰ ਫਰੰਟ ’ਤੇ ਜਾਪੇਂ, ਹੋ ਗਿਉਂ, ਅੱਜ ਬੁਰੀ ਤਰ੍ਹਾਂ ਤੂੰ ਫੇਲ੍ਹ।
ਹੁਣ ਵਾੜ ਖੇਤ ਨੂੰ ਖਾ ਰਹੀ, ਲੋਟੂ ਬਣ ਗਏ ਪਹਿਰੇਦਾਰ,
ਮੱਥਾਅ ਪੰਜਾਬੀਆਂ ਮਿੱਥ ਲਿਆ, ਬਦਲ ਦੇਣੀ ਹੈ ਸਰਕਾਰ।
ਪਦ ਅਰਥ: ਉਫ਼-ਅਫ਼ਸੋਸ।, ਆਹ-ਹਉਕਾ, ਹਾਏ।, ਮੱਥਾਅ ਸਾਹਮਣਿਓਂ।
