ਮੰਗੇ ਪਾਹੁਲ ਖੁੱਦ ਬਖਸ਼ਣ ਹਾਰ….।

0
272

ਮੰਗੇ ਪਾਹੁਲ ਖੁੱਦ ਬਖਸ਼ਣ ਹਾਰ….।

ਗੁਰੂ ਗੋਬਿੰਦ ਸਿੰਘ ਜੀ ਨੇ ਵਿਚ ਅਨੰਦ ਪੁਰ ਦੇ, ਖੇਲ੍ਹ ਕੀਤਾ ਸੀ ਅਜ਼ਬ ਕਮਾਲ ਐ ਲੋਕੋ।

ਇੱਕ ਸਿੱਖ ਦੇ ਸਿਰ ਦੀ ਜਦ ਮੰਗ ਕੀਤੀ, ਝੱਲਿਆ ਜਾਏ ਨਾ ਚੇਹਰੇ ਦਾ ਜ਼ਲਾਲ ਐ ਲੋਕੋ।

ਸਾਰੇ ਵੇਖਣ ਇੱਕ ਦੂਜੇ ਦੇ ਮੂੰਹ ਵੰਨੀਂ, ਆਇਆ ਗੁਰਾਂ ਨੂੰ ਕੀ ਇਹ ਖ਼ਿਆਲ ਐ ਲੋਕੋ।

ਅੱਗੇ ਕਿਸੇ ਨਾ ਏਦਾਂ ਦਾ ਸਵਾਲ ਕੀਤਾ, ਇਹ ਤਾਂ ਨਵਾਂ ਹੀ ਹੋਇਆ ਕਮਾਲ ਐ ਲੋਕੋ।

ਆਖ਼ਰ ‘ਦਇਆ ਰਾਮ’ ਕੀਤੀ ਤਿਆਰੀ, ‘ਧਰਮ’ ਆਇਆ ਹੈ ਦਇਆ ਦੇ ਨਾਲ ਐ ਲੋਕੋ।

ਕੀਤੀ ਹਿੰਮਤ ਤਾਂ ‘ਹਿੰਮਤ ਸਿੰਘ’ ਹੋਇਐ, ‘ਮੋਹਕਮ ਸਿੰਘ’ ਵੀ ਹੋਇਐ ਨਿਹਾਲ ਐ ਲੋਕੋ।

ਕੀਤੀ ਤਿਆਰੀ ‘ਸਾਹਿਬ ਸਿੰਘ’ ਬਣਿਆ, ਪੰਚਾਇਤੀ ਰਾਜ ਦੀ ਚੱਲੀ ਇਉਂ ਚਾਲ ਐ ਲੋਕੋ।

‘ਰਾਏ’ ਰਾਮ ਤੇ ਸਨ ਜੋ ‘ਚੰਦ’ ਪਹਿਲਾਂ, ਕੀਤੇ ‘ਸਿੰਘ’ ਗੁਰਾਂ ਕਰ ਸੰਭਾਲ ਐ ਲੋਕੋ।

ਜਿਸ ਨੇ ‘ਗਿਦੱੜੋਂ’ ‘ਸ਼ੇਰ’ ਸੀ ਬਣਾ ਦਿੱਤੇ, ਉਹ ਤਾਂ ਹੈ ਮਾਂ ਗੁਜ਼ਰੀ ਦਾ ਲਾਲ ਐ ਲੋਕੋ।

ਊਚ ਨੀਚ ਤੇ ਜਾਤ-ਪਾਤ ਦੀ ਭੈੜੀ ਵੰਡ ਸੀ ਜੋ, ਉਸ ਨੂੰ ਸਿੱਖੀ ’ਚੋਂ ਦਿੱਤਾ ਨਿਕਾਲ ਐ ਲੋਕੋ ।

ਸਵਾ ਲੱਖ ਨਾਲ ਇੱਕ ਲੜਾ ਦਿੱਤਾ, ਐਸੀ ਸ਼ਕਤੀ ਹੈ ‘ਪਾਹੁਲ ਖੰਡੇਧਾਰ’ ਐ ਲੋਕੋ।

‘ਚਿੜੀਆਂ’ ਨੇ ‘ਬਾਜਾਂ’ ਦੇ ਖੰਭ ਮਰੋੜ ਦਿੱਤੇ, ਐਸੀ ਜ਼ੁਰਅੱਤ ਭਰੀ ਕਲਗੀ ਧਾਰ ਐ ਲੋਕੋ।

‘ਪਹੁਲ ਖੰਡੇ’ ਦੀ ਬਹੁਤ ਅਮੋਲ ਹੈ ਜੀ, ਬੇ-ਅੰਮਿ੍ਰਤੀਆ ਜਾਣੇ ਕੀ ਇਸ ਦੀ ਸਾਰ ਐ ਲੋਕੋ।

‘ਅੰਮਿ੍ਰਤ’ ਦਾਤਾ ਵੀ ਸਵਾਲੀ ਬਣ ਗਿਆ ਏ, ਮੰਗੇ ‘ਪਾਹੁਲ’ ਖੁਦ ਬਖਸ਼ਣ ਹਾਰ ਐ ਲੋਕੋ।

‘ਖਾਲਸਾ’ ਪ੍ਰਗਟ ਗੁਰਾਂ ਜੋ ਕਰ ਦਿੱਤਾ, ਪ੍ਰਮਾਤਮਾ ਦੀ ਮੌਜ਼ ਦਾ ਹੈ ਚਮਤਕਾਰ ਐ ਲੋਕੋ।

‘ਪਾਹੁਲ’ ਲੈ ਰਹਿਤਾਂ ਦਾ ਧਾਰਨੀ ਜੋ, ‘ਸੁਰਿੰਦਰ ਸਿੰਘ’ ਜਾਏ ਉਸੇ ਤੋਂ ਬਲਿਹਾਰ ਐ ਲੋਕੋ।

ਮੈਂ ਤਾਂ ਸੁਣਿਆ ਸੀ ਤੇਰੇ ਸਕੂਲ ਅੰਦਰ, ਪੜ੍ਹਣ ਵਾਲਿਆਂ ਦੀ ਲੱਗਦੀ ਫੀਸ ਕੋਈ ਨਾ।

ਜਾ ਕੇ ਵੇਖਿਆ ਜਦੋਂ ਸਕੂਲ ਅੰਦਰ, ਪੜ੍ਹਣ ਵਾਲਿਆਂ ਦੇ ਸਿਰ ’ਤੇ ਸੀਸ ਕੋਈ ਨਾ।

ਸ੍ਰ; ਸੁਰਿੰਦਰ ਸਿੰਘ ‘ਖਾਲਸਾ’ ਮਿਉਂਦ ਕਲਾਂ ‘ਫਤਿਹਾਬਾਦ’-97287-43287,94662-66708

E -MAIL= sskhalsa223@yahoo.com, surindersinghkhalsa83@gmail.com

27550cookie-checkਮੰਗੇ ਪਾਹੁਲ ਖੁੱਦ ਬਖਸ਼ਣ ਹਾਰ….।