ਅੱਜ ਦੇ ਸਿੱਖ
_ਬਲਬੀਰ ਸਿੰਘ ਬੋਬੀ, ਪਿੰਡ ਤੇ ਡਾਕ: ਤੱਖਰਾਂ (ਲੁਧਿਆਣਾ) 92175-92531
ਲਾਇਆ ਬੂਟਾ ਸਿੱਖੀ ਦਾ ਸਾਰੇ ਹੀ ਜਗਤ ਅੰਦਰ, ਤਾਂ ਹੀ ਅਸੀਂ ਬਣੇ ਬਾਬੇ ਨਾਨਕ ਦੇ ਸਿੱਖ ਹਾਂ।
ਜਿਹੜੇ ਕਰਮਕਾਂਡਾਂ ’ਚੋਂ ਸਾਨੂੰ ਕੱਢਿਆ ਸੀ ਗੁਰਾਂ ਨੇ, ਉਹਨਾਂ ਵਿਚ ਹੀ ਫਸਦੇ ਜਾਂਦੇ ਅਸੀਂ ਸਿੱਖ ਹਾਂ।
ਗੁਰਬਾਣੀ ਨਾਲ ਜੁੜਨਾ ਹੀ ਸੀ ਆਧਾਰ ਸਾਡਾ, ਪਰ ਅਸੀਂ ਥਾਓਂ-ਥਾਈਂ ਜਾਣ ਵਾਲੇ ਸਿੱਖ ਹਾਂ।
ਕਿਤੇ ਸ਼ਨੀ-ਦੇਵਤੇ ਕਿਤੇ ਗੁੱਗਾ ਮਾੜੀ ਪੂਜ, ਵੀਰਵਾਰ ਤੇਲ ਚਿਰਾਗ ਪਾਉਣ ਵਾਲੇ ਸਿੱਖ ਹਾਂ।
ਲਾਈਨਾਂ ਵਿਚ ਖੜ੍ਹ ਮੱਥਾ ਟੇਕ ਦੇਵੀਆਂ ਦੇ, ਭਰ-ਭਰ ਗੱਡੀਆਂ ਲੈ ਜਾਣ ਵਾਲੇ ਸਿੱਖ ਹਾਂ।
ਟੂਣੇ-ਟਾਮਣਿਆਂ ਦੇ ਵਿਚ ਹੀ ਉਲਝ ਕੇ, ਪਾਂਡਿਆਂ ਨੂੰ ਹੱਥ ਦਿਖਾਉਣ ਵਾਲੇ ਸਿੱਖ ਹਾਂ।
ਮੁੰਦੀਆਂ ਦੇ ਵਿਚ ਮਹਿੰਗੇ-ਮਹਿੰਗੇ ਨਗ ਜੜ, ਨਿੱਤ ਰਾਸ਼ੀਆਂ ਦੇ ਨਾਲ ਜੁੜੇ ਹੋਏ ਸਿੱਖ ਹਾਂ।
ਗੁਰੂਆਂ ਦੇ ਸੱਚੇ-ਸੁੱਚੇ ਭੁੱਲ ਉਪਦੇਸ਼ ਬੱਬੀ, ਦੇਹਧਾਰੀ ਪਾਖੰਡੀਆਂ ਨਾਲ ਜੁੜੇ ਹੋਏ ਸਿੱਖ ਹਾਂ।
